24 قاڭتاردا تۇستەن كەيىن شىمكەنت اكىمدىگىنىڭ الدىنا ءجۇز شاقتى شەتەلدىك ءنومىرى بار كولىك يەلەرى كەلىپ، ماسەلەلەرىن شەشىپ بەرۋدى سۇرادى.
نارازى جۇرگىزۋشىلەردىڭ ءبىرى ۇسەن سىدىقبەكوۆ بۇگىن پرەزيدەنت قاسىم-جومارت توقاەۆتىڭ شەتەلدەن الىپ كەلگەن كولىكتەردى تىركەۋگە ءبىر جىل ۋاقىت بەرگەنىن ەستىگەن. ونىڭ پىكىرىنشە، ءبىر جىلدىڭ ىشىندە بارلىق كولىكتى تىركەپ ۇلگەرۋ مۇمكىن ەمەس - كەمىندە 3-4 جىل ۋاقىت كەرەك. ونىڭ ويىنشا، الىپ كەلگەن كولىكتى ءۇش جىلعا دەيىن ساتۋعا بولمايدى دەگەن تالاپ تا زاڭسىز. ول كولىكتى كەدەننەن وتكىزەتىن كەزدە كەدەنشى سالىق تولەيسىڭ دەپ ەسكەرتپەدى دەدى.
جۇرگىزۋشى قۋان ەسبولعان بار اقشاسىن جيىپ، مەملەكەت رۇقسات ەتكەننەن كەيىن تاۋەكەل ەتىپ، شەتەلدەن كولىك اكەلگەنىن ايتادى. ول مەملەكەتتىڭ "كولىك اكەلمە" دەپ الدىن الا ايتپاي-ەسكەرتپەي، اكەلگەن كولىكتىڭ سالىعىن كوبەيتىپ جاتقانىنا قارسى.
- 170 مىڭ كولىك قازاقستانعا كىردى دەيدى. بۇل رەسمي تىركەلگەن كولىكتەر. تىركەلمەگەنى قانشا؟ شەكتەۋ قويىلعاننان كەيىن دە شەتەلدەن الىپ كەلگەن بولسا، ءوز وبالى وزدەرىنە. زاڭ بويىنشا الىپ كەلگەن ماشينالارعا ەمىن-ەركىن جۇرۋىنە رۇقسات بەرسىن، - دەدى ول.
جۇرگىزۋشىلەردىڭ ۋاجدەرىن تىڭداپ بولعان سوڭ قالا اكىمىنىڭ ورىنباسارى بۇحارباي پارمانوۆ ولاردىڭ ۇسىنىستارىن قاراپ، ۇكىمەتكە جەتكىزۋگە ۋادە ەتتى. جۇرگىزۋشىلەر ءوز سۇراقتارىنا جاۋاپتى اكىمدىكتەن كۇتەتىن بولىپ تارادى. اكتسيانى پوليتسيا باقىلادى.
24 قاڭتاردا تاڭەرتەڭ ۇكىمەتتىڭ كەڭەيتىلگەن وتىرىسى كەزىندە پرەزيدەنت قاسىم-جومارت توقاەۆ ۇكىمەتكە شەتەلدىك ءنومىرى بار كولىكتەردى ۋاقىتشا تىركەۋدى تاپسىرعان.
- ۇكىمەت 2020 جىل 1 اقپانعا دەيىن ەۋرازيا ەكونوميكالىق وداعى اۋماعىنان اكەلىنگەن كولىكتەردى ءبىر ايدىڭ ىشىندە ءبىر رەت ۋاقىتشا تىركەۋدەن وتكىزۋى ءتيىس. بۇل تىركەۋ 2021 جىلدىڭ 1 ناۋرىزىنا دەيىن جارامدى بولادى، - دەدى توقاەۆ.
پرەزيدەنت مۇنداي كولىگى بار ادامدار 2021 جىلدىڭ 1 ناۋرىزىنا دەيىن كەدەندىك باج سالىعى مەن ۋتيليزاتسيا الىمىن تولەپ، كولىكتى تۇراقتى تىركەۋدەن وتكىزۋى قاجەت نەمەسە كولىكتى قازاقستان اۋماعىنان شىعارۋى ءتيىس نەمەسە زاڭمەن تىيىم سالىنباعان باسقا ارەكەتتى جۇزەگە اسىرۋى ءتيىس دەگەن.
بيىل قاڭتاردىڭ 14-ءى كۇنى ىشكى ىستەر مينيسترلىگى "قازاقستان اۋماعىنا كىرگەن ارمەنيا، قىرعىزستان، رەسەي ءنومىرى بار كولىكتەردى زاڭعا ساي تىركەۋ كەرەگىن" مالىمدەگەن. قازاقستان بيلىگىنىڭ ەلدە ارمەنيالىق، قىرعىزستاندىق جانە رەسەيلىك نومىرلەرمەن جۇرگەن اۆتوكولىكتەردى زاڭ جولىمەن تىركەۋ تۋرالى تالابى كەي جۇرگىزۋشىلەردىڭ نارازىلىعىن تۋدىرعان.
16-19 قاڭتار اراسىندا اقتاۋ، اقتوبە, الماتى، اتىراۋ، جاڭاوزەن، ورال, پەتروپاۆل جانە سەمەي قالالارىندا اۆتوجۇرگىزۋشىلەر جينالىپ، كولىكتى تىركەۋدىڭ شىعىنى تىم كوپ ەكەنىن ايتىپ، ۇكىمەتتەن اۆتوماشينالارىن جەڭىلدىكپەن ءارى ارزان جولمەن تىركەۋگە مۇمكىندىك بەرۋدى تالاپ ەتكەن.
"ازاتتىق" راديوسى
