بۇگىن ءماجىلىس رەسەيمەن بايقوڭىردا «بايتەرەك» عارىش-زىمىران كەشەنىن قۇرۋ تۋرالى كەلىسىمگە ەنگىزىلگەن وزگەرىستەردى راتيفيكاتسيالادى، دەپ حابارلايدى "ادىرنا" ۇلتتىق پورتالى.
بۇل تۋرالى ءماجىلىس دەپۋتاتى ايدوس سارىم حابارلادى.
ونىڭ ايتۋىنشا، قۇجاتتىڭ باستى ماقساتى – جاڭا ەكولوگيالىق قاۋىپسىز زىمىران كەشەنىن قۇرۋ جانە پايدالانۋ كەزىندە ەكى ەل اراسىنداعى ىنتىماقتاستىقتىڭ نەگىزگى شارتتارىن ايقىنداۋ. «بايتەرەك» جوباسى ەكى ەلدىڭ عارىش سالاسىنداعى ۇلتتىق جانە كوممەرتسيالىق باعدارلامالارىن جۇزەگە اسىرۋدىڭ باستى الاڭىنا اينالادى.
قۇجاتتاعى نەگىزگى وزگەرىستەر مىنالار:
رەسەي تاراپىنىڭ جوسپارلاعان ۇشىرىلىم سانى 2028–2039 جىلدارى ەكىدەن ۇشكە دەيىن كوبەيتىلدى;
رەسەيلىك تاراپقا ققس بويىنشا نولدىك مولشەرلەمە ەنگىزىلدى;
«بايتەرەك» اق ءۇشىن كورپوراتيۆتىك تابىس سالىعىنا 15 جىلعا دەيىن سالىقتىق جەڭىلدىكتەر بەرىلەدى;
ۇشۋ سىناقتارىنىڭ باستالۋ مەرزىمى 2023 جىلدان 2025 جىلعا شەگەرىلدى.
بارلىق ءماجىلىس كوميتەتتەرى كەلىسىمگە وڭ قورىتىندى بەرگەن.
«بايتەرەك» عارىش-زىمىران كەشەنى – 2004 جىلى باستالعان قازاقستان مەن رەسەيدىڭ بىرلەسكەن جوباسى. جوبا بايقوڭىردا ەكولوگيالىق تۇرعىدا قاۋىپسىز زىمىران-تاسىعىشتاردى ۇشىرۋعا ارنالعان ينفراقۇرىلىم قۇرۋدى كوزدەيدى.
ايتا كەتەيىك، وسى زاڭ جوباسىن ءماجىلىس دەپۋتاتتارى 2025 جىلعى اقپاندا قاراۋعا قابىلداعان بولاتىن.
ەسكە سالساق، 2020 جىلدىڭ قازان ايىندا قازاقستان مەن رەسەي «بايتەرەك» عارىش-زىمىران كەشەنىن قۇرۋ تۋرالى كەلىسىمشارتقا قول قويعان. جوبانىڭ ماقساتى – «سويۋز-5» جانە ونىڭ موديفيكاتسيالارىن قاۋىپسىز ۇشىرۋدى قامتاماسىز ەتۋ. بىراق جوبا بىرنەشە رەت كەيىنگە شەگەرىلدى.
