ساپارباەۆ: ء"ار بالاعا 20 مىڭ تەڭگە تولەۋ دۇرىس ەمەس"

2580
جۋرناليستەردىڭ سۇراقتارىنا جاۋاپ بەرىپ تۇرعان پرەمەر-ءمينيستردىڭ ورىنباسارى بەردىبەك ساپارباەۆ. نۇر-سۇلتان، 8 قاڭتار 2020 جىل.

8 قاڭتاردا پرەمەر-ءمينيستردىڭ ورىنباسارى بەردىبەك ساپارباەۆ جاردەماقىنىڭ جاڭاشا تولەنۋىنە بايلانىستى نارازىلىق بىلدىرگەن انالاردىڭ شاعىمىنا بايلانىستى جاۋاپ بەردى. وسى اپتا باسىندا نۇر-سۇلتاندا ءبىر توپ ايەل جاڭا جىلدان باستاپ، كوپ بالالى وتباسىنداعى ءار بالاعا بىلتىرعىداي - 21 مىڭ ەمەس، 10,5 مىڭ تەڭگەدەن تولەنىپ جاتقانىنا نارازىلىق ءبىلدىرىپ، مۇنداي جاردەماقىنىڭ قازىرگىدەي قىمباتشىلىق جاعدايدا ەشتەڭەگە جەتپەيتىنىن ايتقان.

- ءبىزدىڭ نەگىزگى ۇستانىمىمىز - بىرىنشىدەن، كوپ بالالى وتباسىلاردى قولداۋ. بەس بالاعا قانشا شىعىن كەتەتىنىن، ءبىر-ەكى بالاعا قانشا شىعىن كەتەتىنىن وزدەرىڭىز بىلەسىزدەر. بارلىعىنا 20 مىڭ تەڭگەدەن تولەۋ دەگەن دۇرىس ەمەس. سەبەبى، بىرىنشىدەن، وعان كەتەتىن قارجىنى ەسەپتەۋىمىز كەرەك. ەكىنشىسىن، جاڭا ايتىپ كەتتىم، ەڭ نەگىزگى ماسەلە مۇقتاج ادامدارعا بەرۋىمىز كەرەك، - دەدى بەردىبەك ساپارباەۆ.

پرەزيدەنت قاسىم-جومارت توقاەۆتىڭ "ماسىلدىق پەن مۇقتاجدىقتى اجىراتا ءبىلۋىمىز كەرەك" دەگەن ءسوزىن ەسكە سالعان ساپارباەۆ "قازاقستاندىقتاردى جۇمىسقا ۇيرەتۋىمىز كەرەك، اركىم ءوز وتباسىن ءوزى اسىراۋى كەرەك" دەدى.

بۇعان دەيىن ەڭبەك جانە حالىقتى الەۋمەتتىك قورعاۋ مينيسترلىگى 2020 جىلدىڭ 1 قاڭتاردان باستاپ كامەلەتكە تولماعان 4 جانە ودان دا كوپ بالالارى بار وتباسىلارعا جاردەماقى تاعايىندالعاندا وتباسىنىڭ تابىسىنا قارامايدى دەپ مالىمدەگەن. مينيسترلىكتىڭ ايتۋىنشا، 4 بالاعا - 42 496 تەڭگە، 5 بالاعا - 53127 تەڭگە، 6 بالاعا - 63 757 تەڭگە، 7 جانە ودان كوپ بالاعا - 74 388 تەڭگە بەرىلەدى. سونىمەن قاتار جاڭا جىلدان باستاپ "كەپىلدەندىرىلگەن الەۋمەتتىك توپتاما" بەرىلە باستايدى دەگەن.

6 قاڭتار كۇنگى جاعداي بويىنشا، 367 مىڭ وتباسىنا جاردەماقى تاعايىندالعان جانە 17 ميلليارد تەڭگە تولەنگەن.

6 قاڭتاردا جاردەماقىنىڭ جاڭاشا تولەنۋىنە نارازىلىق بىلدىرگەن ءبىر توپ ايەل جاردەماقىنىڭ مۇلدە ازايىپ كەتكەنىنە شاعىمدانىپ، ارەڭ كۇن كورىپ جاتقاندارىن ايتقان. ايەلدەردىڭ ايتۋىنشا، مىسالى بىلتىر 131 مىڭ تەڭگە العان كوپ بالالى انالار قاڭتار ايىندا 63 مىڭ تەڭگە عانا جاردەماقى العان.

"ازاتتىق" راديوسى
پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket