قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى (ۇقمك) قازاقستاندىق كاسىپكەر ەرقانات جۇمابەكوۆكە حالىقارالىق ىزدەۋ جاريالادى. بۇل تۋرالى قىرعىزستاننىڭ ارنايى قىزمەتى رەسمي ءباسپاسوز حابارلاماسىندا مالىمدەدى، دەپ حابارلايدى “ادىرنا”.
ەرقانات جۇمابەكوۆك— الماتى وبلىسىنىڭ بۇرىنعى اكىمى اماندىق باتالوۆتىڭ كۇيەۋ بالاسى.
ۇقمك مالىمەتىنشە، جۇمابەكوۆ ۇيىمداسقان قىلمىستىق توپتى (وقت) قارجىلاندىردى دەگەن كۇدىككە ىلىنگەن. اتالعان توپتى 2023 جىلدىڭ قازانىندا بىشكەكتە ارنايى وپەراتسيا كەزىندە ولتىرىلگەن قىلمىس الەمىنىڭ سەركەسى — كامچىبەك (كامچى) كولباەۆ باسقارعان.
«جۇمابەكوۆ ك.اسانبەكتىڭ (كولباەۆتىڭ) قىلمىستىق ارەكەتىن بىلە تۇرا، تمد ەلدەرىندە ءوز بيزنەس جوبالارىن ىلگەرىلەتۋ ماقساتىندا ونىڭ اينالاسىن جۇيەلى تۇردە قارجىلاندىرىپ وتىرعان»، — دەلىنگەن قىرعىزستان ۇقمك مالىمدەمەسىندە.
ۇقمك دەرەكتەرىنە سۇيەنسەك، ەرقانات جۇمابەكوۆ كولباەۆتىڭ «براتسكي كرۋگ» اتتى قىلمىستىق قۇرىلىمىنا قولداۋ كورسەتىپ، ونىڭ تۋىستارىنىڭ الماتىعا جاساعان ساپارلارىن قارجىلاندىرعان. سونداي-اق، قىلمىستىق توپ مۇشەلەرىمەن ىستىقكولدەگى «بارس» دەمالىس ورنىندا بىرنەشە رەت كەزدەسكەن.
بىشكەك قالاسىنىڭ وكتيابر اۋداندىق سوتى جۇمابەكوۆكە قاتىستى سىرتتاي قاماۋعا الۋ تۇرىندەگى بۇلتارتپاۋ شاراسىن بەكىتتى. وعان قىرعىزستان اۋماعىندا رەسمي تۇردە ىزدەۋگە جاريالاندى جانە جاقىن ارادا ينتەرپول بازاسىنا ەنگىزىلۋى مۇمكىن.
ايتا كەتسەك، ەرقانات جۇمابەكوۆ — تەك كاسىپكەر عانا ەمەس، وڭىرلىك ساياسي ەليتاعا قاتىسى بار تۇلعا. ول 2014–2021 جىلدار ارالىعىندا الماتى وبلىسىن باسقارعان، ساياسي سالماعى بار اماندىق باتالوۆتىڭ كۇيەۋ بالاسى.
باتالوۆتار اۋلەتى وڭتۇستىك وڭىرلەردە ۇزاق جىلدار بويى ىقپالىن ساقتاپ كەلگەن. ال ەرقانات جۇمابەكوۆ اشىق دەرەككوزدەردە الماتى مەن وبلىستاعى قۇرىلىس جانە دەۆەلوپەرلىك كومپانيالارمەن بايلانىستى تۇلعا رەتىندە كورسەتىلەدى.
ۇقساس جاڭالىقتار
