الماتى وبلىسى، شەلەك اۋىلىنىڭ 1982 جىلعى تۋماسى، جۇك كولىگىنىڭ جۇرگىزۋشىسى نۇرجان جاناەۆ باق پەن قۇزىرلى ورگانداردان كومەك سۇرايدى. وتانداسىمىز بەس كۇننەن بەرى كەدەندىك قۇجاتتارعا بايلانىستى ازەربايجان اۋماعىنان شىعا الماي وتىر.
جۇرگىزۋشىنىڭ ايتۋىنشا، ول قىتايدان ازەربايجانعا ءبىرىنشى رەت كولىك تاسىمالداپ بارعان. بۇل ساپارىندا ول سەگىز كولىك الىپ بارعان، ءار ەكى كولىككە ءبىر CMR جۇكقۇجاتى راسىمدەلگەن. بارلىعى ءتورت CMR قۇجاتى بولعان.
«مەن بارلىق قۇجاتتاردى تەكسەرۋگە تەرەزەدەن بەردىم. قايتارعانان كەيىن بايقاسام، قولىمداعى قۇجاتتار تولىق ەمەس، ىشىندە ءبىر-ءبىر پاراقتان جوق. ءبىر قۇجاتتا ءۇش بەتتىڭ بىرەۋى جوق، ەكىنشىسىندە شوت-فاكتۋرا جەتىسپەيدى. سولاي الىپ قالعان سياقتى. ءوزىم جوعالتسام تولىق قۇجاتتى جوعاتپايمىن با، اراسىنان ءبىر-بىردەن ەمەس»، — دەيدى جاناەۆ.
ول ازەربايجاننان شىعۋعا ارەكەت جاساعان كەزدە، شەكارا قىزمەتكەرلەرى قۇجاتتاردىڭ تولىق ەمەستىگىن ايتىپ، ونى وتكىزۋدەن باس تارتقان.
«مەن قىتايدان قۇجاتتاردىڭ كوشىرمەسىن سۇرادىم، ولار ماعان PDF فورماتىندا جىبەردى. ءسويتىپ جوق قۇجاتتاردى تولتىرعان بولدىم، بىراق ەندى ولاردا رەسەيدىڭ قىزىل ءمورى بولۋى كەرەك دەيدى. ال ول ءمورسىز مەنى شىعارماي وتىر»، — دەپ ءتۇسىندىردى جۇرگىزۋشى.
ول ءمور قولىنداعى قۇجاتتىڭ كوشىرمەسىندە انىق كورىنىپ تۇرعانىن ايتادى. قۇجاتتى قابىلداپ العان كەزدە تۇپنۇسقانى الىپ قالىپ، كوشىرمەسىن بەرەدى، سول كوشىرمەدە قىزىل ءمور بار. الايدا ونى قابىلداماي وتىر، دەيدى ول.
جاعدايدى قيىنداتىپ تۇرعان جايت — شەكارادا ونىڭ تولقۇجاتىن كەپىل رەتىندە الىپ قويعان.
«ال ەندى ءمور قوي دەپ جاتىر، ال مەندە قۇجات تا، تولقۇجات تا جوق بولعاندىقتان، ول جەرگە (تەرمينالعا – رەد.) كىرە الماي وتىرمىن»، — دەيدى ول.
جاناەۆتىڭ ايتۋىنشا، ول قازاقستان ەلشىلىگىنە دە جۇگىنگەن. كونسۋل اسەل ەسىمدى قىزمەتكەر كومەكتەسەمىن دەپ ۋادە بەرگەن، بىراق ۋادە ورىندالماعان.
«ول «قازىر، قازىر» دەدى، بىراق ءبىراز ۋاقىت وتكەنىمەن، ەشقانداي ارەكەت جاسامادى. مەنىڭ كولىكتە جاتقانىمa بەس كۇن بولدى»، — دەدى جۇرگىزۋشى.
ول وسى ماسەلەگە باق نازار اۋدارسا، دەيدى. ويتكەنى قۇربان ايتقا بايلانىستى شەكارا جابىلسا، جاعدايى مۇلدەم قيىنداعالى تۇرعانىن ايتادى.
