ەسترادا سالاسىندا ساحناعا كۇنى كەشە كەلگەن ءانشىنىڭ ءبىر جىل وتپەي-اق كونتسەرت بەرۋى ابدەن مۇمكىن بۇگىندە. ال ءداستۇرلى ءان سالاسىندا بۇل ەكەۋىنە قول جەتكىزۋ – ءانشى ءۇشىن ءبىر بەلەس، ال تىڭدارمان ءۇشىن – ايتارلىقتاي وقيعا.بۇل – ۇلتتىق ونەرىمىزدىڭ مۇڭ-مۇقتاجىن جوقتاپ جۇرگەن ادامداردىڭ بارىنە ورتاق ماسەلە. بۇل جەردە ماسەلە – ءداستۇرلى ءانشىلەردىڭ كاسىبي دەڭگەيىندە ەمەس، ەسترادانىڭ تىڭدارمانى، تەحنيكالىق مۇمكىندىك جانە قارجىلاي جاعدايىنىڭ كوش ىلگەرىلىگىندە.
تىلەۋلەس قۇرمانعاليەۆ، ءانشى: – قازىرگى ءبىزدىڭ قوعام ەسترادامەن عانا قورەكتەنىپ وتىر دەۋگە بولادى. بۇل – ماقتانارلىق جاعداي ەمەس، كەرىسىنشە، وكىنىشپەن اۋىزعا الاتىنداي ماسەلە. قوعامنىڭ سول احۋالىن كورىپ وتىرعان سوڭ، مەندە جەكە انجيناق شىعاراتىن وي دا، قاراجات تا بولعان جوق. مادەنيەت مينيسترلىگىنىڭ تاپسىرماسىمەن «ەل» پروديۋسەرلىك ورتالىعى شىعارعان «قازاقتىڭ 1000 ءانى» جيناعىن قۇراستىرۋعا اتسالىسقانىم بار ەدى. سول كەزدە كوپشىلىك جۇرت ونشا بىلە بەرمەيتىن اندەردى تاۋىپ، جيناققا قوسقانىمدى كورگەن ءبىرشاما اعالارىمىز: «سەن كوپ ءان بىلەدى ەكەنسىڭ ءارى داۋىس مۇمكىندىگىڭدى دە بىلەمىز، نەگە ديسكىڭدى شىعارماسقا؟!» – دەگەن بولاتىن. «شىعارىپ بەرەتىن ادامدار بولسا، قانەكەي؟» – دەگەنىم بولماسا، ول اڭگىمە سول جەردە قالعان. ارادا ءبىرشاما ۋاقىت وتكەن سوڭ ول اڭگىمەنى قايتا قوزعاپ، شىندىققا اينالدىرعان سەرجان مولداسانۇلى دەگەن ازامات بولدى. «تاكە، ارتىڭدا وكشە باسىپ كەلە جاتقان ىنىلەرىڭنىڭ ءوزى جيناق شىعارىپ جاتقاندا، ەندىگىدە سەنىكى كەش بولىپ كەتەدى»، – دەپ، بىردەن وسىعان كىرىستى. مىنە – سونىڭ ءناتيجەسى.
ءداستۇرلى ءان ونەرىندەگى ارقا مەكتەبىنىڭ وكىلى، قايرات بايبوسىنوۆ جانە ەرجان قوسبارماقوۆ سىندى ءان ءدۇلدۇلدەرىنىڭ شاكىرتى تىلەۋلەس قۇرمانعاليەۆتىڭ قولىنا دومبىرا ۇستاپ، قازاق ءانىن اۋەلەتۋگە ۇلەس قوسىپ كەلە جاتقانىنا دا ءبىرشاما ۋاقىت تولدى دەسەك بولعانداي. ەگەر سونىڭ بارلىعىن جيناقتار بولسا، ءبىر تاسپاعا سىيماسى انىق. سوندىقتان بۇل جيناققا ءانشى ەل ونشا بىلە بەرمەيتىن، حالىق اراسىندا ساقتالىپ قالعان جاڭا اندەر ەنگىزگەن.
