«ارىلۋ-وڭتۇستىك» بىرلەستىگى سەمينار-ترەنينگتەر ۇيىمداستىردى

810

جاسوسپىرىمدەردىڭ اراسىندا قۇقىق بۇزۋشىلىق ارا-تۇرا كەزدەسىپ قالىپ جاتادى. وسى «اتتەگەن-ايلاردىڭ» الدىن الۋ ءۇشىن تاربيە جۇمىستارىن بەلسەندى جۇرگىزگەن ءجون سەكىلدى.

جامبىل وبلىسى اكىمدىگى ءبىلىم باسقارماسىنىڭ مەملەكەتتىك الەۋمەتتىك تاپسىرىسى شەڭبەرىندە «ارىلۋ-وڭتۇستىك» قوعامدىق بىرلەستىگى «جاسوسپىرىمدەر اراسىندا قۇقىق بۇزۋشىلىقتىڭ الدىن الۋ شارالارىن ۇيىمداستىرۋ مەن جۇرگىزۋ» تاقىرىبىندا سەمينار-ترەنينگتەر ۇيىمداستىردى. قوعامدىق بىرلەستىكتىڭ توراعاسى داۋرەن باعجانوۆتىڭ ايتۋىنشا،  سوڭعى 8 ايدا وبلىستا كامەلەتتىك جاسقا تولماعان جاسوسپىرىمدەردىڭ قىلمىسى 13,4 پايىزعا ارقان.

«كۇندەلىكتى وتكىزىلگەن رەيدتىك جانە پروفيلاكتيكالىق شارالاردىڭ ناتيجەسىندە پوليتسيا بولىمشەسىنە 3082 كامەلەت جاسقا تولماعان ءجاسوسپىرىم جەتكىزىلگەن. ال ولاردىڭ اتا-انالارىنا 2796 اكىمشىلىك حاتتاما تولتىرىلىپ، ايىپپۇل سالىنىپتى. الايدا بۇل كورسەتكىش بىلتىرعى جىلعا قاراعاندا 496 دەرەككە ارتقان. كامەلەتكە تولماعاندار اراسىندا قىلمىستىڭ ءوسۋى وتكىر ماسەلە، ويتكەنى ولار ەرەسەكتەرگە قاراعاندا تاجىريبەسى مەن ءبىلىمىنىڭ جەتكىلىكسىزدىگىنەن كوپتەگەن پروبلەمالاردى شەشە المايدى»، – دەيدى ول.

وقۋشىلار اراسىندا قىلمىستى ازايتۋ ءۇشىن «ارىلۋ-وڭتۇستىك» قوعامدىق بىرلەستىگى تاباندى تۇردە ەڭبەك ەتىپ كەلەدى. ۇيىم ماماندارى وبلىستاعى بارلىق ون اۋدانىنداعى مەكتەپتەردە ارنايى سەمينار-ترەنينگتەر وتكىزگەن. اتالعان وقىتۋ سەمينارلارىن اباي اتىنداعى ۇلتتىق پەداگوگيكالىق ۋنيۆەرسيتەتىنىڭ وقىتۋشىسى، پسيحيكالىق ساۋىقتىرۋ ورتالىعىنىڭ مامانى مەيرامگۇل يباشوۆا جۇرگىزگەن.

«دەۆيانتتى مىنەز-قۇلىقتىڭ كوبىنە جاسوسپىرىمدەر اراسىندا كورىنىس تاباتىنىن پسيحولوگتار جاقسى بىلەدى. بۇل رەتتە ءار ساباقتا مۇعالىمدەرگە ەڭ ءبىرىنشى كەزەكتە اتا-انالارمەن بىرىگىپ جۇمىس ىستەۋگە كەڭەس بەرەمىن. بالا تاربيەسىنە كەلگەندە جان-جاقتى اسەر ەتپەسەك، جاساعان ارەكەتىمىزدىڭ ءبارى زايا كەتەدى. كوپ جاعدايدا اتا-انا مەكتەپكە كەلگەن كەزدە بالانىڭ تاربيەسىنە ەمەس، باسقا ۇساق-تۇيەك دۇنيەلەرگە بولا كەلەتىنىن تاجىريبە كورسەتىپ ءجۇر. ءجاسوسپىرىمنىڭ قىلمىسقا بارۋىنىڭ ەڭ ءبىرىنشى سەبەبى بالانىڭ پسيحولوگيالىق ەرەكشەلىگىنە، پسيحولوگيالىق دەنساۋلىعىنا تىكەلەي قاتىستى»، – دەيدى مەيرامگۇل سماعۇلقىزى.

جالپى وڭىردە جامبىل وبلىسى اكىمدىگىنە قاراستى ءبىلىم باسقارماسىنىڭ مەملەكەتتىك الەۋمەتتىك تاپسىرىسى شەڭبەرىندە «ارىلۋ-وڭتۇستىك» قوعامدىق بىرلەستىگىنىڭ مۇرىندىق بولۋىمەن وتكەن ترەنينگتەرگە بارلىعى 300-گە تارتا سىنىپ جەتەكشى، 300 مەكتەپ ديرەكتورىنىڭ ورىنباسارى قامتىلعان. كامەلەتكە تولماعان جاستاردىڭ اراسىندا قىلمىستىڭ الدىن الۋدىڭ كەشەندى شاراسى رەتىندە باعالانعان بۇل ترەنينگتەر الداعى ۋاقىتتا دا جالعاسىن تابا بەرمەك.

«ادىرنا»

 ۇلتتىق پورتالى

پىكىرلەر
رەداكتسيا تاڭداۋى