قازاقستاننىڭ اۆياتسيالىق اكىمشىلىگى Bek Air كومپانياسىنىڭ اۋە كەمەلەرىن تەكسەرۋ بارىسىندا ينسپەكتورلار تۇسىرگەن سۋرەتتەردى ۇسىندى. تەكسەرىس قورىتىندىسى بويىنشا، ۇشاقتاردىڭ قوزعالتقىشىنان ماي اققانى، اينەكتەردىڭ قاتپارلانۋى، كونسترۋكتسيانى قورعاۋ ءۇشىن سكوتچ قولدانىلعانى جانە شينالاردىڭ توزعانى انىقتالدى، - دەپ حابارلايدى Tengrinews.kz .
اۋە كەمەلەرىن تەكسەرگەننەن كەيىنگى بريتانيالىق ينسپەكتورلاردىڭ شىعارعان قورىتىندىلارى مەن سۋرەتتەرىن قازاقستاننىڭ اۆياتسيالىق اكىمشىلىگىنىڭ ۇشۋ قاۋىپسىزدىگى دەپارتامەنتىنىڭ باسشىسى ليندا ورلەدي بريفينگتە تانىستىردى.
"ۇشاقتىڭ الدىڭعى جاعى زاقىمدانعان. ماسەلە ونىڭ ارتىندا راداردىڭ تۇرعانىندا. اۋە كەمەسىنىڭ بورتىندا ورناتىلعان راداردىڭ دۇرىس جۇمىس ىستەۋى ءۇشىن جاعدايدىڭ جاسالۋى وتە ماڭىزدى", - دەپ ءتۇسىندىردى ول.
"ەكى قوزعالتقىشتا دا يدەنتيفيكاتسيالىق تاقتايشالار جوق. بۇل وتە ماڭىزدى ەسكەرتۋ. ولار مىندەتتى تۇردە بولۋى كەرەك. Bek Air ۇشاقتارىنىڭ 50 پايىزىندا ەكى قوزعالتقىشتا دا يدەنتيفيكاتسيالىق تاقتايشالار جوق. بۇل وتە قاۋىپتى بەلگى", - دەدى ورلەدي.
"مۇندا مايدىڭ اققانى كورىنەدى. مەن، ۇشقىش رەتىندە، ءوز اۋە كەمەمدە مۇندايدى كورگىم كەلمەيدى. سونداي-اق، تەحنيكالىق قىزمەت كورسەتۋ جونىندەگى ينجەنەر وندايدى بايقاسا، كەيىن قاي كۇنى، قانشا سۇيىقتىق جوعالعانىن قاداعالاۋ ماڭىزدى. ءبىز مايدىڭ اققانى تىركەلگەن بىردە-ءبىر ءتىزىلىمدى تابا المادىق. ينسپەكتورلار ءاربىر Bek Air ۇشاعىنىڭ استىنان وسىنداي كەمشىلىكتەر تاپتى", - دەدى ورلەدي.
سونداي-اق فيۋزەلياجدا دا مايدىڭ ىزدەرى بار.
"بارلىق ۇشاققا مەتالل سكوتچ جابىستىرىلعان. اۋە كەمەسىندە سكوتچ قولدانۋعا بولادى، بىراق بۇل ارنايى سكوتچ بولۋى ءتيىس جانە ونى پايدالانۋ دەرەگى جازباشا بەكىتىلۋى ءتيىس. ول بويىنشا ەشقانداي قۇجات تابىلعان جوق", - دەپ اتاپ ءوتتى ورلەدي.
"ۇشقىشتار كابيناسى كوپ قاباتتى اينەكپەن قورعالۋى ءتيىس. مۇندا پيلوتتار كابيناسىنىڭ سول تەرەزەنىڭ اينەگى قاتپارلانىپ كەتكەنىن كورەسىز", - دەدى ورلەدي.
ونىڭ ايتۋىنشا، Bek Air ۇشاقتارىنىڭ جۇك سالاتىن جەرىندەگى پانەلدەردە ورتكە قارسى تاسپالارى جوق نەمەسە ناشار جاعدايدا.
سونداي-اق، شينالار توزعان.
ونىڭ ايتۋىنشا، اۆياكومپانيانىڭ بارلىق بورتتارىندا جۇك بولىگىنىڭ ەدەن پانەلدەرى تەسىك بولعان.
