وڭتۇستىك كورەياعا سەۋلگە كەلگەلى ءۇشىنشى كۇن. ءبىز ەم الىپ جاتقان كلينيكانىڭ قاسىنداعى دۇكەندەردە باعانىڭ شارىقتاپ تۇرعانىن كەشە اڭعاردىم. بۇگىن بازارعا بارىپ سەۋلدىڭ بازارىن كوزبەن كوردىم. كومەككە كارتا مەن گۋگل اۋدارماشى كەلدى. سونىمەن نە ءتۇيدىم؟
ءبىرىنشى اڭعارعانىم، كارىستەردىڭ بازارى تۇسكى 12-دەن، كەشكى 12-گە دەيىن جۇمىس ىستەيدى. بازارلارى تازا، ءارى جيناقى. ساۋداگەرلەرى ادال. شەتتەن كەلدىڭ دەپ الداپ قالۋ جوق.
سەبەبى بازاردا كامەرا جانە تولەم جاساۋ كەزىندە ساۋداگەردىڭ جۇمىسىن باعالايتىن قۇرىلعى تۇرادى. زاڭ قاتال..
بازارعا كىرە سالىسىمەن ەتتىڭ باعاسىن بىلگىم كەلدى. سەبەبى كلينيكانىڭ قاسىنداعى دۇكەندە 100 گرامم ەت 10 دوللار. بۇل ءبىزدىڭ تەڭگەمەن 3870 تەڭگە.
بازاردا 400 گرامم ەت 8500-9000 ۆون ەكەن. تەڭگەگە شاققاندا 3433تەڭگە.. بالىقتىڭ ءبىر كەلىسى 10000 ۆون.
سوندا بۇل جاقتا ءبىر كەلى بالىقتى 3800 تەڭگەگە الادى ەكەنبىز. قۇلپىنايدىڭ ءبىر كەلىسى 5900 ۆون.
تەڭگەگە شاققاندا ءبىر كەلى قۇلپىناي 2322 تەڭگە. سالىستىرا بەرسەك، ءبىزدىڭ تەڭگەمەن شاققاندا سەۋلدە ءومىر ءسۇرۋ قيىنداۋ. ال وزدەرىنىڭ جالاقىسى جوعارى بولعاندىقتان ولاردا ءومىر ءسۇرۋ ساپاسى جاقسى. ماسەلەن 4000 دوللار جالاقى الاتىن مۇعالىمدەر وتباسى بۇل جاقتا اۋقاتتى وتباسى سانالادى. ول ءۇشىن مۇعالىمدەرگە تەك قانا كورەيانىڭ ۋنيۆەرسيتەتىن بىتىرسە بولعانى. ءارى قاراي جۇمىسىن ىستەپ ەڭبەك ءوتىلىن تولىقتىرىپ بالالارعا ءبىلىمىن بەرىپ جۇرە بەرەدى.. بىزدەگى ءتارىزدى مۇعالىمدى قوعامدىق جۇمىسقا جەگۋ بۇل ەلدە جوق ەكەن. مۇعالىم تەك ءبىلىمىن بەرىپ، بالالاردىڭ ينتەلەكتۋالدىق دەڭگەيىن دامىتۋعا مىندەتتى. مۇنى ەستىپ "ۇستازدارىنا قوقىس جيناتىپ، قوعامدىق جۇمىسقا جەگىپ، سايلاۋ بولسا تاڭ اتقانشا داۋىس ساناتىپ قوياتىن ەل ءبىز عانا ما ەكەن" دەپ ويلادىم...
ال دارىگەرلەرىنە قوياتىن تالاپ ەرەكشە، سوعان وراي ول ەڭ قۇرمەتتى ماماندىق. 'جاڭا بازارعا كەتىپ بارامىن" دەگەنىمدى ەستىپ كلينيكاداعى قىزدار "اداسىپ كەتسەڭىز كونفەرەنتسياعا كەلگەن دارىگەرمىن دەڭىز، كەز كەلگەن كارىس وزدەرى تەگىن اكەلىپ تاستايدى" دەدى. وسىدان-اق، دارىگەرگە قۇرمەتتى بايقاۋعا بولادى. بۇل ەلدە دارىگەرگە راحمەتىن ايتىپ، اقشا قىستىرۋ دەگەن جوق. كورەيادا دارىگەردىڭ پارا الۋى تىرىدەي ولگەنمەن تەڭ.
بۇل ەلدە اۆتوبۋسپەن ءجۇرۋ قۇنى 487 تەڭگە. اۆتوبۋسپەن جەڭىلدىكپەن مۇعالىمدەر مەن دارىگەرلەر جۇرە الادى جانە ءۇش بالاسى بار انالار اۆتوبۋستا تەگىن جۇرەدى. ال كوپ بالالى انالارعا جاردەماقى ءبولۋ ماسەلەسى وڭتۇستىك كورەيادا وڭدى شەشىلىپتى. كورەيادا جاردەماقى ەكى بالاسى بار انالاردان باستاپ تولەنەدى. ەكى بالاسى بار انا 1800 دوللار، ءۇش جانە ءتورت بالاسى بار انالار 2000 دوللار مەملەكەتتىك جاردەماقى الادى. بۇعان اي سايىنعى تۇسىمىنە قاراي جەرگىلىكتى اۋدان بيۋدجەتىنەن قاراجات قوسا ءبولىنىپ وتىرادى. حالقىنا جاعداي جاسالعان، ادامي قۇندىلىقتاردى دامىتۋعا بارىنشا كۇش سالعان ەل ەكەن. وسىعان قاراپ ءبىزدىڭ ەلدە الەۋمەتتىڭ جاعدايى وڭالۋى ءالى تالاي-تالاي ساۋاتتى قادامدار كەرەك ەكەنىن ەرىكسىز مويىندايسىڭ...
قارلىعاش زارىقحانقىزى
"ادىرنا" ۇلتتىق پورتالى
الماتى-وڭتۇستىك كورەيا-سەۋل
