Jetisý halqynyń úshten bir bóligin, ıaǵnı 634 myńǵa jýyǵyn jastar quraıdy. Óńirde jastar saıasatyna eleýli kóńil bólinip, jyl saıyn qomaqty qarjy bólinip keledi. Bıyl osy maqsatqa jergilikti bıýdjetten 66 mln. 177 myń teńge bólinip, áleýmettik mańyzy bar jobalarǵa 15 mln. teńge qarastyrylǵan. 2009 jyldan beri oblystyń barlyq aýdan, qalalary men alys aýyldarynda uıymdastyrylǵan jastar forýmy bıyldan bastap jergilikti jerlerde festıval túrinde ótkizildi.
Aýdan, qalalarda jalaýyn kótergen jastar merekesiniń qorytyndysy osy festıvalda shyǵarylyp, oza shapqandar oljaly boldy. Oblys ákimi Serik Úmbetov 1-oryn alǵan Taldyqorǵan qalasyna avtobýs, 2 jáne 3-oryn ıelengen Qarasaı jáne Eńbekshiqazaq aýdandaryna Gazel avtokólikteriniń kiltterin tapsyrdy. Osy saltanatta aýyr atletıkadan Álem chempıony atanǵan jetisýlyq sportshylar Svetlana Podobedova men Maıa Manezaǵa 2 mln. 500 myń teńgeden, Zýlfııa Chınshanlo, Vladımır Sedov jáne birqatar jattyqtyrýshylarǵa da aqshalaı syılyqtar tabys etti. Jastar merekesine arnaıy kelgen Qazaqstan Respýblıkasy Prezıdenti Ákimshiligi ishki saıasat bóliminiń bastyǵy Darhan Myńbaı oblys jastarynyń ónerlerine rızashylyǵyn bildirip, memlekettik jastar saıasatyn júzege asyrýda mańyzy zor bul aýqymdy sharany ózge óńirlerge úlgi etýge bolatynyn atap ótti.
Alańnyń tórt buryshynda 500-ge jýyq jas tý kóterip, stadıonnan sap túzep júrip ótti. Árbir aýdan, qala delegaııalary otanshyldyq taqyryptaryn uran etip, ádemi bezendirilgen kóliktermen sherý jasap, alańnyń ajaryn kirgizdi.
5000 adamnyń qatysýymen «Qara jorǵa» bıi oryndalyp, 300 adam bir mezgilde kúı shertti. Sharaǵa barlyǵy 35 myńǵa jýyq adam qatysty.
Jetisý jastary qaı jaǵynan da qamqorlyqtan kende qalǵan emes. Sońǵy tórt jyldan beri oblys ortalyǵynda stýdentterdiń qoǵamdyq kólikte tegin júrý máselesi sheshilgen. Bul maqsatqa bıyl 138,8 mln.teńge jumsaldy. Sonymen qatar jetim jáne jaǵdaıy tómen otbasylarynan shyqqan 349 bala joǵary oqý oryndarynda oblys ákiminiń grantymen bilim alýda. Óńirge jumys isteýge kelgen 295 jas mamanǵa 29,1 mln. teńge kóterme aqy men basqa da kommýnaldyq jeńildikter berilgen.
Saǵynysh Namazshamova,
Almaty oblysy
