AQSh & Iran qaqtyǵysy: Aqordada shuǵyl keńes

3491
Adyrna.kz Telegram
Memleket basshysy Parsy shyǵanaǵy aımaǵyndaǵy ahýalǵa baılanysty keńes ótkizdi. Bul týraly Aqorda habarlaıdy.

Memleket basshysy Qasym-Jomart Toqaev Prezıdent Ákimshiligi basshylyǵynyń, Premer-Mınıstrdiń orynbasarynyń, Qaýipsizdik Keńesi hatshysynyń, Ulttyq qaýipsizdik komıteti tóraǵasynyń, Syrtqy ister mınıstriniń, Qorǵanys mınıstriniń, Ishki ister mınıstriniń jáne Qarýly Kúshter Bas shtaby bastyǵynyń qatysýymen keńes ótkizdi.

Syrtqy ister mınıstri Muhtar Tileýberdi men basqa da memlekettik organdardyń basshylary Taıaý Shyǵystaǵy qazirgi ahýal týraly baıandady.

Qazaqstan Prezıdenti Parsy shyǵanaǵy aımaǵyndaǵy ahýaldyń kúrt shıelenisýine alańdaýshylyq bildirip, atalǵan is-qımyldarǵa qatysýshy taraptardyń barynsha ustamdylyq tanytýy qajettigin aıtyp, qaqtyǵystardy dıplomatııalyq ádis-tásildermen, eń aldymen, bul iske BUU aralastyra otyryp, sondaı-aq ekijaqty baılanystar men kelissózder arqyly retteý múmkin ekenin atap ótti.

Keńes qorytyndysy boıynsha Memleket basshysy Qazaqstannyń Taıaý Shyǵystaǵy elshilikteri men ondaǵy qyzmetkerlerdiń qaýipsizdigin qamtamasyz etýdi, elimizdegi sheteldik dıplomatııalyq ókildikter men kompanııalar keńseleriniń qaýipsizdigin saqtaý úshin sharalar qabyldaýdy, memleketimizdiń ulttyq múddesine qatysty mańyzdy aqparattardy alý jáne taldaý jumystaryn kúsheıtýdi tapsyrdy. Halyqaralyq ahýaldyń shıelenisýi jaǵdaıynda Qazaqstannyń áleýmettik-ekonomıkalyq damý jáne qorǵanys áleýetin kúsheıtý máselelerine erekshe kóńil bólinedi.

Esterińizge sala ketsek, 3 qańtarda AQSh Baǵdadtaǵy halyqaralyq áýejaı aýmaǵynda arnaıy operaııa júrgizip, ırandyq general Sýleımanı men ırak sheıitter jasaǵynyń basshysy Ábý Mahdı ál-Mýhandısti óltirdi.

Vashıngtonnyń málimdeýinshe, olar ótken jyldyń 31 jeltoqsanynda Baǵdadtaǵy AQSh elshiligine shabýyl uıymdastyrǵan.

Tegeran "Súleımanıdi óltirgen AQSh-tan kek alatynyn»  málimdegen. AQSh prezıdenti Donald Tramp ta «Tegeran shabýyl jasasa, AQSh-tyń da qarap qalmaıtynyn" aıtqan bolatyn.

Al, búgin Iran AQSh áskerıleri men koalıııa kúshteri shoǵyrlanǵan Iraktaǵy birneshe nysandy ondaǵan zymyranmen atqylady, olardyń arasynda Iraktyń batysyndaǵy ál-Asad jáne Erbıldegi baza da bar.

"Adyrna" ulttyq portaly

Pikirler