اقش پرەزيدەنتى دونالد ترامپ رەسەي مەن ۋكراينا اراسىنداعى سوعىستى توقتاتۋعا باعىتتالعان بەيبىت جوسپاردىڭ سوڭعى نۇسقاسىن كەلىسۋ ءۇشىن ارنايى وكىلدەرىن ماسكەۋ مەن كيەۆكە جىبەرگەنىن مالىمدەدى. بۇل تۋرالى ول Truth Social الەۋمەتتىك جەلىسىندە جازدى، دەپ حابارلايدى «ادىرنا» ءتىلشىسى.
ترامپ ءوزىنىڭ تاپسىرماسىمەن ستيۆ ۋيتكوففتىڭ ماسكەۋدە رەسەي پرەزيدەنتى ۆلاديمير پۋتينمەن كەزدەسۋى ءتيىس ەكەنىن, ال ارميا ءمينيسترى دەن دريسكوللدىڭ ۋكراينا وكىلدەرىمەن كەلىسسوز جۇرگىزۋ ءۇشىن كيەۆكە اتتاناتىنىن ايتتى.
ء«بىز ۆيتسە-پرەزيدەنت دجەي دي ۆەنسپەن، مەملەكەتتىك حاتشى ماركو رۋبيومەن، اسكەري مينيستر پيت حەگسەتپەن جانە اق ءۇي اكىمشىلىگىنىڭ باسشىسى سيۋزي ۋايلسپەن بىرگە بارلىق پروگرەستى باقىلاپ وتىرامىز»، — دەدى اقش پرەزيدەنتى.
سونداي-اق دونالد ترامپ ۋكراينا پرەزيدەنتى ۆلاديمير زەلەنسكي جانە رەسەي پرەزيدەنتى ۆلاديمير پۋتينمەن كەزدەسۋگە اسىق ەكەنىن ايتتى. الايدا مۇنداي كەزدەسۋ سوعىستى توقتاتۋ جونىندەگى كەلىسىم تولىق دايىن بولعاندا نەمەسە ازىرلەۋ جۇمىستارى سوڭعى كەزەڭگە جەتكەندە عانا وتەتىنىن اتاپ ءوتتى.
«سوڭعى ايدا 25 مىڭ سارباز قازا تاپتى. اقش ازىرلەگەن 28 تارماقتان تۇراتىن باستاپقى جوسپار ەكى تاراپتىڭ ۇسىنىستارىمەن قايتا وڭدەلدى، قازىر تەك بىرنەشە داۋلى تارماق قالدى»,-دەدى ول.
بۇعان دەيىن ترامپ جۋرناليستەرگە جوسپاردىڭ 28 تارماقتان 22 تارماققا قىسقارتىلعانىن حابارلاعان. سونداي-اق باستاپقى ۇسىنىلعان قۇجاتتىڭ «جاي عانا كارتا» بولعانىن جانە «رەسەي ءۇشىن تىم ءتيىمدى» دەپ ەسەپتەلگەنىن ايتقان.
باستاپقى نۇسقاعا سايكەس، ۋكراينا كەيبىر جەرلەردەن باس تارتىپ، اسكەر سانىن قىسقارتۋى ءتيىس ەدى. سونداي-اق ناتو-عا مۇشە بولۋ يدەياسىنان ءبىرجولا باس تارتۋى قاجەت بولاتىن. ال رەسەيگە سانكتسيالاردىڭ جۇمسارۋى جانە G8 فورماتىنا قايتا ورالۋ مۇمكىندىگى قاراستىرىلعان.
