13 مامىر كۇنى پاريج سوتى 76 جاستاعى فرانتسۋز اكتەرى جەرار دەپاردەگە 2021 جىلى ءتۇسىرىلىم الاڭىندا ەكى ايەلگە سەكسۋالدىق زورلىق جاساعانى ءۇشىن 18 اي شارتتى جازا تاعايىندادى. سوت سونىمەن قاتار ونىڭ ەسىمىن سەكسۋالدىق قىلمىس جاساعاندار تىزىمىنە ەنگىزىپ، پسيحولوگ ەمىن قابىلداۋعا مىندەتتەدى. بۇل تۋرالى DW جازدى، دەپ حابارلايدى “ادىرنا”.
ۇكىم دەپاردەنىڭ قاتىسۋىنسىز جاريالاندى.
پروكۋراتۋرا ناۋرىز ايىنىڭ سوڭىندا ءدال وسىنداي جازا سۇراپ، 20 مىڭ ەۋرو ايىپپۇل سالۋدى جانە جابىرلەنۋشىلەرگە وتەماقى تولەۋدى تالاپ ەتكەن. سونىمەن بىرگە ونى ەكى جىلعا سايلاۋعا ءتۇسۋ قۇقىعىنان ايىرۋدى دا سۇراعان.
ۇكىم شىققاننان كەيىن دەپاردەنىڭ ادۆوكاتى سوت شەشىمىنە شاعىم تۇسىرەتىنىن مالىمدەدى. اكتەر وزىنە تاعىلعان ايىپتاردى جوققا شىعارىپ وتىر.
ايتا كپتسەك، سوت پروتسەسى 24 ناۋرىزدا باستالعان. اكتەردىڭ ادۆوكاتى جەرەمي اسسۋ ايىپتاۋلاردى جالعان دەپ اتاپ، دەپاردەنىڭ جۇرەگىنە وتا جاسالعانىن جانە ونىڭ قانت ديابەتىمەن اۋىراتىنىن ايتقان.
سوت تاعايىنداعان مەديتسينالىق ساراپشى اكتەردىڭ سوتقا قاتىسۋىنا دەنساۋلىعى جارامدى ەكەنىن راستادى، بىراق تىڭداۋلار 6 ساعاتتان اسپاۋى، ءار 15 مينۋت سايىن ءۇزىلىس جانە تۇسكى اس قاراستىرىلۋى كەرەك ەكەنىن ايتقان.
ءىس 2021 جىلى تۇسىرىلگەن «جاسىل جاپقىشتار» ءفيلمى كەزىندە بولعان جاعدايعا بايلانىستى قوزعالعان. 54 جاستاعى دەكوراتور مەن 34 جاستاعى رەجيسسەردىڭ كومەكشىسى دەپاردەنى ورىنسىز سوزدەر ايتىپ، ولارعا تيىسكەن دەپ ايىپتادى. اكتەردىڭ ايەلدەردىڭ كەۋدەسى مەن دەنە مۇشەلەرىنە رۇقساتسىز قول تيگىزگەنى ايتىلدى.
ولار 2024 جىلدىڭ باسىندا اكتەرگە قارسى سوتقا شاعىم تۇسىرگەن.
