24 qańtarda tústen keıin Shymkent ákimdiginiń aldyna júz shaqty sheteldik nómiri bar kólik ıeleri kelip, máselelerin sheship berýdi surady.
Narazy júrgizýshilerdiń biri Úsen Sydyqbekov búgin prezıdent Qasym-Jomart Toqaevtyń shetelden alyp kelgen kólikterdi tirkeýge bir jyl ýaqyt bergenin estigen. Onyń pikirinshe, bir jyldyń ishinde barlyq kólikti tirkep úlgerý múmkin emes - keminde 3-4 jyl ýaqyt kerek. Onyń oıynsha, alyp kelgen kólikti úsh jylǵa deıin satýǵa bolmaıdy degen talap ta zańsyz. Ol kólikti kedennen ótkizetin kezde kedenshi salyq tóleısiń dep eskertpedi dedi.
Júrgizýshi Qýan Esbolǵan bar aqshasyn jıyp, memleket ruqsat etkennen keıin táýekel etip, shetelden kólik ákelgenin aıtady. Ol memlekettiń "kólik ákelme" dep aldyn ala aıtpaı-eskertpeı, ákelgen kóliktiń salyǵyn kóbeıtip jatqanyna qarsy.
- 170 myń kólik Qazaqstanǵa kirdi deıdi. Bul resmı tirkelgen kólikter. Tirkelmegeni qansha? Shekteý qoıylǵannan keıin de shetelden alyp kelgen bolsa, óz obaly ózderine. Zań boıynsha alyp kelgen mashınalarǵa emin-erkin júrýine ruqsat bersin, - dedi ol.
Júrgizýshilerdiń ýájderin tyńdap bolǵan soń qala ákiminiń orynbasary Buharbaı Parmanov olardyń usynystaryn qarap, úkimetke jetkizýge ýáde etti. Júrgizýshiler óz suraqtaryna jaýapty ákimdikten kútetin bolyp tarady. Akııany polıııa baqylady.
24 qańtarda tańerteń úkimettiń keńeıtilgen otyrysy kezinde prezıdent Qasym-Jomart Toqaev úkimetke sheteldik nómiri bar kólikterdi ýaqytsha tirkeýdi tapsyrǵan.
- Úkimet 2020 jyl 1 aqpanǵa deıin Eýrazııa ekonomıkalyq odaǵy aýmaǵynan ákelingen kólikterdi bir aıdyń ishinde bir ret ýaqytsha tirkeýden ótkizýi tıis. Bul tirkeý 2021 jyldyń 1 naýryzyna deıin jaramdy bolady, - dedi Toqaev.
Prezıdent mundaı kóligi bar adamdar 2021 jyldyń 1 naýryzyna deıin kedendik baj salyǵy men ýtılızaııa alymyn tólep, kólikti turaqty tirkeýden ótkizýi qajet nemese kólikti Qazaqstan aýmaǵynan shyǵarýy tıis nemese zańmen tyıym salynbaǵan basqa áreketti júzege asyrýy tıis degen.
Bıyl qańtardyń 14-i kúni ishki ister mınıstrligi "Qazaqstan aýmaǵyna kirgen Armenııa, Qyrǵyzstan, Reseı nómiri bar kólikterdi zańǵa saı tirkeý keregin" málimdegen. Qazaqstan bıliginiń elde armenııalyq, qyrǵyzstandyq jáne reseılik nómirlermen júrgen avtokólikterdi zań jolymen tirkeý týraly talaby keı júrgizýshilerdiń narazylyǵyn týdyrǵan.
16-19 qańtar arasynda Aqtaý, Aqtóbe, Almaty, Atyraý, Jańaózen, Oral, Petropavl jáne Semeı qalalarynda avtojúrgizýshiler jınalyp, kólikti tirkeýdiń shyǵyny tym kóp ekenin aıtyp, úkimetten avtomashınalaryn jeńildikpen ári arzan jolmen tirkeýge múmkindik berýdi talap etken.
"Azattyq" radıosy
