شەرزات پولاتتىڭ ولىمىنە قاتىستى ءوتىپ جاتقان سوت پروتسەسىندە جابىرلەنۋشى تاراپ كۋاگەرلەر ەلميرا نۇربەكوۆا، دانا جاقسىكەلدى جانە ارلان قازىكەنوۆتى قايتا جاۋاپ الۋ ءۇشىن سوتقا شاقىرۋدى سۇرادى، دەپ حابارلايدى "ادىرنا" ۇلتتىق پورتالى.
الايدا بۇل ءوتىنىش سوت تاراپىنان قابىلدانبادى.
جابىرلەنۋشىلەردىڭ ادۆوكاتىنىڭ ايتۋىنشا، كەشەگى سوت وتىرىسىندا ۇسىنىلعان بەينەجازبا كۋاگەرلەردىڭ وقيعا كەزىندە "شوك" جاعدايىندا بولماعانىن كورسەتكەن.
"ولار بارلىق ءمان-جايدى جاقسى ءبىلىپ وتىرعان. سوندىقتان ولاردىڭ قىلمىسقا قاتىسى بولۋى مۇمكىن دەگەن ۋاجبەن قايتا جاۋاپ الۋدى سۇرايمىز", — دەدى قورعاۋشى.سۋديا بۇل ءوتىنىشتى قاناعاتتاندىرۋدان باس تارتتى.
"اتالعان كۋاگەرلەرگە قاتىستى سوتقا دەيىنگى تەرگەپ-تەكسەرۋ ورگاندارى تاراپىنان ءالى ناقتى شەشىم قابىلدانباعاندىقتان، سوت ولاردىڭ جاۋابىن قايتا قاراۋعا نەگىز جوق دەپ ەسەپتەيدى", — دەپ ءتۇسىندىردى ول.سونداي-اق، سوت وتىرىسىندا جابىرلەنۋشى تاراپ ەكىنشى ءوتىنىشحات جولدادى. وندا جابىرلەنۋشىلەر قادىروۆا جۇمابيكە، نۇرىموۆ قارجاۋباي جانە بيشەمبيەۆا گۇلبارام دەنساۋلىق جاعدايىنا بايلانىستى سوت وتىرىسىنا كەلە المايتىنىن مالىمدەپ، ءوز جاۋاپتارىن قولدايتىنىن جانە ءىستىڭ ولاردىڭ قاتىسۋىنسىز قارالۋىنا قارسى ەمەستىگىن جەتكىزگەن. الايدا سوتتالۋشى ابزال شىناسىلدىڭ ادۆوكاتى جۇمان ابەنوۆ بۇل وتىنىشكە قارسىلىق ءبىلدىرىپ، اتالعان جابىرلەنۋشىلەردىڭ سوتتا مىندەتتى تۇردە جەكە قاتىسىپ، بۇرىنعى جاۋاپتارىنان ناقتى قايسىسىنا توقتالاتىنىن ءتۇسىندىرۋى قاجەت ەكەنىن ايتتى. سۋديا بولسا، بۇل ماسەلەگە قاتىستى تاراپتارعا سوت تەرگەۋى كەزىندە سۇراق قويۋعا جانە قىلمىستىق ءىس قۇجاتتارىنا سىلتەمە جاساۋعا تولىق مۇمكىندىك بەرىلگەنىن ەسكەرتىپ، ءىستى جابىرلەنۋشىلەردىڭ قاتىسۋىنسىز قاراۋدى جالعاستىرۋ تۋرالى شەشىم قابىلدادى. سوت وتىرىسى جالعاسۋدا.
ۇقساس جاڭالىقتار
