2020 جىلعى 9 قاڭتاردا ساع. 11.00-دە قازاقستان رەسپۋبليكاسى مادەنيەت جانە سپورت مينيسترلىگىنە قاراستى قر ۇلتتىق كىتاپحاناسىنىڭ ن. داۋلەتوۆا اتىنداعى زالىندا «اتامۇرا» كورپوراتسياسىنىڭ ۇلتتىق كىتاپحانا قورىنا اسا باعالى ءارى قۇندى 1000 كىتابىن سىيعا تارتۋ راسىمى ءوتتى.
كىتاپحاناداعى توبەلى ءتوردىڭ تىزگىنىن قولىنا العان «زەينوللا سانىك اتىنداعى مادەنيەت قورىنىڭ» اتقارۋشى ديرەكتورى، ايتىسكەر اقىن سەرىك قاليەۆ بۇگىنگى القالى وتىرىستىڭ ءمان-ماعىناسىن ايتىپ، شارانىڭ ماڭىزدىلىعىن ءتۇسىندىرىپ ءوتتى. ۇلتتىق كىتاپحانا قورىنا باعالى سىيلىعىن اكەلىپ وتىرعان «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەد كورپوراتسيانىڭ بولاشاقتا دا قازاق دۇنيەتانىمىنا قىزمەت ەتە بەرەتىنىن اتاپ ءوتتى.
وتىرىستا ءسوز العان قابدەش ءجۇمادىلوۆ، دۋلات يسابەكوۆ، مۇرات اۋەزوۆ سىندى زيالى قاۋىم وكىلدەرى بۇل شارانىڭ بولاشاق ءۇشىن وتە ۇلكەن سىي ەكەنىن ايتتى.
ەل تاۋەلسىزدىگىنىڭ كوك تۋىن جەلبىرەتكەن جىلى-اق جاۋاپكەرشىلىگى شەكتەۋلى سەرىكتەستىك رەتىندە قۇرىلعان «اتامۇرا» باسپا كورپوراتسياسى ءوزىن تاۋەلسىزدىكتىڭ قۇرداسى دەپ سانايدى. ول شاعىن كاسىپورىننان باستاپ وقۋلىقتارمەن قاتار ەنتسيكلوپەديالىق جانە بالالارعا ارنالعان باسىلىمدار، انىقتامالىق، عىلىمي جانە عىلىمي-تانىمدىق ادەبيەتتەر، سوزدىكتەر، كوركەم پروزا مەن پوەزيا، كورنەكتى مەملەكەت جانە قوعام قايراتكەرلەرىنىڭ ەڭبەكتەرى مەن پوليگرافيالىق ءونىمنىڭ بارلىق تۇرلەرىن شىعاراتىن ۇلكەن كورپوراتسياعا دەيىنگى ءوسۋ جولىنان ءوتتى.
بۇگىنگە دەيىن «اتامۇرا» كورپوراتسياسى «اتىراۋ»، «قاراعاندى»، «ماڭعىستاۋ»، «اقمولا»، «استانا» سىندى ايماقتىق ەنتسيكلوپەديالارمەن بىرگە بەلگىلى قازاق عالىمدارىنىڭ، جانە قوعام قايراتكەرلەرىنىڭ ەڭبەكتەرىن ساپالى شىعارۋى وتاندىق كىتاپ مادەنيەتىنىڭ ءىرى جەتىستىگىنە اينالدى. ەلىمىزدىڭ تۇڭعىش پرەزيدەنتى، ەلباسى ن.ءا. نازارباەۆتىڭ قازاق جانە ورىس تىلدەرىندەگى «عاسىرلار توعىسىندا»، «تاريح تولقىنىندا»، «سىندارلى ون جىل»، «بەيبىتشىلىك كىندىگى»، «ەۋرازيا جۇرەگىندە» اتتى كىتاپتارى، «اتامۇرا» كىتاپحاناسى» سەرياسىمەن 150-دان استام اقىن-جازۋشىلاردىڭ تۋىندىلارى، سونىمەن قاتار بالالار ادەبيەتىن قولداۋ، ناسيحاتتاۋ ماقساتىندا «اتامۇرا» مەكتەپ كىتاپحاناسى» سەرياسىمەن بۇلدىرشىندەرگە ارنالعان قازاق جانە ورىس تىلدەرىندەگى كوركەم بەزەندىرىلگەن كىتاپتار، ەرتەگىلەر، مەكتەپ جاسىنداعى بالالارعا ارنالعان تانىمدىق كىتاپشالار باسىلىپ شىقتى.
كورپوراتسيا قازاقستان رەسپۋبليكاسى پرەزيدەنتىنىڭ «قۇرمەت» ديپلومىمەن ماراپاتتالدى. پاريجدە كورپوراتسياعا وندىرىسكە ىقپال ەتۋ اسسوتسياتسياسىنىڭ ء(Sرى) التىن مەدالىمەن، جەنەۆادا حالىقارالىق التىن جۇلدىزبەن، مالتادا «حرۋستال رىتسارى» ديپلومىمەن، «ەلىمىزدىڭ ۇزدىك باسپاسى «التىن جۇلدىزىمەن» ماراپاتتالدى. نيۋ-يورك (اقش) قالاسىندا حالىقارالىق «Quality Summit» پلاتينا سىيلىعىنا يە بولدى. «اتامۇرا» كورپوراتسياسى تمد ەلدەرى بويىنشا ماسكەۋ قالاسىندا وتكەن كىتاپ كورمەلەرىندە بىرنەشە رەت ارنايى ديپلومدارمەن ماراپاتتالدى.
"ادىرنا" ۇلتتىق پورتالى
