قوستاناي وبلىسىندا اكەسىن ولتىرگەن ايەل قىلمىستىق جاۋاپكەرشىلىكتەن بوساتىلدى

قوستاناي وبلىسىندا التىنسارين اۋىلىنىڭ تۇرعىنى اناتولي تيحونەنكونىڭ ولىمىنە قاتىستى سوت ۇكىمى شىقتى، دەپ حابارلايدى Alau.kz پورتالى.

49 جاستاعى لاريسا پۋريك التىنسارين اۋىلىندا ناۋقاس اكەسى اناتولي تيحونەنكومەن بىرگە تۇرعان.

لاريسا پسيحيكالىق اۋرۋىنا بايلانىستى ەكىنشى توپتاعى مۇگەدەك ەسەبىندە بولعان. سوعان قاراماستان پۋريك اكەسىنە كۇتىم جاساپ ءجۇرىپتى. الايدا وسى جىلدىڭ 12 مامىرىندا تيحونەنكو قايتىس بولدى.

كەيىن وسى اۋىلدا تۇراتىن تيحونەنكونىڭ ەكى قىزى ۇيگە كەلىپ، وقيعا ورنىنا جەرگىلىكتى ۋچاسكەلىك ينسپەكتور مەن مەديتسينالىق قىزمەتكەردى شاقىرعان.

"تۋىستارى ونىڭ ءوزى اجال قۇشقانىن ايتقان. سوعان قاراماستان وزدەرى وقيعا ورنىنا جەدەل-تەرگەۋ توبىن شاقىرىپتى. ال توپ اناتولي تيحونەنكونىڭ دەنەسىن اۋدانداعى مايىتحاناعا جىبەرگەن. ءمايىتتى تەكسەرۋ بارىسىندا وعان وق تيگەنى انىقتالدى", - دەيدى سۋديا التىناي ساعىندىقوۆا سوت وتىرىسى بارىسىندا.

تەرگەۋ مالىمەتىنە سايكەس، اناتولي تيحونەنكو ءولى كۇيىندە تابىلعان كەزدە ونىڭ ۇستىندە كيىمى بولعان ءارى دەنەسىندە قان ىزدەرى كورىنبەپتى. تەك ءمايىتحانادا ونىڭ كەۋدەسىنەن پلاستىر انىقتالعان. ونى العان كەزدە تۇرعىنعا وق تيگەنى بەلگىلى بولعان. وق ەر ادامنىڭ وكپەسى مەن جۇرەگىن تەسىپ ءوتىپتى.

الايدا پوليتسيا ۇيدەن قارۋ تاپپادى. ءتارتىپ ساقشىلارى كۇدىكتىلەردى ءبىرىنشى رەت تەرگەگەن سوڭ "ادام ءولتىرۋ" بابى بويىنشا قىلمىستىق ءىس قوزعادى.

"ۋچاسكەلىك ينسپەكتور، تەرگەۋشىنىڭ بەرگەن مالىمەتىنە سايكەس، لاريسا پۋريك العاشقى تەرگەۋ بارىسىندا تۋعان اكەسىنە وق اتقانىن ايتقان. سەبەبى اكەسى قىزىنا ءوتىنىش جاساپتى", - دەيدى سۋديا.

سوڭعى ۋاقىتتا تيحونەنكو قاتتى اۋىرىپ، جانى قينالعان. ءتىپتى، ول بىرنەشە رەت ءوز-وزىنە قول سالعىسى كەلەتىنىن ايتقان. سوت وتىرىسىندا ول ءوزىنىڭ بۇل ويىن پسيحيكالىق اۋرۋعا شالدىققان قىزىنا ايتىپ، ودان كومەك سۇراعانى بەلگىلى بولدى.

الماتى وبلىسىنداعى ارنايى ورتالىق جۇرگىزگەن پسيحياتريالىق ساراپتاما قورىتىندىسىنا سايكەس، لاريسا پۋريكتىڭ پسيحيكالىق دەرتكە شالدىققانى انىقتالدى. قازىر ول وسى مەديتسينالىق مەكەمەدە ەم قابىلداپ جاتىر.

"سوت كۇدىكتىنىڭ قر قىلمىستىق كودەكسىنىڭ 99-بابى، 1-تارماعى ("ادام ءولتىرۋ") بويىنشا زاڭعا قايشى ارەكەتتى ەسسىزدىك جاعدايىندا جاساعانى تۋرالى ۇكىم شىعاردى. سول سەبەپتەن لاريسا پۋريك قىلمىستىق جاۋاپكەرشىلىكتەن بوساتىلسىن", - دەلىنگەن سوت ۇكىمىندە.

الايدا كۇدىكتى قوعامعا قاۋىپ توندىرەتىندىكتەن رەسپۋبليكالىق پسيحياتريالىق اۋرۋحانادا ينتەنسيۆتى تۇردە ەم قابىلداۋعا مىندەتتەلدى. لاريسا پۋريكتىڭ تۋىستارى سوت ۇكىمىمەن كەلىسپەيدى، ولار سوت ۇكىمىنە شاعىم تۇسىرمەكشى. سەبەبى سوتقا دەيىنگى تەرگەۋ بارىسىندا قاتەلىكتەرگە جول بەرىلىپتى.