بۇگىن الماتى اكىمدىگىنىڭ ءباسپاسوز ورتالىعىندا قحر-دان شىققان كوروناۆيرۋستىق ينفەكتسيانى قايتارۋ ءۇشىن قالاداعى مەديتسينالىق قىزمەتتەردىڭ دايىندىعىن قامتاماسىز ەتۋ بويىنشا قابىلدانعان شارالار تۋرالى ءباسپاسوز كونفەرەنتسياسى ءوتتى دەپ حابارلايدى "ادىرنا" پورتالى.
وعان الماتى قالالىق دەنساۋلىق ساقتاۋ باسقارماسى باسشىسىنىڭ ورىنباسارى اسەل بيسەنباەۆا جانە تاۋارلار مەن قىزمەتتەردىڭ قاۋىپسىزدىگىن باقىلاۋ ءبولىمىنىڭ باستىعى ايزات مولداعاسيموۆا قاتىستى.
ءباسپاسوز كونفەرەنتسيا بارىسىندا كوروناۆيرۋستىڭ الدىن الۋعا دايىندىعى تۋرالى ايتىلدى.
"ماسكالار مەن دارىلەردى جاپپاي ساتىپ الۋدىڭ قاجەتى جوق. ولار جەتەرلىك. دۇرلىگۋدىڭ كەرەگى جوق. قازىرگى تاڭدا قالادا ماسكالارى بار 67 ءدارىحانا كومپانياسى جۇمىس ىستەۋدە. كەشەگى سان بويىنشا، ماسكانىڭ ءبىر جارىم ميلليون داناسى بار. فارماتسەۆتيكا سالاسىنداعى بارلىق ارىپتەستەرىمدى ماسكالاردىڭ جەتىسپەۋشىلىگىنە بايلانىستى جاساندى تولقۋلار تۋعىزباۋدى سۇرايمىن.
بۇل ماسەلەنى تابىس كوزىنە اينالدىرماڭىزدار. مۇنداي جاعداي مەنينگيت كەزىندە دە بولعان.
كەشە مەديتسينالىق ەمەس ۇيىمدار، جاۋاپتى ەمەس ۇيىمدار ماسكالاردى ساتىپ العانى تۋرالى فاكتىلەر انىقتالدى. نە ءۇشىن؟ كەيىنىرەك ساتۋ ءۇشىن. سوندىقتان مەن قالا تۇرعىندارىن دۇربەلەڭگە بوي الدىرماۋعا شاقىرامىن. الاڭداۋعا نەگىز جوق.
جاساندى تاپشىلىقتى تۋدىرماس ءۇشىن قولعا تەك 15-20 ماسكادان بەرۋگە كەڭەس بەرەمىن. ۆيرۋسقا قارسى پرەپاراتتار تۋرالى ايتاتىن بولساق، ولاردىڭ سانى جەتكىلىكتى. ولاردى دا ساتىپ الۋدىڭ قاجەتى جوق. دارىلەر قاجەت بولعان جاعدايدا تەك رەتسەپت بويىنشا بەرىلەدى", - دەدى ايزات مولداعاسيموۆا.
ەستەرىڭىزگە سالا كەتەيىك، بۇگىن دەنە قىزۋى كوتەرىلگەن 23 ادام كەلگەن، ونىڭ ىشىندە 4-ەۋى جرۆي كۇدىگىمەن اۋرۋحاناعا جاتقىزىلدى دەپ، حابارلاعان بولاتىن دەنساۋلىق ساقتاۋ ءمينيسترى ءبىرتانوۆ.
