بىلتىر شىلدەدە الماتى قالاسىنداعى كوپقاباتتى تۇرعىن ءۇيدىڭ 7 قاباتىنان قۇلاپ قازا تاپقان اقنار گۇلستاننىڭ اناسى پرەزيدەنت قاسىم-جومارت توقاەۆقا ۇندەۋ جاسادى، دەپ حابارلايدى «ادىرنا» ءتىلشىسى.
اقناردىڭ اناسى گۇلىستان قاميت ءىستىڭ ءادىل تەرگەلۋىن تالاپ ەتەتىنىن مالىمدەدى. ايتۋىنشا، دالەلدەر مەن ۆيدەوماتەريالدار قىزىنىڭ بۇل ارەكەتكە ءوز ەركىمەن بارماعانىن كورسەتكەن.
«دەنەسىندە ازاپتاۋدىڭ اۋىر ىزدەرى بولدى. تەلەفونىنان تابىلعان ۆيدەولاردا قىزىمدى ۇرىپ-سوعىپ، قورلاپ جاتقان ساتتەر بەينەلەنگەن. قاۋىپسىزدىك كامەرالارىنان الىنعان جازبالاردا ونى تەرەزەدەن لاقتىرىپ جىبەرگەنى انىق كورىنەدى. بۇل وقيعادان كەيىن قىزىمنىڭ بارلىق مۇلكى، اقشاسى، زاتتارى، ءتىپتى كيىمدەرى دە جوق بولىپ شىقتى. ونىڭ جانىندا بولعان ەكى قىز —قىتاي ازاماتتارى. ولاردىڭ وسى قىلمىسقا تىكەلەي قاتىسى بولۋى مۇمكىن. سوعان قاراماستان ولار بوستاندىقتا ءجۇر. ءبىرى ءتىپتى ەلدەن شىعىپ، قايتا ورالدى. ەندى ءبىرى 2025 جىلدىڭ 25 قاڭتارىندا قازاقستان ازاماتتىعىن الدى. تەرگەپ-تەكسەرۋ امالدارىن جۇرگىزۋ بارىسىندا ەشقانداي بۇلتارتپاۋ شاراسى قولدانىلعان جوق»،—دەدى مارقۇمنىڭ اناسى.
ول پرەزيدەنتتەن قىلمىستىق ءىستىڭ بابىن اۋىستىرىپ، "ادام ءولتىرۋ" جانە "زاڭسىز بوستاندىقتان ايىرۋ" باپتارى بويىنشا قاراستىرۋ تۋرالى بۇيرىق بەرۋدى ءوتىنىپ، تەرگەۋدى استاناعا بەرۋدى جانە كۇدىكتىلەردى قاماۋعا الۋدى سۇرادى.
ەسكە سالايىق، اقنار گۇلىستان 2024 جىلعى 20 شىلدەدە تەرەزەدەن قۇلاپ قازا تاپقان بولاتىن. بويجەتكەننىڭ ءولىمى بويىنشا اشىلعان ءىس «ءوزىن-ءوزى ولتىرۋگە دەيىن جەتكىزۋ» بابىمەن قارالىپ جاتىن. مارقۇمنىڭ اناسى قىزىن تانىستارى ازاپتاپ، 7-قاباتتان لاقتىرىپ جىبەردى دەيدى.
