قۇرمەتتى قازاقستان رەسپۋبليكاسىنىڭ مادەنيەت جانە سپورت ءمينيسترى اقتوتى راحمەتوللاقىزى!
«مەنىڭ «حالىق ۇنىنە قۇلاق اساتىن مەملەكەت» اتتى تۇجىرىمدامام ءدال وسى ادىلەتتى قوعام يدەياسىن دامىتۋ ماقساتىمەن ۇسىنىلدى. بيلىك پەن قوعام اراسىنداعى سىندارلى ديالوگ مەملەكەتكە دەگەن سەنىمدى نىعايتا تۇسەدى. ۇكىمەت مۇشەلەرى، سونىڭ ىشىندە مينيسترلەر مەن اكىمدەر مەملەكەتتىك جانە قوعامدىق ماڭىزى بار ماسەلەلەرگە قاتىستى شەشىم قابىلداعان كەزدە ازاماتتاردىڭ ۇسىنىستارى مەن تىلەكتەرىن ەسكەرۋى كەرەك. مۇنى اباي مەڭزەگەن ادىلەتتى قوعام قالىپتاستىرۋدىڭ بىردەن-ءبىر شارتى دەپ بىلەمىن.
ۇلى اقىن «كەلەلى كەڭەس جوعالدى، ەل سىبىردى قولعا الدى» دەگەندى بەكەر ايتقان جوق.» دەپ پرەزيدەنتىمىز قاسىم-جومارت كەمەلۇلى ءوزىنىڭ «اباي جانە ءححى عاسىرداعى قازاقستان» اتتى وزەكتى دە ونەگەلى ماقالاسىندا انىقتاپ ايتقانىنداي، مەن ءسىزدى مەملەكەتتىك جانە قوعامدىق ماڭىزى بار ماسەلەلەرگە قاتىستى شەشىم قابىلداعان كەزدە مەنىڭ ۇسىنىستارىم مەن تىلەكتەرىمدى ەسكەرۋگە شاقىرامىن. بۇل تەك ءبىرىنشى ۇسىنىس.
«كەلەلى كەڭەس جوعالدى، ەل سىبىردى قولعا الدى» دەپ اباي ايتقانداي، ەل اراسىندا ءبىر «سىبىردىڭ» بار ەكەنىن بىلەسىز. ءسىز سول «سىبىردى» توقتاتىپ، نۇكتە قويساڭىز. قازاقستان تەاتر قايراتكەرلەرى وداعىمەن قاتار قازاقستان تەاترلار اسسوتسياتسياسى نە ءۇشىن قاجەت ەكەندىگىن قازاقستاندىق تەاترالدار تۇسىنبەي وتىر. بۇل ءبىر سالانىڭ ماماندارىن ەكىگە ءبولىپ، ىنتىماعىن ىدىراتۋشىلىق ەمەس پە؟ ونىڭ ۇستىنە ءبىر مەملەكەتتە ءبىر تەاتر سالاسىنا قاتىستى ەكى ۇيىمنىڭ بولۋىنان ءبىز مەملەكەت رەتىندە نە ۇتپاقپىز؟ بىردە-ءبىر مەملەكەتتىڭ تاجىريبەسىندە بۇنداي ەكى جاققا بولىنۋشىلىك دەگەن اتىمەن جوق. سونىمەن قاتار، بۇلاي ءبىر تەاتر سالاسىن ەكىگە ءبولۋ ارقىلى مەملەكەت قارجىسىن ماعىناسىز جاراتۋعا، ىسىراپشىلدىققا جول بەرىلىپ وتىرعان جوق پا؟ ۇكىمەت قاراجاتىن ۇنەمدەپ جۇمساپ، كەرىسىنشە، تەاتر قايراتكەرلەرىن جاراستىراتىن جوبالاردى جاساپ كەلە جاتقان تاريحى تەرەڭ، تاجىريبەسى مول ءبىر عانا قازاقستان تەاتر قايراتكەرلەرى وداعىن قالدىرۋ كەرەك دەپ ەسەپتەيمىن. قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى، ونەرتانۋ كانديداتى، پروفەسسور تۇڭعىشباي قادىرۇلى 2009 جىلدىڭ قازان ايىنان باستاپ توراعا بولىپ تابىلاتىن قازاقستاننىڭ تەاتر قايراتكەرلەرى وداعىنا رەسپۋبليكامىزدىڭ بارلىق تەاترلارى ءبىراۋىزدان مۇشەلىككە قايتا وتۋلەرى كەرەك دەپ ويلايمىن.
