“مايىتپەن” پرانك. استانادا بلوگەر قاماۋعا الىندى

استانادا پرانك جاساپ، كوپشىلىكتىڭ اشۋىن تۋعىزعان بلوگەر اراش گاسانوۆ اكىمشىلىك جازاعا تارتىلدى، دەپ حابارلايدى “ادىرنا” ۇلتتىق پورتالى. وقيعا ەلوردالىق تۇرعىن ۇيلەردىڭ بىرىندە بولعان. بلوگەر دوستارىمەن بىرگە ليفت ىشىنە بەتىن جاپقان ء“ولى دەنەنى” كىرگىزىپ، كەيىننەن جارىقتى ءوشىرىپ، ء“مايىتتىڭ” كەنەت قوزعالۋىن ۇيىمداستىرعان. بۇل ءسات ليفت ىشىندە جالعىز تۇرعان ەر ادامنىڭ قاتتى قورقۋىنا سەبەپ بولدى. كەيىن بلوگەر ونىڭ ءتىس ەمحاناسىنا ارنالعان 30 مىڭ تەڭگەلىك سەرتيفيكات ۇتىپ العانىن ايتىپ، بۇل پرانك ارقىلى جارناما جاساعانىن تۇسىندىرەدى. الايدا الەۋمەتتىك جەلى قولدانۋشىلارى مۇنداي ارەكەتتىڭ قاۋىپتى ەكەنىن ايتىپ، ادامنىڭ پسيحيكاسى مەن دەنساۋلىعىنا زيان كەلۋى مۇمكىن ەكەنىن جازدى. “بۇل ءازىل ەمەس. ەگەر ادامنىڭ جۇرەك دەرتى بولسا شە؟” دەگەن مازمۇنداعى پىكىرلەر تارادى. استانا قالالىق پوليتسيا دەپارتامەنتى جەلىدە تاراعان ۆيدەوعا بايلانىستى تۇسىنىكتەمە بەرىپ، بارلىق قاتىسۋشىلاردىڭ ۇستالعانىن مالىمدەدى. سوت شەشىمىمەن اراش گاسانوۆ 30 تاۋلىككە قامالسا، ونىڭ سەرىكتەرىنە 15 تاۋلىكتەن اكىمشىلىك قاماۋ تاعايىندالدى.