الماتى قالاسىنىڭ تۇركسىب اۋداندىق سوتى ۇشۋدان كەيىن كوز جۇمعان بالانىڭ ءىسى بويىنشا Air Astana كومپانياسىنا قاتىستى شەشىم شىعاردى، دەپ حابارلايدى "ادىرنا" ۇلتتىق پورتالى قازتاگ-قا سىلتەمە جاساپ.
وقيعا 2019 جىلى تۋعان اۋىر حالدەگى بالانىڭ الماتىعا ۇشىپ كەلۋىمەن بايلانىستى. بالا كوما جاعدايىندا بولعان. بىراق ۇشاق قونعان سوڭ اۋەجاي قىزمەتكەرلەرى مەديتسينالىق تالاپتارعا ساي كەلمەيتىن مۇگەدەكتەر ارباسىن ۇسىنعان.
الدىن الا كەلىسىلگەن جەدەل جاردەم كولىگى (رەانيموبيل) مەن دارىگەر اۋەجاي اۋماعىنا كىرگىزىلمەگەن. سونىڭ سالدارىنان بالا ارنايى كولىكپەن ەمەس، مۇمكىندىگى شەكتەۋلى جولاۋشىلارعا ارنالعان امبۋليفت ارقىلى تاسىمالدانعان.
سوت دەرەگىنشە، بۇل – مەديتسينالىق كومەك كورسەتۋ ەرەجەلەرىنىڭ بۇزىلۋى. سونىمەن قاتار، شەكارا باقىلاۋى كەزىندە كەراتيتپەن اۋىرعان بالانىڭ كوزىندەگى تاڭعىشتار ءماجبۇرلى تۇردە شەشىلگەن. وسىدان كەيىن ونىڭ جاعدايى ناشارلاپ، كەلەسى كۇنى اۋرۋحاناعا جاتقىزىلىپ، ءبىراز ۋاقىتتان كەيىن قايتىس بولعان.
سوت Air Astana كومپانياسىنىڭ ءتيىستى شارا قابىلداماعانىن، اۋەجاي قىزمەتتەرىمەن دۇرىس ۇيلەستىرۋ بولماعانىن اتاپ ءوتتى. ناتيجەسىندە، كومپانيا مورالدىق شىعىن رەتىندە 5 ميلليون تەڭگە تولەۋگە مىندەتتەلدى.
شەشىم ازىرگە زاڭدى كۇشىنە ەنگەن جوق.
