2 ملن تەڭگە جالاقىنى كىمدەر الادى؟

3201
Adyrna.kz Telegram

«استانا»  حالىقارالىق قارجى ورتالىعىنىڭ باسقارۋشىسى قايرات كەلىمبەتوۆ باسقارۋشى  قىزمەتكەرلەرىنىڭ جالاقىسىن جاريا ەتتى.

«بىزدە بونۋس جوق. جالاقى  «بايتەرەك» حولدينگىنىڭ دەڭگەيىندەي بولادى.  «بايتەرەك» حولدينگىندە باسقارۋشىلار  ورتا ەسەپپەن 5 مىڭ دوللارعا جۋىق جالاقى الادى. بۇل  شامامەن 1 ميلليون 900 تەڭگە الادى»، - دەدى كەلىمبەتوۆ ماجىلىستە.

بۇگىن ماجىلىستە «استانا» حالىقارالىق قارجى ورتالىعى تۋرالى كونستيتۋتسيالىق زاڭعا وزگەرىستەر مەن تولىقتىرۋلار ەنگىزۋ تۋرالى كونستيتۋتسيالىق زاڭ جوباسى قارالدى.

زاڭ جوباسى «ينۆەستيتسيالىق رەزيدەنت» ۇعىمىن جانە قازاقستاندا «ينۆەستيتسيالىق سالىق رەزيدەنتتىگى»  باعدارلاماسىن ەنگىزۋدى كوزدەيدى.

ينۆەستيتسيالىق سالىق رەزيدەنتتىگى باعدارلاماسى - قازىرگى تاڭدا دۇنيە جۇزىندە بارىنشا كەڭىنەن تارالعان قۇبىلىس. قازاقستاندا «استانا» حالىقارالىق قارجى ورتالىعى بازاسىندا ينۆەستيتسيالىق سالىق رەزيدەنتتىگى باعدارلاماسىن قولدانۋ ۇسىنىلادى. باعدارلاما ماقساتى – ينۆەستور مەن ونىڭ وتباسى مۇشەلەرىنە قازاقستانعا كوپ مارتە كىرۋ ۆيزاسىن بەرۋ ارقىلى ينۆەستيتسيا تارتۋ.

«ءبىرىنشى كەزەڭدە قارجى ورتالىعىنىڭ اكىمشىلىگى قاراجاتتىڭ زاڭدى-زاڭسىز جولمەن تابىلعانىن تەكسەرەدى. وسىدان كەيىن اكىمشىلىك ىشكى ىستەر مينيسترلىگىنە ءتيىستى قولداۋحات جولدايدى. مينيسترلىك ءتيىستى حاتتاما، پروتسەدۋرالارمەن بەس جىلدىق ۆيزانى بەرۋ مۇمكىندىگىن تەكسەرەدى. ۆيزا ىشكى ىستەر مينيسترلىگى مەن ۇلتتىق قاۋىپسىزدىك كوميتەتى قازاقستان زاڭناماسىنا ساكەس تولىق تەكسەرىس جۇرگىزگەننەن كەيىن عانا بەرىلەدى. ينۆەستورعا قويىلاتىن شارت – جىل سايىن حالىقارالىق قارجى ورتالىعى بيرجاسىنىڭ قۇندى قاعازدارىنا 60 مىڭ دوللار ينۆەستيتسيالاۋى ءتيىس»، - دەدى زاڭ جوباسىن تۇسىندىرگەن كەلىمبەتوۆ

وسىدان كەيىن ينۆەستيتسيالىق رەزيدەنتكە بەس جىلعا دەيىنگى مەرزىمگە كىرۋ ۆيزاسى بەرىلەدى.

ءارى قاراي، ينۆەستور ەلدە تۇرىپ جاتقانىنا 90 كۇن وتكەننەن كەيىن جانە بيۋدجەتكە جىل سايىنعى مىندەتتى تولەمدى (7000 ايلىق ەسەپ كورسەتكىش – 2019 جىلى 17,7 ميلليون تەڭگە) تولەگەننەن كەيىن، قازاقستاننان تىس جەرلەردەگى كوزدەردەن پايدا بولعان كىرىستەر بويىنشا جەكە تابىس سالىعىن تولەۋدەن بوساتىلادى.

ال قازاقستان ىشىندە الىنعان كىرىستەرگە، سالىق كودەكسىنە سايكەس، سالىق سالىنادى. شەتەلدەگى كىرىستەرگە سالىق سالىنبايدى.

«استانا حالىقارالىق قارجى ورتالىعى» اق پرەزيدەنتى قايرات كەلىمبەتوۆتىڭ ايتۋىنشا، مۇنداي ورتالىق ەكونوميكانى ءارتاراپتاندىرىپ، تۇراقتى ەكونوميكانى قۇرۋ ءۇشىن قاجەت. ونىڭ ايتۋىنشا، جەرگىلىكتى كاپيتال نارىعىن دامىتۋ ءۇشىن الەمنىڭ كوشباسشى بيرجالارىنىڭ ستراتەگيالىق سەرىكتەسىمەن بىرلەسىپ، «استانا حالىقارالىق قارجى ورتالىعىندا» جوعارى تەحنولوگيالىق بيرجا ينفراقۇرىلىمى قۇرىلادى. ول الەمنىڭ ۇزدىك ستاندارتتارىنا ساي بولماق.

پىكىرلەر