8 qańtarda premer-mınıstrdiń orynbasary Berdibek Saparbaev járdemaqynyń jańasha tólenýine baılanysty narazylyq bildirgen analardyń shaǵymyna baılanysty jaýap berdi. Osy apta basynda Nur-Sultanda bir top áıel jańa jyldan bastap, kóp balaly otbasyndaǵy ár balaǵa byltyrǵydaı - 21 myń emes, 10,5 myń teńgeden tólenip jatqanyna narazylyq bildirip, mundaı járdemaqynyń qazirgideı qymbatshylyq jaǵdaıda eshteńege jetpeıtinin aıtqan.
- Bizdiń negizgi ustanymymyz - birinshiden, kóp balaly otbasylardy qoldaý. Bes balaǵa qansha shyǵyn ketetinin, bir-eki balaǵa qansha shyǵyn ketetinin ózderińiz bilesizder. Barlyǵyna 20 myń teńgeden tóleý degen durys emes. Sebebi, birinshiden, oǵan ketetin qarjyny esepteýimiz kerek. Ekinshisin, jańa aıtyp kettim, eń negizgi másele muqtaj adamdarǵa berýimiz kerek, - dedi Berdibek Saparbaev.
Prezıdent Qasym-Jomart Toqaevtyń "masyldyq pen muqtajdyqty ajyrata bilýimiz kerek" degen sózin eske salǵan Saparbaev "qazaqstandyqtardy jumysqa úıretýimiz kerek, árkim óz otbasyn ózi asyraýy kerek" dedi.
Buǵan deıin eńbek jáne halyqty áleýmettik qorǵaý mınıstrligi 2020 jyldyń 1 qańtardan bastap kámeletke tolmaǵan 4 jáne odan da kóp balalary bar otbasylarǵa járdemaqy taǵaıyndalǵanda otbasynyń tabysyna qaramaıdy dep málimdegen. Mınıstrliktiń aıtýynsha, 4 balaǵa - 42 496 teńge, 5 balaǵa - 53127 teńge, 6 balaǵa - 63 757 teńge, 7 jáne odan kóp balaǵa - 74 388 teńge beriledi. Sonymen qatar jańa jyldan bastap "kepildendirilgen áleýmettik toptama" berile bastaıdy degen.
6 qańtar kúngi jaǵdaı boıynsha, 367 myń otbasyna járdemaqy taǵaıyndalǵan jáne 17 mıllıard teńge tólengen.
6 qańtarda járdemaqynyń jańasha tólenýine narazylyq bildirgen bir top áıel járdemaqynyń múlde azaıyp ketkenine shaǵymdanyp, áreń kún kórip jatqandaryn aıtqan. Áıelderdiń aıtýynsha, mysaly byltyr 131 myń teńge alǵan kóp balaly analar qańtar aıynda 63 myń teńge ǵana járdemaqy alǵan.
