Keshe Pavlodar qalasynda oblys ákiminiń Jańa jyldyq keshi ótti. Qaladaǵy tanymal "Ertis" qonaq úıiniń restoranynda ótken ákimniń baly búkil Qazaqstandy bir shýlatyp qoıdy. Qaı ákim toı toılamaı jatyr dersiz, biraq ta ákimniń sýreti osy keshte 31 mıllıon teńgege satyldy. Óńirdegi kileń qaltaly baı-baǵlan qatysqan sharany tanymal shoýmender Tursynbek Qabatov pen Iaroslav Melehın júrgizgen. Qaırat Nurtas án shyrqaǵan bul keshtiń bási de bıik bolǵany sózsiz.
[video width="848" height="480" mp4="https://adyrna.kz/content/uploads/2019/12/whatsapp-video-2019-12-26-at-14.17.22-1.mp4"][/video]
Osy keshke "qatysqan" (durysy qatystyrylǵan) ár kásipker 25 myń teńgege bılet alǵan. Sondaı-aq kesh barysynda aýkıon bolatynyn, oǵan da qatysý kerektigi aıtylǵan deıdi keshte bolǵandar. Ákimniń sýretinen bólek, osy jerden shyqqan tanymal tulǵalardyń da kartınasy satylypty. Mysaly, ákimniń kartınasy 31 mıllıonǵa satylǵan keshte Sultanmahmut Toraıǵyrovtyń sýreti 1 mıllıon 300 myńǵa satylǵan.
Áleýmettik jelini shýlatqan bul kesh qaıyrymdylyq sharasyna arnalypty degen aqparat tarady. Oblys ákiminiń baspasóz qyzmeti bul aýkıon týraly bylaı dep jaýap beripti.
"Lottardy sýretshiler usynady. 20-ǵa jýyq sýret, "Ertis" komandasynyń qoltańbasy bar fýtbol doby, aǵashtan jasalǵan shoqpar. Jalpy somasy 52,2 mıllıon teńge, onyń ishinde 30 mıllıon teńgesi kartınalar úshin", - dedi aımaq ákiminiń baspasóz hatshysy Ernar Seıtahmet.
Baspasóz hatshysynyń aıtýynsha Aýǵan soǵysy ardagerleri syılaǵan ákimniń portreti qoıylǵanyn rastady. Áńgimeniń tamyzdyǵy bolǵan 31 mıllıon teńgege ákimniń portretin satý týraly aqparatty rastamady.
"Bul sýret úshin, meniń oıymsha, 700 myń teńge. Bul ázil", - dep málimdegen ol portrettiń kimge satylǵanyn bilmeıtinin aıtty.
Biraq ta, portretti satyp alǵan, "AZA" fırmasynyń ıesi, qalalyq máslıhattyń depýtaty Gnel Akopıan ol kartınany 31 mıllıon teńgege satyp alǵanyn rastady.
[video width="848" height="480" mp4="https://adyrna.kz/content/uploads/2019/12/whatsapp-video-2019-12-26-at-14.17.22.mp4"][/video]
"Kartınany men satyp aldym. Bul qarajat múgedekterge kómek retinde jumsalady. Onyń kimniń portreti ekeni qanshalyqty mańyzdy", - deıdi Gnel Akopıan.
Biletinder, oblystaǵy súbeli tenderler osy Akopıan basqaratyn fırmaǵa tıesili deıdi. Sondyqtan maıly jilik usynyp otyrǵan basshynyń sýretin 310 mıllıonǵa da satyp alady deıdi.
Ákimdiktiń málimeti boıynsha, akıonerden túsken barlyq qarajat Qazaq soqyrlar qoǵamynyń oqý-óndiristik kásipornyna jiberiledi, olar ákimge qoldaý kórsetý jóninde birneshe ret ótinish bildirgen.
"Adyrna" ulttyq portaly
