ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ ۇيىمداستىرۋىمەن «لاتىن گرافيكالى كەڭىستىكتەگى جارناما ساۋاتتىلىعى» اتتى رەسپۋبليكالىق ونلاين سەمينار ءوتتى.
ونلاين سەميناردا ورفوگرافيالىق توپ مۇشەلەرى ازىرلەگەن «گرافيكالىق كەڭىستىكتەگى جارناما» نۇسقاۋلىعى تالقىعا سالىندى. ساراپشى ماماندار تاراپىنان جارناما ساۋاتتىلىعىنا قاتىستى وزەكتى ماسەلەلەر كوتەرىلىپ، بىرقاتار ۇسىنىس پىكىرلەر ايتىلدى. «ءتىل-قازىنا» ورتالىعىنىڭ اتقارۋشى ديرەكتورى ەربول تىلەش:
- جارنامانىڭ ساۋاتتى بولعانى ءجون، ساۋاتتىلىق ەملە مەن پۋنكتۋاتسيا ەرەجەلەرىنە عانا ەمەس، مازمۇنعا دا كەرەك. سوندىقتان ساۋاتتىلىق ماسەلەسىمەن قاتار جارناما ءماتىنىنىڭ ىشكى مازمۇنىنا دا ءمان بەرىپ، اسىرەسە، ۇلتتىق تانىمنىڭ تىلدىك كورىنىستەرىن كەڭىنەن كورسەك يگى بولار ەدى. جارناما ءتىلى جاڭا الىپبيگە كوشكەندە تۇزەلەر دەگەن ۇلكەن ءۇمىت بار. وسى ونلاين سەمينار الداعى وراسان جۇمىستاردىڭ باسى» - دەپ اتاپ ءوتتى.
«ۇلان» گازەتىنىڭ رەداكتورى جۇلدىز ءابدىلدا:
- جۇرت كىتاپ وقىماۋى مۇمكىن، گازەت-جۋرنالعا جازىلماۋى مۇمكىن، بىراق كوشەدەگى جارنامانى مىندەتتى تۇردە كورەدى، كورگەن سوڭ وقيدى. ۆيزۋال دۇنيە ادامنىڭ ەسىندە مىندەتتى تۇردە قالادى. سوندىقتان جارناما ءماتىنىنىڭ ساۋاتتى بولۋى وتە ماڭىزدى» ەكەندىگىن ايتا وتىرىپ: «جارناما بەرۋشىلەردەن ساۋاتتى ءماتىن تالاپ ەتۋ، قاتە كەتكەن جاعدايدا تۇزەتۋگە دايىن بولۋىن تالاپ ەتۋ، تۇزەتپەگەن جاعدايدا جاۋاپكەرشىلىككە تارتىپ، ايىپپۇل سالۋ جاعىن قاراستىرعان دۇرىس» – دەگەن ۇسىنىس ايتتى.
سونداي-اق، ونلاين سەميناردا جارناما ءماتىنىن سوزبە-ءسوز اۋدارماي، ءتىل زاڭدىلىعىن ساقتاي وتىرىپ، تىلگە جەڭىل، ايتۋعا وڭاي ەتىپ بەرۋ جاعىن ورنىقتىرۋ ماسەلەسىن كوتەردى. ا.بايتۇرسىنۇلى اتىنداعى ءتىل ءبىلىمى ينستيتۋتىنىڭ جەتەكشى عىلىمي قىزمەتكەرى اينۇر سەيتبەكوۆا كيريلل جازۋىمەن بولعان جارناما ماتىندەرىندەگى كەمشىلىكتەردى قايتا بولدىرماۋدىڭ جولدارىن ىزدەستىرىپ، قوعامنىڭ جاڭا ءالىپبيدى جارناما ىسىندە ساۋاتتى پايدالانۋىنا جاعداي جاسالۋ قاجەتتىگىن، ال ونداي قاجەتتى قادام جاڭا ەملە بويىنشا جارناما ماتىندەرىنىڭ ءبىرىزدى جازىلۋىنا باعىتتالعان وسىنداي نۇسقاۋلىقتار مەن انىقتاعىشتار ەكەندىگىن اتاپ وتتى.
نلاين سەمينارعا الماتى وبلىسىنىڭ ءتىل وقۋ-ادىستەمەلىك ورتالىعىنىڭ، سولتۇستىك قازاقستان وبلىسى "تىلدەردى وقىتۋ ورتالىعىنىڭ»، اقمولا وبلىستىق وقۋ-ادىستەمەلىك ورتالىعىنىڭ، شقو تىلدەردى دامىتۋ جانە ۇيلەستىرۋ جۇمىسى ءبولىمىنىڭ، قاراعاندى وبلىسىنىڭ ءتىلدى دامىتۋ جونىندەگى باسقارماسىنىڭ، قوستاناي وبلىسى اكىمدىگىنىڭ تىلدەردى دامىتۋ باسقارماسىنىڭ باسشىلارى مەن ماماندارى قاتىستى.
