پارلامەنت ءماجىلىسى سوعىس جاعدايى ماسەلەلەرى بويىنشا كەيبىر زاڭنامالىق اكتىلەگە وزگەرىستەر ەنگىزۋ تۋرالى زاڭ جوباسىن ءبىرىنشى وقىلىمدا ماقۇلدادى، دەپ حابارلايدى "ادىرنا" Sputnik قازاقستان اقپارات اگەنتتىگىنە سىلتەمە جاساپ.
زاڭ جوباسىن تانىستىرعان قورعانىس ءمينيسترىنىڭ ءبىرىنشى ورىنباسارى مۇرات بەكتانوۆ نەگىزگى وزگەرىستەرگە توقتالدى. باستى ماقسات – سوعىس جاعدايى سالاسىنداعى قازىرگى زاڭنامانى جەتىلدىرۋ. وسىعان وراي، پرەزيدەنت وكىلەتتىلىگىن تولىقتىرۋ ۇسىنىلىپ وتىر.
سونىڭ ىشىندە سوعىس جاعدايىن قولدانۋ ءتارتىبىن ايقىنداۋ، قارۋلى كۇشتەرى جوعارى باس قولباسشىسىنىڭ ستاۆكاسى تۋرالى، قورعانىس كەڭەستەرى تۋرالى، سوعىس جاعدايى كەزەڭىندە ۇكىمەت قىزمەتىن ۇيىمداستىرۋ تۋرالى ەرەجەنى بەكىتۋ سياقتى وكىلەتتىلىكتەر بار.
"بۇدان باسقا، ۇكىمەت قىزمەتى مىناداي وكىلەتتىلىكپەن تولىقتىرىلادى: بەيبىت ۋاقىتتا سوعىس جاعدايى كەزەڭىندەگى مينيسترلىكتەر تۋرالى ەرەجەنى بەكىتۋ، سوعىس جاعدايى كەزەڭىندە ۇكىمەت قۇرىلىمىنا كىرەتىن مەملەكەتتىك ورگاندى سوعىس ۋاقىتىنداعى شتاتقا كوشىرۋدى ۇيىمداستىرۋ، جەرگىلىكتى اتقارۋشى ورگانعا ازاماتتىق جانە اۋماقتىق قورعانىس سالاسىن قامتاماسىز ەتۋ مىندەتىن بەلگىلەۋ. سونداي-اق، سوعىس جاعدايى كەزەڭىندە جەرگىلىكتى اتقارۋشى ورگاندارعا وبلىستىڭ، رەسپۋبليكالىق ماڭىزى بار قالانىڭ، استانانىڭ قورعانىس كەڭەستەرىن قۇرۋعا وكىلەتتىلىك بەرۋ ۇسىنىلادى", - دەدى بەكتانوۆ.
ۆيتسە-ءمينيستردىڭ سوزىنە قاراعاندا، قورعانىستى جوسپارلاۋ جۇيەسىنە دە وزگەرىس ەنگىزۋ جوسپارلانىپ وتىر. بىرىنشىدەن، پرەزيدەنت وكىلەتتىلىگىن قورعانىستى جوسپارلاۋ قاعيداسىن بەكىتۋمەن تولىقتىرۋ ۇسىنىلادى.
ەكىنشىدەن، قورعانىس مينيسترلىگى جوسپاردى ازىرلەۋدى ۇيلەستىرسە، باس شتاب سول جوسپاردىڭ ازىرلەۋشىسى بولادى. ۇشىنشىدەن، جەرگىلىكتى اتقارۋشى ورگاندار اۋماقتىق قورعانىس جوسپارىن دايىنداي الادى. بىراق ونى باس شتابپەن كەلىسۋ كەرەك.
"وسى تۇزەتۋلەر سوعىس جاعدايى تۋرالى زاڭنامالىق اكتىنى قازىرگى زامان تالابىنا ساي كەلتىرۋگە مۇمكىندىك بەرەدى. ودان باسقا، سوعىس جاعدايى كەزەڭىندە مەملەكەتتىڭ جۇمىس ىستەۋ مەحانيزمىن جەتىلدىرەدى", - دەپ اتاپ كورسەتتى مۇرات بەكتانوۆ.
