بيىل «قازاقفيلم» ستۋدياسىنىڭ قۇرىلعانىنا 50 جىل. ءوز جۇمىسىن العاشىندا قازاق تەلەۆيزياسىنىڭ قۇرامىندا باستاعان ستۋديا 1969 جىلى 3 قاراشادا ءبولىنىپ، جەكە شاڭىراق كوتەردى. شيرەك عاسىرعا جۋىق جۇمىس ىستەگەن ستۋديادا تۇرعانباي ماتكارىموۆ، بولات عابيتوۆ-جانسۇگىروۆ، اناتولي فەدۋلوۆ، يۋري دۋبروۆين، ءاسمان دۇيىمباەۆ سىندى تالانتتار شوعىرى ەڭبەك ەتتى. جۋىردا الماتىداعى قر ۇلتتىق كىتاپحاناسىندا «قازاقتەلەفيلم» ستۋدياسىنىڭ ارداگەرلەرى باس قوسىپ، 50 جىلدىق مەرەيتويدى اتاپ ءوتتى. وسىعان وراي ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆى فوتوكورمە ۇيىمداستىرىپ، سلايد جاساپ، تاريح شەجىرەسىن سۋرەتتەر ارقىلى كورسەتتى.
[caption id="attachment_28026" align="alignnone" width="1024"]
[/caption]
ارحيۆ قورىندا وسى ۋاقىتقا دەيىن "قازاحتەلەفيلم" ستۋدياسىنىڭ تاريحىنا قاتىستى 50 شاقتى سۋرەت قانا ساقتالعان بولاتىن. كينوستۋديانىڭ مەرەيتويى قارساڭىندا ارحيۆ قىزمەتكەرلەرى "قازاقتەلەفيلمنىڭ" ارداگەرلەرىمەن حابارلاسىپ، ولاردىڭ جەكە قورلارىنان فوتوقۇجاتتارىن الدىرىپ، ارحيۆ قورىن 500-دەن استام فوتوقۇجاتپەن تولىقتىردى. كورمەدە قورعا جاڭادان قوسىلعان سۋرەتتەردەن 75 فوتوقۇجات ىرىكتەلىپ، كورەرمەن نازارىنا ۇسىنىلدى. كورمە 5 بولىمنەن تۇردى: 1-ءشى ءبولىمى كينوستۋديانىڭ ىرگەتاسىن قالاپ، وركەن جايۋىنا ۇلەس قوسقان قىزمەتكەرلەرىنە ارنالدى. كينوستۋديا ءتورت شىعارماشىلىق سالا بويىنشا كينوتۋىندىلار جاساعاندىقتان، كورمەنىڭ قالعان ءتورت بولىمىندە سول سالالارعا جەكە-جەكە توقتالۋدى ءجون كوردىك. اتاپ ايتساق، 2-ءشى ءبولىم دەرەكتى فيلمدەر تۇسىرىلىمدەرىنە ارنالسا، 3-ءشى ءبولىم فيلم-كونتسەرتتەر تۇسىرىلىمىنەن سىر شەرتەدى. 4-ءشى بولىمدە مۋلتيپليكاتسيا جانە كوركەم فيلمدەر تۇسىرىلىمدەرى قامتىلسا، 5-ءشى ءبولىم تەاتردى ەكرانداۋعا ارنالدى.
«قازاقتەلەفيلم» ستۋدياسى تۇسىرگەن ەكى مىڭنان اسا تەلەونىمنىڭ مىڭعا جۋىعى ارحيۆ قورىنا وتكەن. قازىرگى كەزدە «كازاقستان» رەسپۋبليكالىق تەلە-راديو كورپوراتسياسىنىڭ «التىن قورىندا» ساقتالعان تۋىندىلاردى ارحيۆكە تاپسىرۋ جۇمىسى جۇرگىزىلۋدە. وسى جۇمىستىڭ ناتيجەسىندە بيىلدىڭ وزىندە «قازاقتەلەفيلم» ستۋدياسى ازىرلەگەن 150 تۋىندى ارحيۆ قورىنا ءتۇستى.
كەزىندە «قازاقتەلەفيلمدە» قىزمەت ەتكەن مايتالمانداردىڭ جەكە قورىندا ساقتالعان كينو-فوتوقۇجاتتاردىڭ ۋاقىت وتكەن سايىن قۇندىلىعى ارتاتىنى انىق. وسى ورايدا ارحيۆ قورىنا ءوز فوتوقۇجاتتارىن مەملەكەتتىك ساقتاۋعا تاپسىرعان ساپابەك كەلدىباەۆ، ۆاديم دوروجكو، مۇرات قىرىقباەۆ، ۆالەري زادورنوۆسكي، پەتر سيدورەنكو، قوسىلعان ءابجانوۆ، ورالبەك سارباسوۆ، ساكەن ءتاجىمۇراتوۆ، تانا تايپينا، عالىم شالاباەۆ، ەسكەندىر تىنىشپاەۆتىڭ قىزى ەلەنا تىنىشپاەۆا، كارىم تاناەۆتىڭ جۇبايى زيناگۇل تۇركەباەۆا، بولات عابيتوۆ-جانسۇگىروۆتىڭ جارى قارلىعاش قاڭتارباەۆا، ءاسمان دۇيىمباەۆتىڭ قىزى گۇلنار وماربەكوۆا، ريفكات مۋزابەكوۆتىڭ قىزى الفيا مۋزامەتوۆالاردىڭ ءىسى قۇپتارلىق. مەملەكەتتىك كينو-فوتوقۇجاتتار مەن دىبىس جازبالار ءارحيۆىنىڭ ديرەكتورى گۇلميرا مۇحتاروۆانىڭ ايتۋىنشا، تاپسىرىلعان فوتوقۇجاتتار نەگىزىندە «قازاقتەلەفيلم» ستۋدياسىنىڭ 50 جىلدىعىنا وراي ەكى تومدىق سۋرەتتەر كاتالوگى شىعارىلماق. مىڭعا جۋىق دەرەكتى ءفيلمدى قامتىعان كاتالوگتىڭ ءبىرىنشى تومىن ارحيۆ قىزمەتكەرلەرى وسى جىلدىڭ اياعىنا دەيىن شىعارۋدى جوسپارلاپ وتىر.
وتكەنىمىزگە قايتا ءۇڭىلىپ، بارىمىزدى تۇگەندەپ، جوعالتقانىمىزدى ىزدەپ تاۋىپ، بۇگىنگى ۇرپاپىڭ كەرەگىنە جاراتا ءبىلۋ - باستى مىندەت. تاريحىمىزدىڭ جاڭعىرتىپ، جاندانۋىنا ۇلەسىن قوسىپ جۇرگەن ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆىنىڭ قىزمەتكەرلەرىنىڭ ەڭبەگى ەرەن ەكەنىن اتاپ ءوتۋ كەرەك.
سالتانات سمايلوۆا،
"ادىرنا" ۇلتتىق پورتالى
