قىتاي حالىق رەسپۋبليكاسىمەن اراداعى بارلىق شەكارا بەكەتتەرى جابىلدى. بۇل تۋرالى KAZ.NUR.KZ پورتالى ءماجىلىس دەپۋتاتى، قازاقستان ارداگەرلەرى قاۋىمداستىعىنىڭ توراعاسى باقىتبەك سماعۇلدىڭ Facebook جەلىسىندەگى پاراقشاسىنا سىلتەمە جاساپ حابارلايدى.
فوتو: Getty Images/Xiaolu Chu
"قىتايداي الپاۋىتقا اۋىر زۇلمات كەلدى. ءتاڭىر ولارعا ءتول "جاڭا جىل" مەرەكەسىن دە تويلاتپاي تاستادى. قازىرگى كەزدە شىڭ ەلىندە تۇرعىندارىنىڭ سانى تۇتاس قازاقستان حالقىنان دا كوپ قالالار كارانتينگە جابىلۋدا. ولاردا حالىقتىڭ دۇربەلەڭگە ءتۇسىپ، تاماققا تالاسىپ، ءبۇلىنىپ جاتقانىن اقپارات قۇرالدارى تاراتۋدا.
ۆيرۋس قىتايدان سىرتقا شىعىپ كەتتى. ونىمەن سىرقاتتانعاندار گونكونگ، تايلاند، وڭتۇستىك كورەيا، جاپونيا، تايۆان، اقش، سينگاپۋر، ۆەتنامدا تىركەلگەن. ال كەيىنگى جىلدارى قىتاي ينۆەستيتسياسىنا قۇشاعىن اشىپ، بۇل ەلمەن ەتەنە بولىپ كەتكەن اۋستراليا بۇگىندە ءتاج ۆيرۋسى تارالۋى كەسىرىنەن تۋريستەردەن ايىرىلىپ جاتىر.
ەندى قازاقستاندىقتار الەۋمەتتىك جەلىلەردە قىتاي حالىق رەسپۋبليكاسىمەن اراداعى شەكارانى تاس بەكىتۋ تۋرالى تالاپتار قويۋدا، وسىعان وراي مىنانى حابارلاعىم كەلەدى: قازاقستان شىعىس كورشىدەن ۆيرۋس ەلگە ەنبەۋى ءۇشىن "قورعاس" شەكارا ماڭى ىنتىماقتاستىعى حالىقارالىق ورتالىعىن ۋاقىتشا جاپتى.
سونىمەن قاتار، شەكاراشىلارىمىز قىتايمەن شەكتەسەتىن مەملەكەتتىك شەكارا بويىنداعى بارلىق وتكىزۋ بەكەتتەرىن – "باقتى", "مايقاپشاعاي", "دوستىق–الاشانكوۋ", "قالجات" پۋنكتتەرىن دە جاۋىپ، قىمتادى.
مەملەكەت حالقىمىزدى قورعاۋ ءۇشىن قاجەتتى شارالاردى قولعا الىپ وتىر.
ەسكە سالا كەتسەك، ولىمگە اكەلەتىن كوروناۆيرۋس قىتايدىڭ بارلىق پروۆينتسيالارىنا تارالعان. ەلدەگى ناۋقاستاردىڭ سانى 1300-گە جەتتى، 40-تان استام ادام جاپا شەكتى.
بۇعان دەيىن ءولىم ۆيرۋسىنىڭ "وتانى" بولعان اسپان استى ەلىنىڭ قالاسىندا كوروناۆيرۋستى جۇقتىرعان بارلىق ناۋقاستار ورنالاستىرىلاتىن ەمحانا سالۋ جوسپارلانىپ وتىرعانى ايتىلدى. مەديتسينالىق مەكەمەنىڭ قۇرىلىسىن 6 كۇندە اياقتاۋ جوسپارلانعان", - دەدى باقىتبەك سماعۇل.
ودان بولەك، قىتايدىڭ پاتوگەندىك ميكروورگانيزمدەردى ساقتاۋ ۇلتتىق ۇيىمى كوروناۆيرۋستىڭ جاڭا تۇرىنە قاتىستى اقپارات پەن ونىڭ ەلەكتروندى ميكروسكوپ كومەگىمەن جاسالعان العاشقى سۋرەتىن جاريالادى.
ايتا كەتۋ كەرەك، قازاقستاندا قاۋىپتى ينفەكتسيا وقيعالارى بولعان جوق.
بۇگىن توقاەۆ قىتايداعى كوروناۆيرۋستىڭ ەلىمىزدە تارالۋىنىڭ الدىن الۋدى تاپسىردى.
وسىعان بايلانىستى قازاقستاننىڭ پرەمەر-ءمينيسترى اسقار مامين جيىن وتكىزدى.
