جامبىل وبلىسىنىڭ 80 جىلدىعىنا ارنالىپ اشىلعان رۋحاني نىسانداردىڭ كوشىن ا.توقپانوۆتىڭ ەسكەرتكىشى باستادى. وبلىستىق قازاق دراما تەاترىنىڭ نەگىزىن قالاپ، ونداعى شىعارماشىلىق ۇجىمىنىڭ كاسىبي بىلىكتىلىگىن جەتىلدىرۋگە ءوز قولتاڭباسىن قالدىرعان رەجيسسەردىڭ ءمۇسىنى ونەر ورداسىنىڭ الدىنا قويىلدى.
ەسكەرتكىشتىڭ لەنتاسىن كسرو جانە قازاقستاننىڭ حالىق ءارتىسى، قازاقستاننىڭ ەڭبەك ەرى ءاسانالى ءاشىموۆ پەن قازاقستان تەاتر قايراتكەرلەرى وداعىنىڭ توراعاسى، اسقار توقپانوۆتىڭ شاكىرتى، قازاقستاننىڭ حالىق ءارتىسى تۇڭعىشباي جامانقۇلوۆ قيدى. ولار تۇلعا تۋرالى ەستى ەستەلىكتەرى مەن تاعىلىمدى ويلارىن ورتاعا سالىپ، ا.توقپانوۆتىڭ ەسكەرتكىشىنىڭ وبلىستىق تەاتر الدىنان اشىلىپ وتىرعانىن وتە ورىندى شەشىم بولعانىن باسا ايتتى.
سونداي-اق شارا بارىسىندا ا.توقپانوۆتىڭ ءومىرى مەن شىعارماشىلىعى جونىندەگى «توقپانوۆ تۇلعاسى» اتتى ەستەلىك كىتاپتىڭ تۇساۋكەسەر ءراسىمى ءوتتى. قوناقتار ءۇشىن ا.توقپانوۆتىڭ قىزمەت جولى، ەڭبەكتەرى، ناگرادالارى، شاكىرتتەرى جايلى فوتوستەند ۇيىمداستىرىلىپ، تۇلعا تۋرالى دەرەكتى فيلم كورسەتىلدى.
ايتا كەتەيىك، بۇگىندە جامبىل وبلىستىق قازاق دراما تەاترىنا قازاقتىڭ تۇڭعىش كاسىبي رەجيسسەرى، حالىق ءارتىسى اسقار توقپانوۆتىڭ ەسىمىن بەرۋ بويىنشا ءتيىستى جۇمىستار جۇرگىزىلۋدە. رەسپۋبليكالىق ونوماستيكالىق كوميسسيادان قولداۋ تاپقان بۇل ۇسىنىس بويىنشا قازىر ۇكىمەت قاۋلىسىنىڭ جوباسى دايىندالۋدا.
وبلىس تەاترىنا تۇلعانىڭ ەسىمىن بەرۋ - ونەرسۇيەر قاۋىمنىڭ كوپتەن بەرگى ارمان-تىلەگى بولاتىن. ويتكەنى قازاق ونەرىنىڭ دامۋىنا ولشەۋسىز ۇلەس قوسقان تۇلعا ءوز ەڭبەك جولىندا جامبىل وبلىستىق قازاق تەاترىندا دا ەلەۋلى ەڭبەك ەتكەن. كوپتەگەن قويىلىمدار ساحنالاپ، شاكىرتتەر تاربيەلەگەن.
بۇل ۇسىنىستى وسىدان 10-15 جىل بۇرىن ءاسانالى ءاشىموۆ، ءسابيت ورازباەۆ، تۇڭعىشباي جامانقۇلوۆ سەكىلدى تەاتر ساڭلاقتارى كوتەرىپ، ۇسىنىس حات جازعانىمەن، جاۋاپسىز قالعان ەدى. وبلىس اكىمى اسقار يسابەكۇلى وسى ماسەلەنى ۇكىمەت، مادەنيەت مينيسترلىگى دەڭگەيىندە كوتەرىپ، يگى باستاما ءوز شەشىمىن تابۋدا.
ا. توقپانوۆ ەسىمى بۇعان دەيىن ەلىمىزدە ەشقانداي تەاتر مەن ونەر ۇجىمىنا بەرىلمەگەن. ال 1936 جىلى قۇرىلعان وبلىستىق قازاق دراما تەاترى وسى جىلدار بويى بىردە-ءبىر تۇلعانىڭ اتىمەن اتالماعان. وسى تۇرعىدان العاندا بۇل باستاما كوپشىلىكتەن زور قولداۋ تابۋدا.
تەاتر رەجيسسەرىنىڭ ءمۇسىنىن بەلگىلى ءمۇسىنشى مومىش سۇلتان جاساپ شىقتى. ونىڭ قۇرىلىسىنا تانىمال مەتسەنات «Super pharm» جاۋاپكەرشىلىگى شەكتەۋلى سەرىكتەستىگىنىڭ ديرەكتورى قايرات قايمولداەۆ دەمەۋشىلىك ەتكەن.
«ادىرنا»
ۇلتتىق پورتالى
