Qyrǧyzstan prezidentı Sadyr Japarov 2030 jylǧa deiıngı ūlttyq damu baǧdarlamasyn bekıttı, dep habarlaidy "Adyrna" ūlttyq portaly Ferǧanaǧa sıltep.
Būl strategiialyq qūjat eldıŋ orta merzımdı kezeŋdegı damu basymdyqtary men maqsattaryn aiqyndap, Qyrǧyz Respublikasynyŋ tūraqty damuyn qamtamasyz etuge baǧyttalǧan.
Memleket basşysynyŋ baspasöz qyzmetı taratqan mälımet boiynşa, baǧdarlama halyqtyŋ ömır süru sapasyn arttyruǧa, adami kapitaldy damytuǧa jäne qoǧamdaǧy ruhani qūndylyqtardy nyǧaituǧa basymdyq beredı.
Baǧdarlamada el damuynyŋ tört negızgı baǧyty körsetılgen. Bırınşısı – industriialandyru. Būl baǧyt zamanaui, ärtaraptandyrylǧan öndırıstık baza qalyptastyrudy, klasterlık täsıldı qoldanudy jäne joǧary qosymşa qūny bar önım eksportyn ūlǧaitudy közdeidı.
Ekınşı baǧyt – Qyrǧyzstandy öŋırlık habqa ainaldyru. Eldıŋ Qytaimen, Euraziialyq ekonomikalyq odaq memleketterımen, Ortalyq jäne Oŋtüstık Aziia elderımen şekaralas ornalasuy tranzittık jäne logistikalyq äleuettı damytuǧa mümkındık beredı.
Üşınşı baǧyt – auyl şaruaşylyǧy men turizm. Qyrǧyzstan ekologiialyq taza auyl şaruaşylyǧy önımderın öndıruge jäne ony tereŋ öŋdeuge qabılettı. Tabiǧi landşaft pen mädeni mūra negızınde agroturizm men ekoturizmdı damytu közdelgen.
Törtınşı baǧyt – jasyl energetika. Eldıŋ gidroenergetikalyq äleuetı men jaŋartylatyn energiia közderın damytu arqyly energetikalyq qauıpsızdık qamtamasyz etılıp, Qyrǧyzstan «jasyl» investisiialar üşın tartymdy alaŋǧa ainaluy tiıs.
Baǧdarlama aiasynda 2030 jylǧa deiıngı negızgı maqsattar da körsetılgen. Atap aitqanda, jalpy ışkı önım kölemın 30 milliard dollarǧa deiın jetkızu, jan basyna şaqqandaǧy JIÖ-nı 4500 dollarǧa deiın arttyru, ekonomikanyŋ jyldyq naqty ösımın kemınde 8 paiyz deŋgeiınde saqtau, tūraqty damu maqsattary boiynşa üzdık 30 el qataryna enu jäne adam damuy indeksındegı körsetkıştı kemınde 10 pozisiiaǧa jaqsartu josparlanǧan.
Prezident Japarov baǧdarlamanyŋ nätijesı esepterde emes, halyqtyŋ kündelıktı ömırınde — sapaly joldar, zamanaui mektepter men auruhanalar, jaqsy jalaqyly jūmys oryndary, taza qorşaǧan orta men tiımdı memlekettık qyzmetter arqyly körınuı tiıs ekenın atap öttı.
Ol eldıŋ bolaşaǧy är azamattyŋ belsendı qatysuyna bailanysty ekenın aityp, baǧdarlamanyŋ tabysty jüzege asatynyna senım bıldırdı.
