قر تۇڭعىش پرەزيدەنتى مۋزەيىندە وتكەن «عاسىرلار اماناتى» اتتى رەسپۋبليكالىق اكتسياسىنىڭ اياسىندا «امانات» ساندىعىن تاپسىرۋ ءراسىمى ءوتتى، دەپ حابارلايدى BAQ.KZ ءتىلشىسى.
مۋزەيگە تاپسىرىلعان «امانات» ساندىعىندا ەلىمىزدەگى بىرقاتار مۋزەيلەردىڭ قورىنداعى جادىگەرلەردىڭ فوتوسۋرەتتەرى مەن سيپاتتامالارى جيناقتالعان.
اتاپ ايتقاندا، XVII-XVIII عاسىرداعى باتىر ساۋىتى، ءىلياس ەسەنبەرليننىڭ قولجازباسى، ابىلاي حان تاعى، بوگەنباي باتىردىڭ دۋلىعاسى، اقان سەرىنىڭ ادالباقانى ءتارىزدى جادىگەرلەر تۋرالى مالىمەتتەر جيناقتالعان.
سونىمەن قاتار، الماتى وبلىسىنان تابىلعان ايبالتا مەن اقتوبە وبلىستىق مۋزەيىنىڭ قورىنداعى بۇجىر باتىردىڭ ساۋىتى، اتىراۋ مۋزەيىنەن الىنعان قايراق تاس پەن جامبىل وبلىسىنان تابىلعان ساق داۋىرىندەگى باتىر دۋلىعاسى تۋرالى قىزىقتى مالىمەتتەر ەنگىزىلگەن.
«امانات» ساندىعىن قر تۇڭعىش پرەزيدەنتى مۋزەيىنىڭ ديرەكتورى الما ساعىنعاليقىزىنا اقمولا وبلىستىق مادەنيەت باسقارماسىنىڭ باستىعى ساۋلە بوكەيحانقىزى سالتاناتتى تۇردە تاپسىردى.
ايتا وتەيىك، بۇگىن قر تۇڭعىش پرەزيدەنتى مۋزەيىندە «عاسىرلار اماناتى» اتتى رەسپۋبليكالىق اكتسياسىنىڭ قورىتىندىسى جاريالاندى. اكتسيا قورىتىندىسى كەزىندە قازاق حاندىعىنىڭ 550 جىلدىعىنا ارنالعان دەرەكتى فيلمدەر كورسەتىلىپ، كوپشىلىك قاۋىمعا ارنايى كورمە ۇسىنىلدى.
