جەتىسۋ حالقىنىڭ ۇشتەن ءبىر بولىگىن، ياعني 634 مىڭعا جۋىعىن جاستار قۇرايدى. وڭىردە جاستار ساياساتىنا ەلەۋلى كوڭىل ءبولىنىپ، جىل سايىن قوماقتى قارجى ءبولىنىپ كەلەدى. بيىل وسى ماقساتقا جەرگىلىكتى بيۋدجەتتەن 66 ملن. 177 مىڭ تەڭگە ءبولىنىپ، الەۋمەتتىك ماڭىزى بار جوبالارعا 15 ملن. تەڭگە قاراستىرىلعان. 2009 جىلدان بەرى وبلىستىڭ بارلىق اۋدان، قالالارى مەن الىس اۋىلدارىندا ۇيىمداستىرىلعان جاستار فورۋمى بيىلدان باستاپ جەرگىلىكتى جەرلەردە فەستيۆال تۇرىندە وتكىزىلدى.
اۋدان، قالالاردا جالاۋىن كوتەرگەن جاستار مەرەكەسىنىڭ قورىتىندىسى وسى فەستيۆالدا شىعارىلىپ، وزا شاپقاندار ولجالى بولدى. وبلىس اكىمى سەرىك ۇمبەتوۆ 1-ورىن العان تالدىقورعان قالاسىنا اۆتوبۋس، 2 جانە 3-ورىن يەلەنگەن قاراساي جانە ەڭبەكشىقازاق اۋداندارىنا گازەل اۆتوكولىكتەرىنىڭ كىلتتەرىن تاپسىردى. وسى سالتاناتتا اۋىر اتلەتيكادان الەم چەمپيونى اتانعان جەتىسۋلىق سپورتشىلار سۆەتلانا پودوبەدوۆا مەن مايا مانەزاعا 2 ملن. 500 مىڭ تەڭگەدەن، زۋلفيا چينشانلو، ۆلاديمير سەدوۆ جانە بىرقاتار جاتتىقتىرۋشىلارعا دا اقشالاي سىيلىقتار تابىس ەتتى. جاستار مەرەكەسىنە ارنايى كەلگەن قازاقستان رەسپۋبليكاسى پرەزيدەنتى اكىمشىلىگى ىشكى ساياسات ءبولىمىنىڭ باستىعى دارحان مىڭباي وبلىس جاستارىنىڭ ونەرلەرىنە ريزاشىلىعىن ءبىلدىرىپ، مەملەكەتتىك جاستار ساياساتىن جۇزەگە اسىرۋدا ماڭىزى زور بۇل اۋقىمدى شارانى وزگە وڭىرلەرگە ۇلگى ەتۋگە بولاتىنىن اتاپ ءوتتى.
الاڭنىڭ ءتورت بۇرىشىندا 500-گە جۋىق جاس تۋ كوتەرىپ، ستاديوننان ساپ تۇزەپ ءجۇرىپ ءوتتى. ءاربىر اۋدان، قالا دەلەگاتسيالارى وتانشىلدىق تاقىرىپتارىن ۇران ەتىپ، ادەمى بەزەندىرىلگەن كولىكتەرمەن شەرۋ جاساپ، الاڭنىڭ اجارىن كىرگىزدى.
5000 ادامنىڭ قاتىسۋىمەن «قارا جورعا» ءبيى ورىندالىپ، 300 ادام ءبىر مەزگىلدە كۇي شەرتتى. شاراعا بارلىعى 35 مىڭعا جۋىق ادام قاتىستى.
جەتىسۋ جاستارى قاي جاعىنان دا قامقورلىقتان كەندە قالعان ەمەس. سوڭعى ءتورت جىلدان بەرى وبلىس ورتالىعىندا ستۋدەنتتەردىڭ قوعامدىق كولىكتە تەگىن ءجۇرۋ ماسەلەسى شەشىلگەن. بۇل ماقساتقا بيىل 138,8 ملن.تەڭگە جۇمسالدى. سونىمەن قاتار جەتىم جانە جاعدايى تومەن وتباسىلارىنان شىققان 349 بالا جوعارى وقۋ ورىندارىندا وبلىس اكىمىنىڭ گرانتىمەن ءبىلىم الۋدا. وڭىرگە جۇمىس ىستەۋگە كەلگەن 295 جاس مامانعا 29,1 ملن. تەڭگە كوتەرمە اقى مەن باسقا دا كوممۋنالدىق جەڭىلدىكتەر بەرىلگەن.
ساعىنىش نامازشاموۆا،
الماتى وبلىسى
