تالعاردا توبەلەس كەزىندە قازا بولعان 16 جاستاعى شەرزات پولاتتىڭ ولىمىنە بايلانىستى سوتتا سوتتالۋشىلاردان جاۋاپ الۋ جالعاسىپ جاتىر، دەپ حابارلايدى “ادىرنا” ۇلتتىق پورتالى.
16 مامىرداعى پروتسەستە ايىپتالۋشى ازامات توقتاۋباەۆتىڭ بۇعان دەيىن سوتتى بولعانى ايتىلدى.
“2023 جىلى 4 جەلتوقسان كۇنى مەنى كۇدىكتى دەپ تانىپ، 106-باپتىڭ 1-تارماعىمەن (دەنساۋلىققا قاساقانا اۋىر زيان كەلتىرۋ) ماعان ەكى اي سانكتسيا بەرگەن. مەنى ۋاقىتشا ۇستاۋ يزولياتورىنا، تالدىقورعان قالاسىنىڭ N71 مەكەمەسىنە جاپتى”، – دەدى توقتاۋباەۆ سوتتا پروكۋرورعا بەرگەن جاۋابىندا.
ازامات توقتاۋباەۆ اقپاندا عانا تەرگەۋ يزولياتورىنان ءۇي قاماققا شىققان. ءوزىنىڭ ايتۋىنشا، تاعىلعان ايىپ 106-باپتىڭ 1-تارماعىنان 2-تارماعىنا اۋىستىرىلعان.
شەرزات پولاتتىڭ ولىمىنە قاتىستى ىستە ازامات توقتاۋباەۆقا قك 293-(بۇزاقىلىق) جانە 188-باپتارى (ۇرلىق) بويىنشا ايىپ تاعىلعان.
