Taşkentte ötken syrtqy investorlar keŋesınıŋ üşınşı plenarlyq otyrysynda Özbekstan prezidentı 2028 jylǧa deiın bizneske salynatyn negızgı salyq mölşerlemelerı özgermeitının mälımdedı, dep habarlaidy “Adyrna” ūlttyq portaly Ferǧanaǧa sıltep.
Būl turaly memleket basşysynyŋ baspasöz qyzmetı habarlady.
Keŋes qūramyna älemdık ırı kompaniialar men halyqaralyq qarjy ūiymdarynyŋ ökılderı enedı. Jiynda prezident törtınşı Taşkent investisiialyq forumynyŋ nätijelerın oŋ baǧalap, «Jaŋa Özbekstandy» damytu jolyndaǧy qoldaulary üşın qatysuşylarǧa alǧys bıldırdı.
Mirziioev soŋǧy jyldary şeteldık ärıptestermen yntymaqtastyq aiasynda aitarlyqtai ılgerıleuşılıkke qol jetkızılgenın atap öttı. Mäselen, ötken jyly Europalyq qaita qūru jäne damu bankı Özbekstan ekonomikasyna rekordtyq kölemde – 1 mlrd AQŞ dollaryna juyq investisiia salǧan. Būl körsetkış boiynşa Özbekstan Ortalyq Aziia elderınıŋ ışınde köş bastady.
Sondai-aq jeke kompaniialar men banktermen bırlesken jobalar portfelı 1 mlrd dollardan asty. «Jasyl» energetika, qaldyqtardy öŋdeu, energiiany saqtau, «jasyl» sutegı öndıru sekıldı baǧyttarda bırlesken bastamalar jüzege asyryluda.
Sifrlyq tehnologiia salasynda da belsendı yntymaqtastyq ornaǧan. Mysaly, DataVolt kompaniiasy öŋırdegı eŋ ırı «jasyl» derekter ortalyǧyn qūru jobasyn qolǧa alsa, Veon jasandy intellekt negızınde mobildı qosymşa äzırleude.
«Būl – şeteldık investorlardyŋ bızdıŋ reformalarymyz ben aşyqtyq saiasatyna degen joǧary senımınıŋ aiqyn dälelı», – dedı Mirziioev.
Soŋǧy ekı jylda Özbekstanda şeteldık kapital qatysqan 5,5 myŋ jaŋa käsıporyn aşylyp, olardyŋ jalpy sany 16 myŋǧa jetken. Biylǧy otyrys aiasynda salyq jüiesın reformalau men infraqūrylymdyq jobalarǧa jeke sektordy tartu sekıldı 40-tan astam jaŋa bastama ırıkteldı.
Memleket basşysy aǧymdaǧy jyly memlekettık-jekemenşık ärıptestık negızınde 4,5 mlrd dollarlyq jobalar ıske qosylǧanyn mälımdedı. Būl jobalar jol salu, sumen jabdyqtau, irrigasiia siiaqty salalardy qamtidy.
Sonymen qatar, halyqaralyq standarttarǧa säikes qarjylyq eseptılık, ekologiialyq, äleumettık jäne korporativtık basqaru jüiesın engızu boiynşa normativtık-qūqyqtyq qūjattar äzırlenıp jatyr.
Prezident barlyq ūsynystar mūqiiat qaralyp, ärbır bastama boiynşa jeke «jol kartasy» äzırlenetının aitty. Elde jaŋa jūmys toptary qūrylmaq.
«Taǧy bır märte atap ötkım keledı: bız investorlarǧa aşyq, erkın, tūraqty jäne senımdı Jaŋa Özbekstandy qūryp jatyrmyz», – dep tüiındedı Şavkat Mirziioev.
Ūqsas jaŋalyqtar
