وتكەن جىل اقمولا وبلىسىندا تۇرعىن ءۇي قۇرىلىسىنىڭ دامۋىنا سەرپىن بەرگەن ماڭىزدى كەزەڭ بولدى. مەملەكەتتىك قولداۋ مەن اۋقىمدى باعدارلامالاردىڭ جۇزەگە اسىرىلۋى ناتيجەسىندە وڭىردە 28 كوپقاباتتى تۇرعىن ءۇي پايدالانۋعا بەرىلىپ، 1 571 وتباسى قونىس تويىن تويلادى.
بۇل ۇيلەردىڭ قاتارىندا نەسيەلىك پاتەرلەر دە، الەۋمەتتىك وسال توپتارعا ارنالعان الەۋمەتتىك تۇرعىن ۇيلەر دە بار. الەۋمەتتىك جالدامالى تۇرعىن ءۇي قۇرىلىسىنا دا ەرەكشە كوڭىل ءبولىندى. وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ مالىمەتىنشە، جىل ىشىندە 149 پاتەرلىك 4 ءۇي سالىنىپ، ولار كەزەكتە تۇرعان الەۋمەتتىك وسال ساناتتاعى ازاماتتارعا تابىستالدى.
سالىنعان تۇرعىن ۇيلەردىڭ باسىم بولىگىن نەسيەلىك ۇيلەر قۇرادى — 1 077 وتباسىعا ارنالعان 20 ءۇي سالىندى. بۇدان بولەك، توتەنشە جاعدايلاردىڭ سالدارىن جويۋ ماقساتىندا تاعى 4 ءۇي بوي كوتەرىپ، 345 وتباسى جاڭا قونىسقا يە بولدى.
تۇرعىن ءۇي سالاسىنداعى مەملەكەتتىك قولداۋ ساپالىق جاڭا دەڭگەيگە كوتەرىلدى. وتكەن جىلى الەۋمەتتىك وسال توپتار ءۇشىن قوسىمشا 850 پاتەر ساتىپ الىندى. بۇل ناتيجەگە بيۋدجەتتىك نەسيەلەر مەن مەملەكەتتىك باعالى قاعازدار ەسەبىنەن قول جەتكىزىلدى. بۇل كوپتەگەن وتباسىلار ءۇشىن تەك تۇرعىن ءۇي ماسەلەسىن شەشۋ عانا ەمەس، سونىمەن قاتار بولاشاقتا باسپانانى جەكەشەلەندىرۋ مۇمكىندىگىنە جول اشتى.
«ءبىزدىڭ باستى مىندەتىمىز – قازاقستان ازاماتتارىن، اسىرەسە تۇرعىن ۇيگە اسا مۇقتاج جانداردى باسپانامەن قامتۋ. ءبىز پاتەرلەردى بيۋدجەت ەسەبىنەن ساتىپ الۋ، وبليگاتسيالار شىعارۋ سياقتى بارلىق تەتىكتەردى ىسكە قوستىق. سونىڭ ناتيجەسىندە 2 421 وتباسى تۇرعىن ءۇي جاعدايىن جاقسارتتى. جالپى وڭىردە 6 مىڭنان استام وتباسى جاڭا قونىسقا يە بولدى»، – دەپ مالىمدەدى سالالىق باسقارماداعىلار.بۇل باعىتتاعى جۇمىستار بيىل دا جالعاسادى. 2025 جىلى اقمولا وبلىسىندا تاعى 24 كوپقاباتتى تۇرعىن ءۇي پايدالانۋعا بەرىلمەك. جاڭا باسپاناعا 932 وتباسى قونىستانادى دەپ جوسپارلانۋدا. ونىڭ ىشىندە 182 وتباسى جالدامالى، ال 750 وتباسى نەسيەلىك ۇيلەردەن پاتەر الادى. سونىمەن قاتار، رەسپۋبليكالىق بيۋدجەت ەسەبىنەن 188 پاتەر، مەملەكەتتىك باعالى قاعازدار ەسەبىنەن تاعى 68 پاتەر ساتىپ الۋ كوزدەلىپ وتىر. جىلدىڭ جارقىن وقيعالارىنىڭ ءبىرى – 8 ناۋرىز قارساڭىندا تسەلينوگراد اۋدانىندا 45 وتباسىعا جاڭا پاتەر كىلتتەرىنىڭ تابىستالۋى بولدى. بۇل شارا وڭىردەگى تۇرعىن ءۇي ساياساتىنىڭ ورنىقتى دامۋىن جانە ونىڭ الەۋمەتتىك ماڭىزدىلىعىن ايقىن كورسەتتى. ال اتقارىلعان جۇمىستىڭ ەڭ جاقسى باعاسى – جاڭا باسپاناعا يە بولعان وتباسىلاردىڭ شىنايى قۋانىشى. جۇزدەگەن وتباسى تۇراقتىلىق پەن ەرتەڭگى كۇنگە دەگەن سەنىمگە يە بولىپ، بيلىككە قولداۋ مەن قامقورلىق ءۇشىن العىستارىن ءبىلدىردى.
