Sh.Shaıahmetov atyndaǵy «TIL-QAZYNA» ulttyq ǵylymı-praktıkalyq ortalyǵynyń uıymdastyrýymen «Latyn grafıkaly keńistiktegi jarnama saýattylyǵy» atty respýblıkalyq onlaın semınar ótti.
Onlaın semınarda orfografııalyq top músheleri ázirlegen «Grafıkalyq keńistiktegi jarnama» nusqaýlyǵy talqyǵa salyndy. Sarapshy mamandar tarapynan jarnama saýattylyǵyna qatysty ózekti máseleler kóterilip, birqatar usynys pikirler aıtyldy. «Til-Qazyna» ortalyǵynyń atqarýshy dırektory Erbol Tilesh:
- Jarnamanyń saýatty bolǵany jón, saýattylyq emle men pýnktýaııa erejelerine ǵana emes, mazmunǵa da kerek. Sondyqtan saýattylyq máselesimen qatar jarnama mátininiń ishki mazmunyna da mán berip, ásirese, ulttyq tanymnyń tildik kórinisterin keńinen kórsek ıgi bolar edi. Jarnama tili jańa álipbıge kóshkende túzeler degen úlken úmit bar. Osy onlaın semınar aldaǵy orasan jumystardyń basy» - dep atap ótti.
«Ulan» gazetiniń redaktory Juldyz Ábdilda:
- Jurt kitap oqymaýy múmkin, gazet-jýrnalǵa jazylmaýy múmkin, biraq kóshedegi jarnamany mindetti túrde kóredi, kórgen soń oqıdy. Vızýal dúnıe adamnyń esinde mindetti túrde qalady. Sondyqtan jarnama mátininiń saýatty bolýy óte mańyzdy» ekendigin aıta otyryp: «Jarnama berýshilerden saýatty mátin talap etý, qate ketken jaǵdaıda túzetýge daıyn bolýyn talap etý, túzetpegen jaǵdaıda jaýapkershilikke tartyp, aıyppul salý jaǵyn qarastyrǵan durys» – degen usynys aıtty.
Sondaı-aq, onlaın semınarda jarnama mátinin sózbe-sóz aýdarmaı, til zańdylyǵyn saqtaı otyryp, tilge jeńil, aıtýǵa ońaı etip berý jaǵyn ornyqtyrý máselesin kóterdi. A.Baıtursynuly atyndaǵy Til bilimi ınstıtýtynyń jetekshi ǵylymı qyzmetkeri Aınur Seıtbekova kırıll jazýymen bolǵan jarnama mátinderindegi kemshilikterdi qaıta boldyrmaýdyń joldaryn izdestirip, qoǵamnyń jańa álipbıdi jarnama isinde saýatty paıdalanýyna jaǵdaı jasalý qajettigin, al ondaı qajetti qadam jańa emle boıynsha jarnama mátinderiniń birizdi jazylýyna baǵyttalǵan osyndaı nusqaýlyqtar men anyqtaǵyshtar ekendigin atap ótti.
nlaın semınarǵa Almaty oblysynyń Til oqý-ádistemelik ortalyǵynyń, Soltústik Qazaqstan Oblysy "Tilderdi oqytý ortalyǵynyń», Aqmola oblystyq oqý-ádistemelik ortalyǵynyń, ShQO Tilderdi damytý jáne úılestirý jumysy bóliminiń, Qaraǵandy oblysynyń tildi damytý jónindegi basqarmasynyń, Qostanaı oblysy ákimdiginiń tilderdi damytý basqarmasynyń basshylary men mamandary qatysty.
