ادەتتە وبلىس ورتالىعىنا نازار اۋدارىلىپ، اۋىل-ايماقتار نازاردان تىس قالىپ جاتاتىنى جاسىرىن ەمەس. الايدا جامبىل وبىسىنىڭ اكىمى اسقار مىرزاحمەتوۆ تاراز قالاسىنان بولەك اۋدان ورتالىقتارىنىڭ دا ءساندى بولۋىنا نازار اۋدارىپ وتىر.
ماسەلەن، جامبىل وبلىسىندا «اۋىل – ەل بەسىگى» جوباسى قولعا الىنىپ، وسىنىڭ ارقاسىندا بىرنەشە اۋداننىڭ ورتالىعى جاڭارتىلىپ جاتىر. وبلىس اكىمدىگىنىڭ ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى گۇلدانا جاۋىنبەكوۆانىڭ ايتۋىنشا، جوبا اياسىندا وبلىستىڭ 3 اۋدان ورتالىعىندا 108 جوبا جۇزەگە اسىرىلۋدا. وعان رەسپۋبليكالىق بيۋدجەتتەن بولىنگەن 2,77 ميلليارد تەڭگە قاراستىرىلىپتى. ونىڭ ىشىندە 104 جوبا الەۋمەتتىك، تۇرعىن-ءۇي كوممۋنالدىق شارۋاشىلىعى، كولىك ينفراقۇرىلىمدارى نىساندارىن جوندەۋگە باعىتتالسا، ءتورت جوبا بويىنشا الەۋمەتتىك نىسانداردىڭ قۇرىلىسى جۇرگىزىلۋدە ەكەن.
اتاپ ايتار بولساق، جامبىل اۋدانى اسا اۋىلىنداعى امبەباپ زالى بار سپورتتىق-ساۋىقتىرۋ كەشەنىنىڭ قۇرىلىسى، شۋ اۋدانىنىڭ ورتالىق اۋداندىق اۋرۋحاناسىنا جاپسارلاس عيماراتىنىڭ، شۋ اۋدانى تولە بي اۋىلىندا «مادەنيەت ءۇيىنىڭ» جانە امبەباپ زالى بار سپورتتىق-ساۋىقتىرۋ كەشەنىنىڭ قۇرىلىسى جۇرگىزىلۋدە. بارلىق جوبالار بويىنشا جۇمىستار باستالىپ، جۇرگىزىلۋدە دەسەك، 85 جوبا اياقتالىپ ۇلگەرىلگەن. ال، ءتورت جوبا كەلەر جىلعا وتپەلى.
جالپى «اۋىل – ەل بەسىگى» جوباسىنىڭ قولدانىسقا ەنگىزىلگەنىنە اۋىل حالقى ءدان ريزا. سولاردىڭ ءبىرى جامبىل اۋدانى اسا اۋىلىنىڭ تۇرعىنى سەرىك باتىربەكۇلى.
«ءبىزدىڭ اۋدان ورتالىعىمىز قالانىڭ ىرگەسىندە ورنالاسقانىمەن جاعدايى تومەن بولاتىن. الايدا «اۋىل – ەل بەسىگى» جوباسىنىڭ ارقاسىندا اۋىلىمىزدىڭ ءارى كىرىپ، كوپتەگەن يگى ىستەر اتقارىلدى. سونداي-اق الداعى ۋاقىتتا اباي كوشەسىنىڭ بويىنان سپورتتىق-ساۋىقتىرۋ كەشەنى سالىنىپ، پايدالانۋعا بەرىدەيىن دەپ جاتىر. بۇل مەن سياقتى 4 ۇل ءوسىرىپ وتىرعان اتا-انا ءۇشىن ۇلكەن قۋانىش. سەبەبى بالالارىم بوس ۋاقىتىندا سپورتپەن اينالىسىپ، ۋاقىتىن ءتيىمدى پايدالاناتىن بولادى» – دەيدى ول
كەلەر جىلدان باستاپ ءۇش اۋدانى «اۋىل – ەل بەسىگى» جوباسىنا ەنىپ وتىر.
«2020 جىلعا وبلىستىڭ 3 اۋىلىندا قورداي اۋدانى قورداي اۋىلى، مەركى اۋدانى مەركى اۋىلى، سارىسۋ اۋدانى ساۋداكەنت اۋىلىندا بارلىعى 53 جوبا جۇزەگە اسادى دەپ جوسپارلانعان. وعان 2 ميلليارد تەڭگە ليميت بەلگىلەنىپ، ءتيىستى قۇجاتتار قر ۇلتتىق ەكونوميكا مينيسترلىگىنە ۇسىنىلدى»، - دەيدى گۇلدانا جاۋىنبەكوۆا.
«ادىرنا»
ۇلتتىق پورتالى