ەگەر ءسىز مەنىڭ وسى ۇسىنىس-تىلەگىمدى قابىل الساڭىز، قازاقستاندىق تەاترالداردىڭ باسىم بولىگىنىڭ العىستارىنا بولەنىپ، بۇرىنعى مينيستر ارىستانبەك مۇحامەديۇلى كەزەڭىندە ورىن العان جاعدايعا كوز جۇما قاراماي، ادىلەتتى قوعام قالىپتاستىرۋعا ۇلەس قوسقان بولىپ سانالار ەدىڭىز. سول كەزدە ارىستانبەك مۇحامەديۇلىنىڭ جولىن جالعاستىرۋشى ەمەس ەكەندىگىڭىزدى، تەاتردىڭ جاناشىرى ەكەندىگىڭىزدى دالەلدەر ەدىڭىز. الدە، ءسىز دە قازاقستان تەاترلار اسسوتسياتسياسىنىڭ ۆيتسە-پرەزيدەنتى اسحات ماەميروۆ سەكىلدى ارىستانبەك مۇحامەديۇلىنا ادال جاقىن دوس، سەنىمدى سەرىك، مۇددەلەس پە ەدىڭىز؟
«قازاقستان تەاترلار اسسوتسياتسياسى» ۇيىمداستىرىپ كەلە جاتقان ««ساحناگەر» ۇلتتىق تەاتر سىيلىعى» تاقىرىبىنداعى جۇلدەنى ويلاپ تابۋدىڭ نە كەرەگى بولدى ەكەن نەمەسە كىمگە كەرەگى بولدى ەكەن؟ ارىستانبەك مۇحامەديۇلىنا اۋاداي قاجەت بولعان باستاماعا ۇقسايدى. تۇڭعىشباي جامانقۇلوۆتى جىعۋ ءۇشىن بە؟ قازاقستان تەاتر قايراتكەرلەرى وداعى ۇيىمداستىرۋىنداعى «ەڭلىكگۇل» دەپ اتالاتىن كەرەمەت ەسىمدى يەمدەنگەن سالماقتى سىيلىق بار ەمەس پە ەدى؟ سول سىيلىقتى قايتارۋ كەرەك دەپ سانايمىن. سەبەبى، «ساحناگەر» سىيلىعىن ۇلەستىرۋ ۇدەرىسىندە دە تەاترالداردى الالاۋشىلىق بار سەكىلدى كورىنبەيدى مە سىزگە؟ سىيلىققا ۇسىنىلۋشىلار مەن يە بولۋشىلاردىڭ كوبى قازاقستان تەاترلار اسسوتسياتسياسىنىڭ ۆيتسە-پرەزيدەنتى اسحات ماەميروۆتىڭ عانا جاقىندارى، شاكىرتتەرى جانە مۇددەلەستەرى. سوندا اسحات ماەميروۆپەن بىرگە ءبىر داستارقاندا باسى بىرىكپەگەندەر مەن ءبىر اسسوتسياتسيا قۇرامى قاتارىنا كىرمەگەندەردىڭ جايى نە بولماق؟ بۇل مينيسترلىك يميدجىنە كەرى اسەر ەتپەي مە؟ تالانتتار تۇنشىعىپ جاتقان جوق پا؟ مەملەكەت ءيميدجىن تومەندەتەتىن تىرلىك ەمەس پە؟ مەريتوكراتيالىق قاعيدالارعا قايشى قىلىق ەمەس پە؟
وسى جازعان ۇسىنىسىممەن كەلىسەتىندەردەن لايك باسۋدى، ءبولىسۋدى نەمەسە "قولدايمىن" دەپ جازبا قالدىرۋدى وتىنەمىن!
قۇرمەتپەن بالتابەك نۇرعاليەۆ
