تارازدا ىلە اۋداندىق ءماسليحات دەپۋتاتىنا شابۋىل جاسالدى

تارازدا الماتى وبلىسى ىلە اۋداندىق ءماسليحاتىنىڭ دەپۋتاتى، ادۆوكات نۇرلان بايعازيەۆتى سوققىعا جىقتى، دەپ حابارلايدى "ادىرنا" ۇلتتىق پورتالى. بايعازيەۆ تاراز قالاسىنا كليەنتتەرىمەن كەزدەسۋ ءۇشىن بارعان. 13 مامىر كۇنى كەشكە وعان كافە ىشىندە شابۋىل جاسالعان. الدىن الا مالىمەت بويىنشا، سوققىلار كاستەتپەن جاسالعان بولۋى مۇمكىن. دارىگەرلەردىڭ ايتۋىنشا، جابىرلەنۋشىنىڭ بەت سۇيەگى سىنعان. ول اۋرۋحانادا شامامەن التى ساعات بولعان. "ناۋقاس سول جاق بەت سۇيەگىنىڭ  سىنۋ دياگنوزىمەن جەتكىزىلدى. تەرىدە جاراقات جوق. بارلىق قاجەتتى مەديتسينالىق كومەك كورسەتىلدى. گوسپيتاليزاتسيا ۇسىنىلدى، بىراق ول ەمدەلۋدەن ءۇزىلدى-كەسىلدى باس تارتتى" - دەپ مالىمدەدى جامبىل وبلىستىق دەنساۋلىق ساقتاۋ باسقارماسى. پوليتسيا بۇل وقيعا بويىنشا قر قىلمىستىق كودەكسىنىڭ 293-بابىنىڭ 1-بولىگى ("بۇزاقىلىق") بويىنشا سوتقا دەيىنگى تەرگەۋ باستاعانىن حابارلادى. شابۋىل جاساعان ادامنىڭ جەكە باسى انىقتالعان. "وقيعاعا قاتىسى بار ادام انىقتالىپ، پوليتسياعا جەتكىزىلدى. قازىر قىلمىستىق ءىس بويىنشا بارلىق ءمان-جايدى انىقتاۋعا باعىتتالعان تەرگەۋ جانە جەدەل-ىزدەستىرۋ شارالارى جۇرگىزىلىپ جاتىر", - دەپ مالىمدەدى پوليتسيا.