ۋكراينا پرەزيدەنتى رەسەيلىك «ياندەكسكە» جاسالعان سوققىدان كەيىن جەلىلەردەگى بوتتاردىڭ ازايعانىن ايتتى، دەپ حابارلايدى “ادىرنا”.
بۇل تۋرالى ول 12 قازاندا ۆارشاۆا قاۋىپسىزدىك فورۋمىندا سويلەدى.
زەلەنسكيدىڭ سوزىنشە، ۋكراينا سوققىلارىنىڭ ناتيجەسىندە الەۋمەتتىك جەلىلەردەگى اقپاراتتىق احۋال وزگەرگەن. پرەزيدەنت بوتتار سانىنىڭ ازايۋى ارانداتۋشىلىق پەن قوعامدى جىككە ءبولۋ ارەكەتتەرىنىڭ باسەڭدەۋىنە ىقپال ەتكەنىن اتاپ ءوتتى.
«ياندەكستىڭ» داتا-ورتالىقتارى سوڭعى كۇندەرى ۋكراينا ۇشقىشسىز ۇشۋ اپپاراتتارىنىڭ شابۋىلىنا ۇشىراعان. نىساندار رەسەيدىڭ ريازان وبلىسىنداعى ساسوۆو قالاسىندا، كالۋگا جانە ۆلاديمير وبلىستارىندا ورنالاسقان.
كومپانيا ۆلاديمير وبلىسىنداعى داتا-ورتالىقتىڭ ينفراقۇرىلىمى زاقىمدانعانىن راستادى. مالىمدەمەگە سايكەس، نىساننىڭ جۇمىسى تولىق توقتاپ، قالعان ينفراقۇرىلىم رەسۋرستارى تۇراقسىز جۇمىس ىستەگەن.
Cloudflare Radar سەرۆيسىنىڭ دەرەكتەرىنە سۇيەنگەن تالداۋ بويىنشا، جەكسەنبى كۇنى «ياندەكس» جەلىسىندەگى اۆتوماتتاندىرىلعان ترافيك كولەمى قىركۇيەكتىڭ ەكىنشى جارتىسىنداعى ورتاشا كورسەتكىشپەن سالىستىرعاندا شامامەن 94 پايىزعا ازايعان.
بۇل ماسەلە اقش كونگرەسىنە قاراشا ايىنىڭ باسىندا وتەتىن ارالىق سايلاۋ قارساڭىندا ەرەكشە نازارعا ىلىكتى. الەۋمەتتىك جەلىلەر ارقىلى شەتەلدىك ىقپال ەتۋ جانە اۆتوماتتاندىرىلعان اككاۋنتتاردىڭ ساياسي پىكىرتالاستارعا اسەرى بۇعان دەيىن دە الاڭداۋشىلىق تۋعىزعان.
ايتا كەتەيىك، “ياندەكسكە” جاسالعان سوققىدان سوڭ قازاقستاندا دا قوسىمشا جۇمىسى ىستەن شىققان.
