قازاقستان رەسپۋبليكاسى ۇلتتىق مۋزەيىندە قر تۇڭعىش پرەزيدەنتى كۇنى اياسىندا مەملەكەتتىك ەرميتاج بەن قر ۇلتتىق مۋزەيى اراسىنداعى بىرلەسكەن ىنتىماقتاستىق شارتىن جۇزەگە اسىرۋ نەگىزىندە «ەرميتاج كۇندەرى» وتتى.
عىلىمي رەستاۆراتسيا، عىلىمي-اعارتۋشىلىق جۇمىستارى، مۋزەي ەكسپوناتتارىن ساقتاۋ مەن قورعاۋ بويىنشا مۋزەي ءىسىنىڭ ءىرى ماماندارىنان تۇراتىن دەلەگاتسيانى تاريح عىلىمدارىنىڭ دوكتورى، پروفەسسور، رعا كوررەسپوندەنت-مۇشەسى، رەسەي مۋزەيلەرى وداعىنىڭ توراعاسى، حالىقارالىق مۋزەيلەر كەڭەسىنىڭ مۇشەسى (يكوم), تاريحشى-شىعىستانۋشى، ارابتانۋشى جانە يسلامتانۋشى، تاياۋ شىعىستىڭ ەجەلگى جانە ورتاعاسىرلىق تاريحى، اراب تۇبەگىنىڭ تاريحى، سابا، حيميار، قۇران جانە يسلامنىڭ ەرتە تاريحى، ەجەلگى اراب جازۋلارى، ارابتاردىڭ ەپوستىق اڭىزدارى، اراب قولجازبا كىتابى، مۇسىلمان مادەنيەتى سالالارىن زەرتتەگەن مەملەكەتتىك ەرميتاجدىڭ باس ديرەكتورىميحايل پيوتروۆسكي باستاپ كەلدى.
"مەنىڭ قازاقستانعا كەلگەندەگى ماقساتىم – استانا، قازاقستاننىڭ ۇلتتىق مۋزەيىندە ەرميتاج كۇندەرىن وتكىزۋ. جالپى، جەلتوقسان ايىنىڭ باسىندا ەرميتاج كۇندەرىن ۇيىمداستىرىپ، جىل بويى اتقارعان جۇمىسىمىزدى قورىتىندىلايمىز. بيىل ءوز ەلىمىزدە ەسەپ بەرمەستەن بۇرىن، استاناعا كەلىپ، ەرميتاج كۇندەرىن ۇيىمداستىرىپ جاتىرمىز. شارا اياسىندا ءوزارا تəجىريبە الماسامىز. ۇلتتىق مۋزەيگە بۇل العاش كەلۋىم", – دەدى م.پيوتروۆسكي.
«ەرميتاج كۇندەرىنىڭ» سالتاناتتى اشىلۋ راسىمىنە قر مادەنيەت جانە سپورت مينيسترى ارىستانبەك مۇحامەديۇلى، سونىمەن قاتار قر پارلامەنت ءماجىلىسىنىڭ دەپۋتاتتارى، بەلگىلى مەملەكەت جانە قوعام قايراتكەرلەرى، زيالى قاۋىم وكىلدەرى قاتىستى.
"ۇلتتىق مۋزەيدىڭ حالىقارالىق دəرەجەدە ءوز ورنى بولۋ كەرەك. ميحايل پيوتروۆسكي رەستاۆراتسيا، مۋزەيفيكاتسيا سياقتى سيرەك كەزدەسەتىن مامانداردى ەرتىپ كەلدى. ءبىزدىڭ ماقساتىمىز – ەرميتاجبەن تىعىز قارىم-قاتىناس ورناتۋ. مىسالى، كەلەسى جىلى قازاقستاندا ەرميتاجدىڭ بىرنەشە كورمەسىن وتكىزۋىمىز كەرەك. سەبەبى، ەرميتاجدا ساق مəدەنيەتىنە بايلانىستى كوپتەگەن جəدىگەرلەر، اقساق تەمىردىڭ تاسقا جازعان جازبالارى سياقتى كوپتەگەن جəدىگەرلەر بار. سونىمەن قاتار، قازاقستان مۋزەيلەرىندەگى دە سيرەك كەزدەسەتىن جəدىگەرلەردى ەرميتاجعا قويۋىمىز كەرەك. سوندىقتان، وسى ەرميتاج كۇندەرىنىڭ ماڭىزى زور", – دەدى ا. مۇحامەديۇلى.
شارا بارىسىندا لەكتسيالار، سەمينارلار، شەبەرلىك ساباقتارى، كەزدەسۋلەر، مۋزەيلەردىڭ يكوم حالىقارالىق كەڭەسىمەن بىرلەسىپ قىزمەت ەتۋ بويىنشا، سونىمەن قاتار، ەرميتاج تۋرالى ۆيرتۋالدى كورمە سياقتى حالىقارالىق مۋزەي جوبالارى اياسىندا مۋزەي سالالارىن دامىتۋ سىندى وزەكتى ماسەلەلەردى تالقىلاۋ بولدى.
"بۇگىندە مۋزەي قاۋىمداستىعىنىڭ الدىندا جالپى ادامزاتتىق قۇندىلىقتاردى ساقتاۋ مەن ناسيحاتتاۋعا قاتىستى وزەكتى ماسەلەلەر تۇر. ولاردى ءتيىمدى شەشۋدە ۇلتتىق مۋزەيدىڭ ءرولى ەرەكشە. مۋزەي اشىلعالى بەرى شەتەلدىك، ونىڭ ىشىندە رەسەي مۋزەيلەرىمەن تىعىز بايلانىس ورناتىپ كەلەدى. وسىنداي ارىپتەستىك بايلانىستىڭ ناتيجەسىندە ءتۇرلى باعىتتاعى مادەني الماسۋلار، كوپتەگەن ماڭىزدى جوبالار جۇزەگە اسىرىلدى. ۇلتتىق مۋزەيدە ەرميتاج كۇندەرىنىڭ ءوتۋى دە سونداي اۋقىمدى جۇمىستىڭ جەمىسى", – دەدى قر ۇلتتىق مۋزەي ديرەكتورى دارحان مىڭباي.
