(نەمەسە «گارانتيا» فيلمىنەن كەيىنگى وي)
سوڭعى كەزدەرى كينو ءتۇسىرۋ جەكە بيزنەسكە اينالىپ كەتتى. رەجيسسەرلەر كينونى ەل قامى ءۇشىن تۇسىرمەي، قالاي جاقسى پايدا تابام دەپ، قالاي رەيتينگتى ارتتىرام دەپ باس قاتىرادى. سوعان قاراماستان، ءوز كورەرمەندەرىنە ءتالىم-تاربيە بەرىپ، قازىرگى زاماننىڭ دەرتىنە اينالعان ماسەلەلەردى قوزعاۋدى ماقسات تۇتاتىن رەجيسسەرلەردىڭ بار ەكەنىنە كوزىم جەتتى. تۇركىستان وبلىسىنىڭ «جاستار رەسۋرستىق ورتالىعى» جىل سايىن جاستارعا ارنالعان ۇلگى-ونەگەلىك، تاربيەلىك ءمانى بار فيلمدەردى كورەرمەندەردىڭ نازارىنا ۇسىنۋدا. جاستاردى كينو ارقىلى تاربيەلەپ جۇرگەن رەجيسسەرلەردىڭ ءبىرى سەرىك تالاسوۆتىڭ «گارانتيا» ءفيلمى كورەرمەندەردى تەبىرەنتىپ، كوڭىلدەرىنە تەرەڭ وي سالدى. سەرىك تالاسوۆ 2013 جىلى «جاڭعىرىق» اتتى فيلمىمەن كوپشىلىككە تانىلعان ەدى. قازىرگى تاڭدا «جانۇيا»، «بويجەتكەن»، «حەللوۋ اۋىل» فيلمدەرى مەن «بارىڭدى باعالا!»، «ءاميان»، «بايلىق»، «وتەلمەس بورىش»، «ۇستاز» سىندى قىسقا مەتراجدى كينوتۋىندىلارى كوپشىلىكتىڭ ىقىلاسىنا بولەنۋدە. سەرىك تالاسوۆتىڭ «گارانتيا» ءفيلمىنىڭ باستى ارتىقشىلىعى – كينو تازا قازاق تىلىندە تۇسىرىلگەن. ارينە، اراسىندا بىرەڭ-ساراڭ جاستاردىڭ قولدانىپ جۇرگەن جارگون سوزدەرى مەن «ارزىمايدى» دەگەن ديالەكت ءسوز، ورىس تىلىندەگى سوزدەر كەزدەسىپ قالادى. بالكىم، جاستارعا ارنالعان فيلم بولعاندىقتان سولاي ادەيى كىرىستىردى مە ەكەن؟ رەجيسسەردىڭ ايتۋىنشا، فيلم تۇسىرۋگە مەملەكەتتەن قوماقتى قارجى بولىنبەگەندىكتەن، قيىندىقتار كوپ تۋىندايدى. مىسالى، «اليمەنت» قىسقا مەتراجدى ءفيلمىن تۇسىرۋدە ستسەناريست بولماعان، ال ەڭ العاشقى «جاڭعىرىق» ءفيلمىن ءتۇسىرۋ ءۇشىن بار بولعانى 230 مىڭ تەڭگە جۇمسالعان ەكەن. قارجى جەتىسپەسە دە، كينو تۇسىرۋدە رەجيسسەردىڭ ىزدەنىسى مەن ەڭبەگىنە، اقىلدىلىعىنا ءتانتىمىن.
«گارانتيا» ءفيلمى – تاربيەلىك ءمانى زور، كوپشىلىككە جەتكىزەر ويى تەرەڭ كوركەم كينوتۋىندى. فيلمدە وزەكتى پروبلەمالار قوزعالىپ، الەۋمەتتىك ماسەلەلەر قامتىلعان. فيلم باقىتسىزدىققا دۋشار بولعان، بەرەكەسى مەن قۇتى قاشقان وتباسى جايلى. باستى ماسەلە – ەنە مەن كەلىننىڭ اراسىنداعى قارىم-قاتىناس، كۇندەلىكتى ۇرىس-كەرىس، تۇسىنىسپەۋشىلىك. اكەنىڭ جارى مەن اناسىنىڭ قارىم-قاتىناسى، بالاسىنىڭ تاربيەسىنە نەمقۇرايلى قاراۋى. وتباسىن سۇتتەي ۇيىتىپ، ءۇيدىڭ ىرىزدىعىن كەلتىرەتىن انا ەمەس پە؟ ەنە مەن كەلىننىڭ اراسىنداعى سىيلاستىق، سۇيىسپەنشىلىك وتباسىنىڭ بارلىق مۇشەسىنىڭ كوڭىل-كۇيىنە اسەر بەرەدى. فيلم مۇنىمەن قاتار، ەلىمىزدەگى ماسەلەنىڭ بارلىعى پارا ارقىلى شەشىمىن تاۋىپ جاتقاندىعىن دا باتىل بەينەلەيدى. باستى رولدەردى سافاراليەۆا ۇلجالعاس، سارىپبەكوۆا ءجاۋدىر، نۇرمان رۋسلان، وماروۆ ولجاس، قالىباەۆ عالىمجان جانە تانىمال جايدارمانشى ۇلان مامىربەكۇلى سومدايدى. ۇلان مامىربەكۇلى فيلمدە دە ءوزىنىڭ بەينەسىنە ۇقساس كوڭىلدى، اشىق-جارقىن، ازىلكەش «ۇلان» اتتى كەيىپكەردىڭ ءرولىن وينايدى. سەرىك تالاسوۆتىڭ ءاربىر تۋىندىسى كورەرمەن ءۇشىن قىمبات، قازىرگى زاماندا جاستاردىڭ تاربيەسى جايلى فيلمدەر اۋاداي قاجەت ەكەنى – ۋاقىتتىڭ ۇشقىر تالابى. «گارانتيا» ءفيلمى ارقىلى وتباسىنىڭ باقىتتى بولۋى ءۇشىن ءاربىر وتباسى مۇشەسى جاۋاپكەرشىلىكتى ءوز موينىنا الىپ، جۇمىلا كۇرەسۋى كەرەك، ءبىر-بىرىنە قولداۋ كورسەتىپ، قيىن ساتتەردە ءبىرىن-ءبىرى قولتىعىنان دەمەپ، تۇسىنە ءبىلۋى قاجەت ەكەنىن ۇقتىم. سەرىك تالاسوۆتىڭ شىعارماشىلىق جۇمىسىنا ساتتىلىك تىلەپ، جاڭا تۋىندىلارىنىڭ جارىق كورۋىن اسىعا كۇتەمىن. مەملەكەت سەرىك تالاسوۆ سىندى رەجيسسەرلەرگە ۇلكەن سەنىم ارتىپ، قوماقتى قاراجات بولسە، ول كىسىنىڭ ەش وكىنبەيتىندەي قۇندى دۇنيەلەردى كورەرمەندەرگە تارتۋ ەتەتىنىنە كوزىم ابدەن جەتەدى.
ايسۇلۋ سەزحان،
اباي اتىنداعى ورتا
مەكتەپ-گيمنازياسىنىڭ
11-سىنىپ وقۋشىسى.
عىلىمي جەتەكشىسى: جيدەگۇل ابدىجادىلقىزى
