حالىقتى قولجەتىمدى ءارى جايلى تۇرعىن ۇيمەن قامتاماسىز ەتۋ – مەملەكەتتiك الەۋمەتتىك ساياساتتىڭ نەگىزگى باسىمدىقتارىنىڭ ءبىرى. پرەزيدەنت قاسىم-جومارت توقاەۆ قازاقستان حالقىنا جولداۋىندا الەۋمەتتىك ادىلەتتىلىك پەن حالىقتىڭ ءومىر ءسۇرۋ ساپاسىن ارتتىرۋ قاجەتتىلىگىنە ەرەكشە توقتالعان بولاتىن. بۇل مىندەت وڭىرلىك دەڭگەيدە دە كەزەڭ-كەزەڭىمەن جۇزەگە اسىرىلىپ كەلەدى، اسىرەسە تۇرعىن ءۇي قۇرىلىسى سالاسىندا.
2023 جىلى اقمولا وبلىسىندا 650 مىڭ شارشى مەتردەن استام تۇرعىن ءۇي پايدالانۋعا بەرىلدى. بۇل 6 مىڭنان استام وتباسىنىڭ باسپانا جاعدايىن جاقسارتۋعا مۇمكىندىك بەردى.
«رەسپۋبليكالىق جانە وبلىستىق بيۋدجەتتەر ەسەبىنەن 28 كوپقاباتتى تۇرعىن ءۇي سالىندى. جالپى سانى — 1571 پاتەر»، – دەپ حابارلادى وبلىستىق قۇرىلىس، ساۋلەت جانە قالا قۇرىلىسى باسقارماسىنىڭ باسشىسى نۇرسۇلتان ءالىموۆ.جاڭا پاتەرگە يە بولعانداردىڭ ءبىرى – كوكشەتاۋ قالاسىنىڭ تۇرعىنى سابينا جامشيتوۆا. بۇل وقيعا ونىڭ وتباسى ءۇشىن قۋانىشتى عانا ەمەس، اسا ماڭىزدى ءارى سيمۆوليكالىق ساتكە اينالدى.
«انام تۇرعىن ءۇي كەزەگىنە وسىدان 15 جىل بۇرىن تۇرعان ەدى. وكىنىشكە قاراي، ول بۇل كۇنگە جەتە المادى. بىراق مەن، ونىڭ ۇرپاعى رەتىندە، باسپاناعا قول جەتكىزدىم. ماعان ءۇيلى بولۋعا كومەكتەسكەن بارلىق ادامدارعا العىسىمدى بىلدىرەمىن»، – دەدى سابينا جامشيتوۆا.الەۋمەتتىك وسال توپتاردى تۇرعىن ۇيمەن قامتاماسىز ەتۋگە ەرەكشە نازار اۋدارىلۋدا. وسى ماقساتتا مەملەكەت ەسەبىنەن 850 تۇرعىن ءۇي ساتىپ الىنىپ، باسپانا كەزەگىندە تۇرعان ازاماتتاردىڭ سانى ايتارلىقتاي قىسقاردى. وبلىستىق قۇرىلىس باسقارماسىنىڭ مالىمەتىنشە، بيىل 580 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانعان. قازىرگى ۋاقىتتا 34 كوپقاباتتى ءۇيدىڭ قۇرىلىسى ءجۇرىپ جاتىر. ونىڭ ىشىندە 932 پاتەرلىك 24 ءۇي جىل سوڭىنا دەيىن تاپسىرىلادى. سونىمەن قاتار، الەۋمەتتىك وسال توپتارعا ارنالعان 251 پاتەردى ساتىپ الۋ كوزدەلگەن.
«بۇل ماقساتقا رەسپۋبليكالىق بيۋدجەتتەن شامامەن 3,5 ميلليارد تەڭگە ءبولىندى. ونىڭ 2,5 ميلليارد تەڭگەدەن استامى — ترانسفەرتتەر. سول قاراجات ەسەبىنەن 188 پاتەر ساتىپ الىندى. قالعان 63 پاتەردى مەملەكەتتىك باعالى قاعازدار ارقىلى ساتىپ الۋ جوسپارلانىپ وتىر»، – دەپ اتاپ ءوتتى نۇرسۇلتان ءالىموۆ.وسىلايشا، وڭىردە ازاماتتاردىڭ، اسىرەسە ۇزاق جىلدار بويى كەزەكتە تۇرعانداردىڭ تۇرعىن ءۇي جاعدايىن جاقسارتۋعا باعىتتالعان جۇيەلى جۇمىستار جالعاسۋدا.
