كەشە پاۆلودار قالاسىندا وبلىس اكىمىنىڭ جاڭا جىلدىق كەشى ءوتتى. قالاداعى تانىمال "ەرتىس" قوناق ءۇيىنىڭ رەستورانىندا وتكەن اكىمنىڭ بالى بۇكىل قازاقستاندى ءبىر شۋلاتىپ قويدى. قاي اكىم توي تويلاماي جاتىر دەرسىز، بىراق تا اكىمنىڭ سۋرەتى وسى كەشتە 31 ميلليون تەڭگەگە ساتىلدى. وڭىردەگى كىلەڭ قالتالى باي-باعلان قاتىسقان شارانى تانىمال شوۋمەندەر تۇرسىنبەك قاباتوۆ پەن ياروسلاۆ مەلەحين جۇرگىزگەن. قايرات نۇرتاس ءان شىرقاعان بۇل كەشتىڭ ءباسى دە بيىك بولعانى ءسوزسىز.
[video width="848" height="480" mp4="https://adyrna.kz/content/uploads/2019/12/whatsapp-video-2019-12-26-at-14.17.22-1.mp4"][/video]
وسى كەشكە "قاتىسقان" (دۇرىسى قاتىستىرىلعان) ءار كاسىپكەر 25 مىڭ تەڭگەگە بيلەت العان. سونداي-اق كەش بارىسىندا اۋكتسيون بولاتىنىن، وعان دا قاتىسۋ كەرەكتىگى ايتىلعان دەيدى كەشتە بولعاندار. اكىمنىڭ سۋرەتىنەن بولەك، وسى جەردەن شىققان تانىمال تۇلعالاردىڭ دا كارتيناسى ساتىلىپتى. مىسالى، اكىمنىڭ كارتيناسى 31 ميلليونعا ساتىلعان كەشتە سۇلتانماحمۇت تورايعىروۆتىڭ سۋرەتى 1 ميلليون 300 مىڭعا ساتىلعان.
الەۋمەتتىك جەلىنى شۋلاتقان بۇل كەش قايىرىمدىلىق شاراسىنا ارنالىپتى دەگەن اقپارات تارادى. وبلىس اكىمىنىڭ ءباسپاسوز قىزمەتى بۇل اۋكتسيون تۋرالى بىلاي دەپ جاۋاپ بەرىپتى.
"لوتتاردى سۋرەتشىلەر ۇسىنادى. 20-عا جۋىق سۋرەت، "ەرتىس" كومانداسىنىڭ قولتاڭباسى بار فۋتبول دوبى، اعاشتان جاسالعان شوقپار. جالپى سوماسى 52,2 ميلليون تەڭگە، ونىڭ ىشىندە 30 ميلليون تەڭگەسى كارتينالار ءۇشىن", - دەدى ايماق اكىمىنىڭ ءباسپاسوز حاتشىسى ەرنار سەيتاحمەت.
ءباسپاسوز حاتشىسىنىڭ ايتۋىنشا اۋعان سوعىسى ارداگەرلەرى سىيلاعان اكىمنىڭ پورترەتى قويىلعانىن راستادى. اڭگىمەنىڭ تامىزدىعى بولعان 31 ميلليون تەڭگەگە اكىمنىڭ پورترەتىن ساتۋ تۋرالى اقپاراتتى راستامادى.
"بۇل سۋرەت ءۇشىن، مەنىڭ ويىمشا، 700 مىڭ تەڭگە. بۇل ءازىل", - دەپ مالىمدەگەن ول پورترەتتىڭ كىمگە ساتىلعانىن بىلمەيتىنىن ايتتى.
بىراق تا، پورترەتتى ساتىپ العان، "ازا" فيرماسىنىڭ يەسى، قالالىق ءماسليحاتتىڭ دەپۋتاتى گنەل اكوپيان ول كارتينانى 31 ميلليون تەڭگەگە ساتىپ العانىن راستادى.
[video width="848" height="480" mp4="https://adyrna.kz/content/uploads/2019/12/whatsapp-video-2019-12-26-at-14.17.22.mp4"][/video]
"كارتينانى مەن ساتىپ الدىم. بۇل قاراجات مۇگەدەكتەرگە كومەك رەتىندە جۇمسالادى. ونىڭ كىمنىڭ پورترەتى ەكەنى قانشالىقتى ماڭىزدى", - دەيدى گنەل اكوپيان.
بىلەتىندەر، وبلىستاعى سۇبەلى تەندەرلەر وسى اكوپيان باسقاراتىن فيرماعا تيەسىلى دەيدى. سوندىقتان مايلى جىلىك ۇسىنىپ وتىرعان باسشىنىڭ سۋرەتىن 310 ميلليونعا دا ساتىپ الادى دەيدى.
اكىمدىكتىڭ مالىمەتى بويىنشا، اكتسيونەردەن تۇسكەن بارلىق قاراجات قازاق سوقىرلار قوعامىنىڭ وقۋ-وندىرىستىك كاسىپورنىنا جىبەرىلەدى، ولار اكىمگە قولداۋ كورسەتۋ جونىندە بىرنەشە رەت ءوتىنىش بىلدىرگەن.
"ادىرنا" ۇلتتىق پورتالى
