مەملەكەت باسشىسى قاسىم-جومارت توقاەۆ پرەزيدەنت اكىمشىلىگى باسشىلىعىنىڭ، پرەمەر-ءمينيستردىڭ ورىنباسارىنىڭ، قاۋىپسىزدىك كەڭەسى حاتشىسىنىڭ، ۇلتتىق قاۋىپسىزدىك كوميتەتى توراعاسىنىڭ، سىرتقى ىستەر ءمينيسترىنىڭ، قورعانىس ءمينيسترىنىڭ، ىشكى ىستەر ءمينيسترىنىڭ جانە قارۋلى كۇشتەر باس شتابى باستىعىنىڭ قاتىسۋىمەن كەڭەس وتكىزدى.
سىرتقى ىستەر ءمينيسترى مۇحتار تىلەۋبەردى مەن باسقا دا مەملەكەتتىك ورگانداردىڭ باسشىلارى تاياۋ شىعىستاعى قازىرگى احۋال تۋرالى باياندادى.
قازاقستان پرەزيدەنتى پارسى شىعاناعى ايماعىنداعى احۋالدىڭ كۇرت شيەلەنىسۋىنە الاڭداۋشىلىق ءبىلدىرىپ، اتالعان ءىس-قيمىلدارعا قاتىسۋشى تاراپتاردىڭ بارىنشا ۇستامدىلىق تانىتۋى قاجەتتىگىن ايتىپ، قاقتىعىستاردى ديپلوماتيالىق ءادىس-تاسىلدەرمەن، ەڭ الدىمەن، بۇل ىسكە بۇۇ ارالاستىرا وتىرىپ، سونداي-اق ەكىجاقتى بايلانىستار مەن كەلىسسوزدەر ارقىلى رەتتەۋ مۇمكىن ەكەنىن اتاپ ءوتتى.
كەڭەس قورىتىندىسى بويىنشا مەملەكەت باسشىسى قازاقستاننىڭ تاياۋ شىعىستاعى ەلشىلىكتەرى مەن ونداعى قىزمەتكەرلەردىڭ قاۋىپسىزدىگىن قامتاماسىز ەتۋدى، ەلىمىزدەگى شەتەلدىك ديپلوماتيالىق وكىلدىكتەر مەن كومپانيالار كەڭسەلەرىنىڭ قاۋىپسىزدىگىن ساقتاۋ ءۇشىن شارالار قابىلداۋدى، مەملەكەتىمىزدىڭ ۇلتتىق مۇددەسىنە قاتىستى ماڭىزدى اقپاراتتاردى الۋ جانە تالداۋ جۇمىستارىن كۇشەيتۋدى تاپسىردى. حالىقارالىق احۋالدىڭ شيەلەنىسۋى جاعدايىندا قازاقستاننىڭ الەۋمەتتىك-ەكونوميكالىق دامۋ جانە قورعانىس الەۋەتىن كۇشەيتۋ ماسەلەلەرىنە ەرەكشە كوڭىل بولىنەدى.
ەستەرىڭىزگە سالا كەتسەك، 3 قاڭتاردا اقش باعدادتاعى حالىقارالىق اۋەجاي اۋماعىندا ارنايى وپەراتسيا جۇرگىزىپ، يراندىق گەنەرال سۋلەيماني مەن يراك شەيىتتەر جاساعىنىڭ باسشىسى ءابۋ ماحدي ءال-ءمۋحانديستى ءولتىردى.
ۆاشينگتوننىڭ مالىمدەۋىنشە، ولار وتكەن جىلدىڭ 31 جەلتوقسانىندا باعدادتاعى اقش ەلشىلىگىنە شابۋىل ۇيىمداستىرعان.
تەگەران "سۇلەيمانيدى ولتىرگەن اقش-تان كەك الاتىنىن» مالىمدەگەن. اقش پرەزيدەنتى دونالد ترامپ تا «تەگەران شابۋىل جاساسا، اقش-تىڭ دا قاراپ قالمايتىنىن" ايتقان بولاتىن.
ال، بۇگىن يران اقش اسكەريلەرى مەن كواليتسيا كۇشتەرى شوعىرلانعان يراكتاعى بىرنەشە نىساندى ونداعان زىمىرانمەن اتقىلادى، ولاردىڭ اراسىندا يراكتىڭ باتىسىنداعى ءال-اساد جانە ەربيلدەگى بازا دا بار.
"ادىرنا" ۇلتتىق پورتالى
