تۇركىستان وبلىسى، سارىاعاش اۋدانى، №53 م. عابدۋللين اتىنداعى جالپى ءبىلىم بەرەتىن مەكتەپ قابىرعاسىندا جەلتوقساننىڭ جيىرما بەسىنشى جۇلدىزىندا اۋداندىق، وبلىستىق، رەسپۋبليكالىق، حالىقارالىق بايقاۋلاردىڭ جەڭىمپازى، "ەل ءۇمىتى" سىيلىعىنىڭ يەگەرى، 11-سىنىپ وقۋشىسى ماليكاجداروۆا التىناي باۋىرجانقىزىنىڭ "بالاپان جىر، بالعىن ويلار" اتتى العاشقى كىتابىنىڭ تۇساۋكەسەرى ءوتتى. سارىاعاش جاستار رەسۋرستىق ورتالىعى جانە مەكتەپ اكىمشىلىگىنىڭ قولداۋىمەن وتكەن ۇلكەن ءىس-شاراعا بەلگىلى اقىن، ارداگەر ۇستاز زۇپار سمايلوۆ، جۋرناليستەر وداعىنىڭ مۇشەسى، "سارىاعاش" گازەتىنىڭ باس رەداكتورى مۇرات بەكەي، ء"ساتتى" گازەتىنىڭ باس رەداكتورى جاقان ەسەنبەكوۆ، سارىاعاش اۋداندىق سوت توراعاسى تاسبولات ماشراپوۆ، سارىاعاش اۋداندىق جاستار رەسۋرستىق ورتالىعىنىڭ باسشىسى قانات يماتوۆ، "تۆك", "وتىرار" وبلىستىق تەلەارناسىنىڭ تەلەجۇرگىزۋشىسى نۇرزينا تورەحان، جىبەك جولى اۋىلدىق وكرۋگى اكىمىنىڭ ورىنباسارى ءالايدار ءامىرحانوۆ، قر توعىزقۇمالاق ويىندارىنىڭ چەمپيونى لەس ءاشىموۆ جانە مەكتەپ ديرەكتورى ڭۇرلان سلاموۆ سىندى ەل اعالارى قاتىسىپ، كەش شىمىلدىعىن اشىپ، التىنايعا جىلى تىلەكتەرىن ءبىلدىردى. جىر سۇيەر قاۋىمدى ليريكالىق، پاتريوتتىق ولەڭدەرمەن سۋسىنداتقان كەشتە اۋداندىق سوت تورەاعاسى تاسبولات ماشراپوۆ جاس تا بولسا، تەرەڭ وي قوزعاي بىلگەن التىنايدىڭ قۇندى كىتابىمەن قۇتتىقتاپ، ىقىلاس گۇلىن تابىستادى. اۋداندىق جاستار رەسۋرستىق ورتالىعىنىڭ باسشىسى ورتالىق اتىنان جانە اۋداندىق ىشكى ساياسات باسقارماسىنىڭ اتىنان العىس حاتپەن ماراپاتتاپ، شىعارماشىلىعىنا ساتتىلىك تىلەپ، اقىن زۇپار سمايلوۆ اق باتاسىن بەردى. اتالمىش ءىس-شاراعا اۆتوردىڭ تانىمال دوستارى دا اننەن شاشۋ شاشتى. پاريج قالاسىندا وتكەن "بالالار الەم ىرعاعىندا" حالىقارالىق بايقاۋىندا ديماش قۇدايبەرگەنمەن ەل نامىسىن قورعاعان ايگەرىم تەمىربەكوۆا كورەرمەندەردى بۇلبۇل داۋىسىمەن ءتانتى ەتتى. سونىمەن قاتار، التىناي باۋىرجانقىزىنىڭ جاۋقازىن جىرلارىن مەكتەبىمىزدىڭ بەلسەندى وقۋشىلارى ساحنالىق قويىلىم ارقىلى كورەرمەنگە ۇسىندى. كەش سوڭىندا اۆتور كىتابى وقىرماندارعا تاراتىلدى. ايتا كەتەيىك، اۆتوردىڭ شىعارماشىلىق جولىنداعى اعا-اپكەلەرى مەن دوستارىنىڭ سوناۋ شاقىرىمنان جولداعان قۇتتىقتاۋ ۆيدەولارىن كورەرمەندەر قىزىعا تاماشالادى. يرينا تەن، مەيىرجان الىبەكۇلى، دانەليا تولەشوۆا، زارينا نۇرجانوۆا سىندى ت.ب تانىمال جۋرناليستەر مەن جۇلدىزدار ۆيدەو سالەمدەمە ارقىلى قۇتتىقتاۋ تىلەكتەرىن جاۋدىردى.
جاقىندا التىناي باۋىرجانقىزى رەسپۋبليكالىق بالالار مەن جاسوسپىرىمدەرگە ارنالعان «ۇلان» گازەتىنىڭ جاس ءتىلشىسى اتاندى. «ەندىگى جۋرناليستيكانىڭ جايى نە بولماق؟»، «جامال وماروۆانىڭ جيەنى وپەرا جۇلدىزى»، «الەم جاستارىنىڭ مۇمكىندىگى تەڭ»، «مۇرات اۋەزوۆتىڭ جيەنىنە شاقىرتۋ الدىم» سىندى ماقالالارى وقىلىمدى بولىپ، كوپشىلىكتىڭ كوڭىلىنەن شىقتى. سۇلۋلىق پەن نازىكتىكتى جانى سۇيەتىن جاس اقىندى قۋانىشىمەن قۇتتىقتاي وتىرىپ، قازاق جۋرناليستيكاسىنىڭ دامۋىنا جول سالاتىن مىقتى مامان بولۋىنا تىلەكشىمىز.
ايسۇلۋ سەزحان
اباي اتىنداعى ورتا
مەكتەپ-گيمنازياسىنىڭ
11-سىنىپ وقۋشىسى.
