اقتاۋداعى جاعاجايدا Toyota ماركالى پيكاپ جۇرگىزۋشىسى ءجۇزۋ قۇرالىن سۋعا ءتۇسىرۋ ءۇشىن تەڭىزگە كىرگەن. الايدا كولىك قۇمعا باتىپ، تۇرىپ قالعان. بۇل ءسات تۇسىرىلگەن ۆيدەو جەلىدە كەڭىنەن تاراپ كەتتى، دەپ حابارلايدى “ادىرنا” Lada.kz-كە سىلتەمە جاساپ.
بەينەجازبا 25 مامىردا الەۋمەتتىك جەلىلەردە تارالعان. كادرلاردا پيكاپتىڭ تەڭىزگە كىرىپ، قۇمعا باتىپ قالعانى كورىنەدى. جاعاجايداعى دەمالۋشىلار بۇل جاعدايعا اسا ءمان بەرمەي، كوڭىل كوتەرۋدى جالعاستىرعان. بىرەۋلەر كولىك فونىندا بيلەپ جاتسا، ەندى بىرەۋلەر ءتىپتى ۇيلەنۋ تۋرالى ۇسىنىس جاساعان.
پوليتسيانىڭ ءباسپاسوز قىزمەتى بۇل وقيعانىڭ وتكەن دەمالىس كۇندەرى قالا جاعاجايلارىنىڭ بىرىندە بولعانىن راستادى.
«Toyota ماركالى اۆتوكولىكتىڭ جۇرگىزۋشىسى ءجۇزۋ قۇرالىن سۋعا ءتۇسىرۋ ماقساتىندا تەڭىزگە كىرگەن، الايدا كولىگى قۇمعا باتىپ، تۇرىپ قالعان. جۇرگىزۋشى كولىكتى ءوز كۇشىمەن شىعارعان، ەشكىم زارداپ شەككەن جوق. جۇرگىزۋشىگە قر اكىمشىلىك قۇقىقبۇزۋشىلىق تۋرالى كودەكسىنىڭ 505-بابى بويىنشا اكىمشىلىك حاتتاما تولتىرىلىپ، ەسكەرتۋ بەرىلدى»، – دەپ حابارلادى پوليتسيا وكىلدەرى.
