تۇساۋىڭدى كەسەيىن،
كۇرمەۋىڭدى شەشەيىن
(تۇساۋكەسەر جىرى)
ءسابيدى قاز تۇرعاننان كەيىن تەز ءجۇرىپ كەتسىن دەگەن تىلەكپەن جاسالاتىن عۇرىپ، ىرىم. ول ءۇشىن ارنايى الا ءجىپ دايىندالادى. سول جىپپەن بالانىڭ اياعىن كادىمگىدەي تۇساپ ونى اياعىن جىلدام باساتىن ايەلگە قيدىرادى. سۇرىنشەك، جايباسار ادامدارعا كەستىرمەيدى. تۇساۋى كەسىلگەن بالانى قولىنان ۇستاپ تەز جۇگىرتەدى، شاشۋ شاشىلادى. بالانىڭ اتا – اناسى تۇساۋ كەسۋشىنىڭ كادەسىن بەرەدى. تۇساۋكەسەردىڭ ارناۋلى جىرى بار.
مىسالى:
قاز – قاز بالام، قاز بالام،
قادام باسساڭ ءماز بولام.
كۇرمەۋىڭدى شەشەيىك،
تۇساۋىڭدى كەسەيىك.
قاز - قاز بالام، قاز بالام،
تاقىمىڭدى جاز بالام!
قادامىڭا قارايىق،
باسقانىڭدى سانايىق.
قاز - قاز بالام، جۇرە عوي،
بالتىرىڭدى تۇرە عوي.
مايقۇلىن بوپ شابا عوي،
وزىپ بايگە الا عوي.
قاز بولا عوي قاراعىم،
قۇتتى بولسىن قادامىڭ!
ومىرگە اياق باسا بەر!
اسۋلاردان اسا بەر!
جۇگىرە عوي قۇلىنىم،
جەلبىرەسىن تۇلىمىڭ.
ەلگەزەك بول ەرىنبە!
ىلگەرى باس شەگىنبە!
الا ءجىپتى الايىق،
اجەڭە الىپ بارايىق.
ەر جەتتى دەپ ايتايىق،
شاشۋىن جەپ قايتايىق!
تۇساۋ كەسەردىڭ ءجىبىن دايىنداۋدىڭ بىرنەشە تۇرلەرى، جولدارى، سەنىمدەرى دە بار.
كوبەيىپ، كوگەرە بەرسىن دەپ كوك شوپتەن ەسىپ جاسايدى. باي بولسىن دەپ مالدىڭ توق ىشەگىنەن دە ورەدى.
ادال بولسىن، بىرەۋدىڭ الا ءجىبىن اتتاماسىن دەپ الا جىپتەن دە جاسايدى.
تۇساۋ كەسەر جىرىنىڭ ولەڭى مەن نوتاسى "قازاقتىڭ ادەت-عۇرىپ تۇرمىس-سالت اندەرى" كىتابىنىڭ 281-ءشى بەتىنەن الىندى.
الماتى، ى.التىنسارين اتىنداعى قازاقتىڭ ءبىلىم اكادەمياسىنىڭ رەسپۋبليكالىق باسپا كابينەتى، 2001 ج، 298 ب.
ISBN 9965-08-012-7
اۆتورلارى: ق. بايقاداموۆا، ا. تەمىربەكوۆا.
پىكىر جازعاندار: ب. قاراقۇلوۆ - ونەرتانۋ عىلىمدارىنىڭ دوكتورى.
ز. قوسپاقوۆ - ونەرتانۋ عىلىمدارىنىڭ كانديداتى.
باسپاعا ى. التىنسارين اتىنداعى قازاقتىڭ ءبىلىم اكادەمياسىنىڭ عىلىمي كەڭەسى ۇسىنعان.
