جەتىسۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا 2023 جىلى 4 قازاندا بولعان جانجال كەزىندە 16 جاستاعى شەرزات پولاتتىڭ قازا تابۋىنا بايلانىستى ءىس بويىنشا سوت پروتسەسى جالعاسىپ جاتىر. ىستە بىرنەشە ادام ايىپتالۋشى رەتىندە جاۋاپ بەرۋدە، دەپ حابارلايدى "ادىرنا" ۇلتتىق پورتالى قازاقپاراتقا سىلتەپ.
سوت وتىرىسىندا نەگىزگى فيگۋرانتتاردىڭ ءبىرى — نۇربول توقتاۋباەۆ جاۋاپ بەرىپ، سول ءتۇنى بولعان وقيعالار جايىندا ەگجەي-تەگجەيلى باياندادى. ونىڭ ايتۋىنشا، وقيعا الدىندا ول دوستارىمەن «ەيفوريا» كافەسىندە وتىرعان. كەيىن دارحان اسكەنتاي ەسىمدى تانىسىنان قوڭىراۋ كەلىپ، "قاماجاي" دۇكەنىنە كەلۋىن وتىنگەن.
«دۇكەنگە بارعاندا دارحاننىڭ بەتىنەن قان اعىپ تۇردى. ول “دۇكەنشىنىڭ بالاسى ۇرىپ كەتتى” دەدى. مەن دۇكەنگە كىرىپ، قارجاۋبايمەن سويلەستىم. ول جاعدايدى ءارتۇرلى ءتۇسىندىردى. اقىرى 1,5 مىڭ تەڭگە ارتىعىمەن تولەپ، دوسىم ءۇشىن كەشىرىم سۇراپ، كەتىپ قالدىق»، – دەدى توقتاۋباەۆ.
الايدا ول كەيىن جولدا دارحاننىڭ وقيعانىڭ ءمان-جايىن تولىق تۇسىندىرمەگەنىن ەستىپ، دۇكەنگە قايتا ورالۋدى ءجون كورگەنىن ايتتى. ونىڭ سوتتا ايتقانىن سوزىندە، سول جەردە قاقتىعىس ءورشىپ، قارجاۋباي «مەنىمەن نەمەسە بالاممەن شىق» دەپ سەس كورسەتىپ، پىشاق تاقاپ قورقىتقان. بۇدان كەيىن جاعداي شيەلەنىسىپ، نۇربول باۋىرلارىن شاقىرعانىن ايتتى.
«قارسى تاراپ تەلەفون ارقىلى ادامدار شاقىردى. ارتىنشا توبەلەس باستالدى. مەن دۇكەن ىشىندە بولدىم. سول جەردە نۇرقانات مىلتىقپەن ەكى رەت اتتى – ءبىرىنشىسى اسپانعا، ەكىنشىسى جەرگە. ءوزىم تەك نۇرقاناتتى ءبىر-ەكى رەت تەپكەنىمدى مويىندايمىن. شەرزات جاققا بارمادىم، اراقاشىقتىق 4-5 مەتر بولدى»، – دەپ ءتۇسىندىردى ايىپتالۋشى.
سونىمەن قاتار، نۇربول توقتاۋباەۆ الەۋمەتتىك جەلىدە تارالعان بەينەجازبالارعا قاتىستى دا پىكىر ءبىلدىرىپ، ءوزىنىڭ سابىرعا شاقىرىپ جۇرگەنىن، ەشكىمدى ارانداتىپ نەمەسە توبەلەسكە يتەرمەلەمەگەنىن العا تارتتى.
سوتتا كۋاگەر تۇسىرگەن شەرزات پەن نۇرقاناتتىڭ سوققىعا جىعىلعان ءساتى دە كورسەتىلدى. توقتاۋباەۆ بۇل ۆيدەوداعى ءوزىنىڭ ءىس-ارەكەتىن ءماجبۇرلى قادام دەپ اتادى. ادۆوكاتتاردىڭ سۇراعىنا جاۋاپ بەرگەندە، ول شەرزاتتىڭ 16 جاستا ەكەنىن بىلمەگەنىن، سونداي-اق مارقۇمنىڭ اناسى – گۇلبارا بيشىمبيەۆانىڭ ونى توقتاتۋعا ارەكەت ەتپەگەنىن دە اتاپ ءوتتى.
