قىرعىزستان پرەزيدەنتى سادىر جاپاروۆ 2030 جىلعا دەيىنگى ۇلتتىق دامۋ باعدارلاماسىن بەكىتتى، دەپ حابارلايدى "ادىرنا" ۇلتتىق پورتالى فەرعاناعا سىلتەپ.
بۇل ستراتەگيالىق قۇجات ەلدىڭ ورتا مەرزىمدى كەزەڭدەگى دامۋ باسىمدىقتارى مەن ماقساتتارىن ايقىنداپ، قىرعىز رەسپۋبليكاسىنىڭ تۇراقتى دامۋىن قامتاماسىز ەتۋگە باعىتتالعان.
مەملەكەت باسشىسىنىڭ ءباسپاسوز قىزمەتى تاراتقان مالىمەت بويىنشا، باعدارلاما حالىقتىڭ ءومىر ءسۇرۋ ساپاسىن ارتتىرۋعا، ادامي كاپيتالدى دامىتۋعا جانە قوعامداعى رۋحاني قۇندىلىقتاردى نىعايتۋعا باسىمدىق بەرەدى.
باعدارلامادا ەل دامۋىنىڭ ءتورت نەگىزگى باعىتى كورسەتىلگەن. ءبىرىنشىسى – يندۋستريالاندىرۋ. بۇل باعىت زاماناۋي، ارتاراپتاندىرىلعان وندىرىستىك بازا قالىپتاستىرۋدى، كلاستەرلىك ءتاسىلدى قولدانۋدى جانە جوعارى قوسىمشا قۇنى بار ءونىم ەكسپورتىن ۇلعايتۋدى كوزدەيدى.
ەكىنشى باعىت – قىرعىزستاندى وڭىرلىك حابقا اينالدىرۋ. ەلدىڭ قىتايمەن، ەۋرازيالىق ەكونوميكالىق وداق مەملەكەتتەرىمەن، ورتالىق جانە وڭتۇستىك ازيا ەلدەرىمەن شەكارالاس ورنالاسۋى ترانزيتتىك جانە لوگيستيكالىق الەۋەتتى دامىتۋعا مۇمكىندىك بەرەدى.
ءۇشىنشى باعىت – اۋىل شارۋاشىلىعى مەن تۋريزم. قىرعىزستان ەكولوگيالىق تازا اۋىل شارۋاشىلىعى ونىمدەرىن وندىرۋگە جانە ونى تەرەڭ وڭدەۋگە قابىلەتتى. تابيعي لاندشافت پەن مادەني مۇرا نەگىزىندە اگروتۋريزم مەن ەكوتۋريزمدى دامىتۋ كوزدەلگەن.
ءتورتىنشى باعىت – جاسىل ەنەرگەتيكا. ەلدىڭ گيدروەنەرگەتيكالىق الەۋەتى مەن جاڭارتىلاتىن ەنەرگيا كوزدەرىن دامىتۋ ارقىلى ەنەرگەتيكالىق قاۋىپسىزدىك قامتاماسىز ەتىلىپ، قىرعىزستان «جاسىل» ينۆەستيتسيالار ءۇشىن تارتىمدى الاڭعا اينالۋى ءتيىس.
باعدارلاما اياسىندا 2030 جىلعا دەيىنگى نەگىزگى ماقساتتار دا كورسەتىلگەن. اتاپ ايتقاندا، جالپى ىشكى ءونىم كولەمىن 30 ميلليارد دوللارعا دەيىن جەتكىزۋ، جان باسىنا شاققانداعى ءجىو-ءنى 4500 دوللارعا دەيىن ارتتىرۋ، ەكونوميكانىڭ جىلدىق ناقتى ءوسىمىن كەمىندە 8 پايىز دەڭگەيىندە ساقتاۋ، تۇراقتى دامۋ ماقساتتارى بويىنشا ۇزدىك 30 ەل قاتارىنا ەنۋ جانە ادام دامۋى يندەكسىندەگى كورسەتكىشتى كەمىندە 10 پوزيتسياعا جاقسارتۋ جوسپارلانعان.
پرەزيدەنت جاپاروۆ باعدارلامانىڭ ناتيجەسى ەسەپتەردە ەمەس، حالىقتىڭ كۇندەلىكتى ومىرىندە — ساپالى جولدار، زاماناۋي مەكتەپتەر مەن اۋرۋحانالار، جاقسى جالاقىلى جۇمىس ورىندارى، تازا قورشاعان ورتا مەن ءتيىمدى مەملەكەتتىك قىزمەتتەر ارقىلى كورىنۋى ءتيىس ەكەنىن اتاپ ءوتتى.
ول ەلدىڭ بولاشاعى ءار ازاماتتىڭ بەلسەندى قاتىسۋىنا بايلانىستى ەكەنىن ايتىپ، باعدارلامانىڭ تابىستى جۇزەگە اساتىنىنا سەنىم ءبىلدىردى.