سونداي-اق، ءبىر ايتا كەتەرلىگى، ءاۋ باستا ءوزى ارقا مەكتەبىمەن اۋىزدىقتانسا-داعى، قازاقتىڭ قاي ءوڭىرىنىڭ ءانى بولسىن قازاق بالاسىنا جات ەمەس. سونىڭ دالەلىندەي، تىلەۋلەس ءانشى «ويقاراعاي» تاسپاسىنا جەتىسۋ اندەرىن ەنگىزىپ وتىرسا كەرەك. بۇل – ءبىر جاعىنان، ءانشىنىڭ ءوزى ايتپاقشى، «الدىمىزداعى نەشە بۋىن ورىنداپ كەتكەن اندەردى» قايتالاعانشا، جاڭا اندەردى جارىققا شىعارۋ ماقساتىنان دا تۋعان وي، ياعني ءداستۇرلى ءان ونەرىندە ءوز سوقپاعىن سالىپ، سونىڭ ءبىر كەتىگىن تولتىرۋعا دەگەن تالپىنىس تا.
قازىردىڭ وزىندە راديودان بەرىلىپ جاتقان الگى اندەردى قۇلاعى شالعان تىڭدارمان انشىگە حابارلاسىپ، العىستارىن ايتىپ جاتسا كەرەك. سوعان قاراپ، ءان جيناق ءوز تىڭدارمانىن تابادى ءارى ءوز كەزىندە ءدال شىققان تۋىندى بولىپ قالار دەپ ءۇمىت ارتاتىنىن ءانشى جاسىرمادى. تىلەۋلەس قۇرمانعاليەۆتى ەل الدىمەن ءداستۇرلى ءانشى دەپ تانىسا، ەكىنشى جاعىنان، ول كەزىندە «سەرپەر» اتتى ەتنوتوپتىڭ مۇشەسى دە بولدى. مارقۇم بيعازى تۇتقابەكوۆ دەگەن ازامات قايتىس بولعان سوڭ، الگى توپتىڭ تاراعانى جۇرتشىلىققا ءمالىم. بۇگىندە وسى ەتنو باعىتتا كورەرمەننىڭ ىقىلاسىنا بولەنىپ جۇرگەن «قوڭىر»، «سەرىلەر» سىندى توپتار ءوز باستاۋىن سول «سەرپەردەن» الدى دەسەك، ەش قاتەلەسپەسىمىز انىق. سازگەر ءارى شەبەر ارلەۋشى، پروديۋسەر باعلان وماروۆ قۇرعان «سەرپەر» العاش ەستراداعا ۇلتتىق ءۇن، ۇلتتىق كەسكىن-كەلبەت، ءتىپتى ۇلتتىق مىنەز دە الىپ كەلگەنىن كوزىقاراقتى وقىرمان بىلۋگە ءتيىس. توپ مۇشەسى بيعازى تۇتقابەكوۆتىڭ كەنەتتەن كەلگەن اجالى تەك توپتىڭ عانا ەمەس، ەسترادادا ەكپىندەي وزىپ، ەلدىڭ رۋحىن وياتىپ كەلە جاتقان الگىندەي باعىتتىڭ دا تىزگىنىن تارتىپ قويعان جايى بار. سودان كەيىن ءبىر جىلعا دەيىن قارا جامىلعان ازاماتتىڭ ءبىرى وسى تىلەۋلەس قۇرمانعاليەۆ بولاتىن. اۋەلى دوستىڭ ارۋاعىن سىيلاۋ، سوسىن ۇلتتىق ءجون-جوسىققا دەگەن قۇرمەت سوڭىندا انشىگە وسىنداي قۋانىش، وسىنداي جەتىستىك بولىپ قايتىپ وتىر دەۋگە بولادى.
ءماريام جاگورقىزى، «الاش ايناسى».